قوعام • 24 ماۋسىم، 2021

اككى ۇرىلاردى ۇستاعان جەدەل ۋاكىل

958 رەت كورسەتىلدى

...جەدەل جەلىگە «پاتەر تونالدى» دەگەن كەزەكتى حابار كەلىپ تۇسكەن ءسات. ۇرىلاردىڭ اككىلىگى سونداي، تىرناقتاي ءىز قالدىرمايدى. ەسىكتى دە ەپپەن اشىپ، جاسىرىلعان التىن بۇيىمداردى، اقشالاردى وپ-وڭاي تاۋىپ، الىپ كەتە بەرەدى. بۇل 2011 جىل-تۇعىن. رۋسلان ومىربەك ۇلىنىڭ دا قالالىق پوليتسيا بولىمىنە قىزمەتكە ەندى ورنالاسىپ جاتقان ۋاقىتى. جاس مامانعا العاش بەرىلگەن تاپسىرمالاردىڭ ءبىرى – قۋلىعىنا قۇرىق بويلامايتىن سول ۇرىلاردى قولعا ءتۇسىرۋ ەدى.  

مينيسترلىكتىڭ بۇيرىعىمەن ۇرىلاردى ۇستاۋ توبى قۇرىلىپ، قۇرامىنا رۋسلان ومىربەك ۇلى باستاعان جەدەل ۋاكىلدەر، ءىز كەسۋشى جانە كريميناليست مامان بەكىتىلىپ بەرىلدى. رۋسلان ومىربەك ۇلى ءاۋ باستان جەدەل ۋاكىل قىزمەتىنە ورنالاسقان. جۇمىس وڭاي ەمەس، جاس مامان ءۇشىن تاجىريبە جيناقتاۋعا ناعىز ورتا وسى ەدى. دەگەنمەن، ءبىلىمدى پوليتسەيگە بىلىكتىلىگىن ارتتىرۋ اناعۇرلىم قيىنعا تۇسپەۋى كەرەك. كاتونقاراعاي اۋدانىنداعى اياداي عانا قابىرعا اۋىلىندا تۋىپ-ءوسىپ، رەسەيدىڭ ۆولگوگرادىنا وقۋعا تۇسكەن رۋسلاننىڭ بىلىمگە دەگەن قۇلشىنىسى جوعارى ەدى. ول وقۋمەن قاتار سپورتتى دا بىرگە الىپ ءجۇردى. مەكتەپ جاسىنان ەركىن كۇرەسپەن اينالىستى. كەيىن قويان-قولتىق توبەلەستەن اكادەميانىڭ قۇراماسىندا ونەر كورسەتتى.

– بەرىلگەن ءار تاپسىرماعا جاۋاپكەرشىلىكپەن قاراۋىمىز كەرەك. ويتكەنى، بۇل جەردە بىرەۋدىڭ تاعدىرى، ەندى بىرەۋدىڭ بىزگە دەگەن سەنىمى بار. ۇرىلاردى ۇستاۋ ءۇشىن دە بار كۇشىمىزدى سالدىق. توپتاعى ماماندار دا بىلىكتى ازاماتتار. بىراق، توناۋ كاسىبي دەڭگەيدە جۇزەگە اسىپ جاتقانى وقيعا ورىندارىندا كورىنىپ تۇراتىن، – دەپ العاش قىزمەتكە كىرىسكەن جىلدارىن ەسكە الدى مايور ر. ومىربەك ۇلى.

