قاناتقاقتى جوباعا وتاندىق 7 ءوندىرۋشى قاتىسىپ جاتىر. ياعني كاسىپورىنداردا ءونىمدى تاڭبالاۋ پروتسەسى سىناقتان وتكىزىلۋدە. جوبا شەڭبەرىندە جابدىققا ارنالعان شىعىندارعا ەسەپتەۋ جۇرگىزىلگەن ەكەن. اتاپ ايتقاندا, ءبىر جەلى ءۇشىن تاڭبالاۋ جابدىقتارىنىڭ قۇنى كاسىپورىن مەن ءونىمنىڭ كولەمىنە بايلانىستى 0,5 ملن تەڭگەدەن 9,2 ملن تەڭگەگە دەيىن وزگەرىپ وتىرادى.
– مۇنداعى نەگىزگى اڭگىمە كەز كەلگەن جاعدايدا مەرزىمدى تۇردە جۇرگىزىلىپ وتىراتىن وندىرىستىك جەلىلەردى جاڭعىرتۋ جايىندا بولىپ وتىر. بۇل جاعدايدا كومپانيالار قاپتاماعا تسيفرلى تاڭبالاۋ كودىن قولدانۋعا مۇمكىندىك بەرەتىن جابدىقتى ساتىپ الۋى قاجەت. ياعني قوسىمشا جابدىقتى ساتىپ الۋ ءونىمنىڭ تۇپكىلىكتى قۇنىنىڭ قىمباتتاۋىنا اكەلەتىنى شارت ەمەس. ءونىمنىڭ تۇپكىلىكتى باعاسىنداعى جابدىق شىعىندارىنىڭ ۇلەسى ادەتتە 0,06-0,15 پايىزدى عانا قۇرايدى.
بولشەك ساۋدا باعاسىنا اسەر ەتەتىن فاكتورلار كوپ. سوڭعى 5 جىلدا ءسۇت ونىمدەرى قۇنىنىڭ ورتاشا جىلدىق ءوسۋ قارقىنى تاڭبالاۋسىز-اق 6 پايىزدان 13 پايىزعا دەيىن وزگەردى. بۇل باعانىڭ تۇراقتى ءوسۋ تەندەنتسياسىن ايقىندايدى. سوندىقتان تاۋارلاردى تاڭبالاۋ مەن قاداعالاۋدى ەنگىزۋ ءونىمنىڭ تۇپكىلىكتى قۇنىنا ايتارلىقتاي اسەر ەتپەيدى. كەرىسىنشە, بۇل جەردە تۇتىنۋشى تاراپىنان ءونىمنىڭ شىعارىلۋىنا جانە جارامدىلىق مەرزىمىنە قاتىستى سەنىمدىلىك پايدا بولادى. وسىنىڭ ءوزى ۇلكەن تابىس, – دەيدى تسيفرلى ەكونوميكانى دامىتۋ ورتالىعىنىڭ باسقارۋشى ديرەكتورى ولجاس بەكتۇروۆ.
سونداي-اق ءسۇت ونىمدەرىن وندىرۋشىلەر ءۇشىن تاڭبالاۋ جابدىقتارىنا جانە كودتارعا تاپسىرىس بەرۋگە جۇمسالاتىن شىعىنداردىڭ 50 پايىزىنا دەيىن وتەماقىنى قامتاماسىز ەتۋگە مۇمكىندىك بەرەتىن مەملەكەتتىك قولداۋ شارالارى كوزدەلگەن. شاعىن وندىرىسكە ارنالعان تاعى ءبىر جول بار. ول – وندىرىستىك جەلىگە تاڭبالاۋ كودتارىن ەنگىزەتىن جابدىقتاردى ورناتپاي, كودتى باسپاحانا ارقىلى ورناتۋعا تاپسىرىس بەرۋ. بۇل جاعدايدا تاڭبالاۋ شىعىندارى تاعى 2,5-4 ەسە ازايادى.
بولشەك ساۋدا نۇكتەلەرى Data Matrix كودىمەن بەلگىلەنگەن ونىمدەردى سكانەرلەۋ ءۇشىن 2D سكانەرلەرىمەن جابدىقتالعان. وتكەن جىلى تەمەكى ونىمدەرىنە مىندەتتى تسيفرلى تاڭبالاۋ ەنگىزىلىپ, ولار تاڭبالانعان ونىمدەرمەن جۇمىس ىستەۋدە. بۇل رەتتە تاڭبالاۋدى ەنگىزۋدىڭ باستاپقى كەزەڭىندەگى بيزنەس شىعىندارىنا قاراماستان, ورتا جانە ۇزاق مەرزىمدى كەلەشەكتە تاڭبالاۋ جۇيەسى ەلەۋلى پايدا اكەلمەك.
– بىرىنشىدەن, تسيفرلى تاڭبالاۋ ارقىلى ءبىز جوسىقسىز باسەكەلەستىكتىڭ الدىن الىپ, تۇتىنۋشىعا تاۋاردىڭ تۇپنۇسقالىعىن راستاۋعا مۇمكىندىك بەرەمىز. سونىمەن قاتار تاۋارلاردىڭ قوزعالىسىن ەسەپكە الۋ راسىمدەرى ستاندارتتالىپ, بىرىزدەندىرىلەدى. تاڭبالاۋ ارقىلى ءبىز ءسۇت ونىمدەرىنىڭ وندىرۋشىدەن بولشەك ساۋدا دۇكەنىنە جەتۋىنە دەيىنگى ارالىقتا قاداعالاۋدى قامتاماسىز ەتەمىز. بۇل ءوز كەزەگىندە وندىرۋشىلەرگە دە, مەملەكەتكە دە بەلگىلى وڭىردە ناقتى ونىمگە سۇرانىستى جانە ءوندىرىستى جوسپارلاۋدى قامتاماسىز ەتەدى, – دەيدى و.بەكتۇروۆ.
ەسكە سالا كەتەيىك, قازاقستاندا تەمەكى مەن تەرى ونىمدەرىن مىندەتتى تسيفرلى تاڭبالاۋ ەنگىزىلدى. 2021 جىلعى 1 شىلدەدە اياقكيىمنىڭ مىندەتتى تسيفرلى تاڭبالانۋى ەنگىزىلەتىن بولادى. سونداي-اق قازىرگى ۋاقىتتا دارىلىك پرەپاراتتاردى, الكوگول ونىمدەرىن, جەڭىل ونەركاسىپ تاۋارلارىن تاڭبالاۋ بويىنشا قاناتقاقتى جوبالار ىسكە اسىرىلۋدا.