ول جىلدارى قازىرگىدەي ەمەس، پاتەر توناۋ ءورشىپ تۇردى. ۇرىلار دا بىلەدى، كەز كەلگەننىڭ ۇيىنە تۇسپەيدى. اۋقاتتى، باي-باعلانداردىڭ پاتەرىن كوزدەگەن. اپتالاپ ءۇي يەلەرىن اڭدىپ، ۇيدە قاي ۋاقىتتا بولمايتىندارىن زەرتتەگەن. بايدىڭ ءۇيى ەكەنىن قايدان بىلگەن دەيسىز عوي. 2011 جىلدارى ەكىنىڭ ءبىرى ۇيىنە كونديتسيونەر ورناتپايتىن. قىمبات كولىكتى دە اركىم مىنە بەرمەيتىن. ياعني، تەرەزە تۇبىندەگى كونديتسيونەر قۇرىلعىلارىنا، پلاستيكتى تەرەزەلەرگە نازار اۋدارعان. پاتەرگە ەنگەندە دە بەس-ون مينۋت قانا اينالاتىن. ساۋساق ىزدەرىن دە قالدىرماۋعا تىرىسقان. ءبىرى ەسىك اشسا، ەندى ءبىرى سىرتتا قاۋىپسىزدىكتى باقىلاپ تۇرعان... دەسە دە، ءبىر قاتەلىك كەتۋى كەرەك ەدى; ۇرىلار پودەزدىڭ ەسىگىندەگى ماگنيتكە ساعىز جاپسىرىپ كەتىپ جۇرگەن. ەسىك كىلتسىز اشىلۋى ءۇشىن. ونى ءار دەتالعا ءمان بەرىپ جۇرەتىن جەدەل ۋاكىل قىزمەتكەرى رۋسلان ومىربەك ۇلى بايقاعان. كەيىن كوشەدەگى بەينەكامەرالار ارقىلى كۇدىكتىلەر قولعا تۇسكەندە گەنەتيكالىق ساراپتاما جاساپ، توناۋ فاكتىسىنە دالەل بولعان. 

– پاتەر توناۋشىلار توبىنىڭ التى-جەتى مۇشەسىن ۇستادىق. سوندا 51 ەپيزود انىقتالدى. ونىڭ 19-ى اۋىر قىلمىس. اۋىر دەپ وتىرعانىم، قۇنى 500 اەك-تەن اساتىن التىن بۇيىمدار، اقشا، باعالى زاتتار تونالعان. باعالى زات بولعاندا دا ۇساق-تۇيەك ەمەس، قۇندىزدى ىشىكتەردى قولدى قىلىپ جۇرگەن، – دەيدى رۋسلان ومىربەك ۇلى.   

وسى تەكتەس ۇلكەن قىلمىستاردى اشۋعا ۇلەسىن قوسىپ جۇرگەن جاس ماماننىڭ قىزمەتى ساتىلاپ وسە بەرگەن. ەڭبەگى ەلەنىپ، ەلباسىنىڭ قولىنان العىس حات تا الدى. رەسپۋبليكانىڭ ۇزدىك جەدەل ۋاكىلى اتاعىن جانە العان. تىزە بەرسەك، جەتكەن جەتىستىكتەرى، ماراپاتتارى وتە كوپ. قىزمەتىن كىشى جەدەل ۋاكىلدىكتەن باستاعان رۋسلان ومىربەك ۇلى بۇگىندە ەرتىس پوليتسيا ءبولىمىنىڭ باسشىسى. جاس تا بولسا، باس بولىپ جۇرگەن پوليتسەي قىزمەتتى ەندى باستاعان ماماندارعا باعىت-باعدارىن بەرىپ، كورگەن-بىلگەنىن ۇيرەتىپ ءجۇر. ەڭ قۋانارلىعى، قازىرگى تاڭدا ۇرى اتاۋلى اناعۇرلىم ازايعان.   

وسكەمەن

سوڭعى جاڭالىقتار

دوللار قايتا قىمباتتاي باستادى

ەكونوميكا • بۇگىن، 11:47

نۇرحاننىڭ دومبىراسى

ونەر • بۇگىن، 09:05

ءتورت دۇركىن چەمپيون

TOKYO2020 • بۇگىن، 09:04

ءبىر ءوزى – ءبىر مەملەكەت

TOKYO2020 • بۇگىن، 09:00

ءاميان اقشاسىز قالدى

قارجى • بۇگىن، 08:47

ساقتىق تالاپقا ساي ەمەس

كوروناۆيرۋس • بۇگىن، 08:37

Ashyq جوباسىن پايدالانۋشىلار سانى ارتتى

كوروناۆيرۋس • بۇگىن، 08:35

اسكەري دارىگەرلەر كومەككە كەلدى

كوروناۆيرۋس • بۇگىن، 08:28

ۇقساس جاڭالىقتار