دەنساۋلىق ساقتاۋ مينيسترلىگى قازاقستان اۋماعىندا قولدانۋعا ماقۇلداعان بۇل پرەپارات كوروناۆيرۋس ينفەكتسياسىنا قارسى ۆاكتسينالاۋ ءۇشىن قولجەتىمدى پرەپاراتتاردىڭ ءتورتىنشىسى. بيىل 11 ماۋسىمدا شىعىس قازاقستانعا قىتاي ۆاكتسيناسىنىڭ ءبىرىنشى جانە ەكىنشى كومپونەنتىنىڭ 38 مىڭ دوزاسى جەتكىزىلدى. قازىرگى ۋاقىتتا ەكپە بارلىق مەديتسينالىق ۇيىمعا تاراتىلدى. بۇل تۋرالى ءباسپاسوز كونفەرەنتسياسىندا دەنساۋلىق ساقتاۋ باسقارماسى باسشىسىنىڭ ورىنباسارى ەلميرا راحىمباەۆا حابارلادى. ونىڭ ايتۋىنشا, بۇل پارتيا ءوڭىردىڭ 19 مىڭ تۇرعىنىنا جەتكىلىكتى. 9 مىڭ 500 دوزا وسكەمەنگە, ءدال سونشا دوزا سەمەيگە بەرىلدى.
CoronaVac پرەپاراتىمەن ۆاكتسينالاۋ 14-28 كۇن ارالىعىمەن ەكى كەزەڭدە جۇرگىزىلەدى. ۆاكتسينا اۋىر اللەرگيالىق رەاكتسياسى بار ادامدارعا, اۋىر نەۆرولوگيالىق اۋرۋلارى بارلارعا, جۇكتى نەمەسە بالا ەمىزەتىن ايەلدەرگە, 18 جاسقا دەيىنگى بالالارعا ەگىلمەيدى. يممۋندىق دەڭگەيىنە قاراي ونكولوگيا, ايتۆ, جيتس بار ازاماتتارعا CoronaVac ەكپەسىن ساقتىقپەن الۋ كەرەك. پروتسەدۋرادان بۇرىن ۋچاسكەلىك دارىگەرمەن كەڭەسكەن دۇرىس.
ە.راحىمباەۆانىڭ مالىمەتىنشە, بۇگىندە وبلىس تۇرعىندارى ۆاكتسينالاۋدان ءوتۋ ءۇشىن قالالار مەن اۋدانداردىڭ بارلىق مەديتسينالىق مەكەمەلەرىندە سپۋتنيك V جانە CoronaVac پرەپاراتتارىن تاڭداي الادى.
– اقپاننىڭ باسىنان باستاپ ءبىز وتاندىق QazVac ۆاكتسيناسىنىڭ 6 مىڭ دوزاسىن, 38 مىڭ دوزا CoronaVac, شامامەن 82 مىڭ دوزا سپۋتنيك V پرەپاراتتارىن الدىق. تاعى 82 مىڭ دوزا Hayat-Vax بولدى. قازىر بۇل پرەپاراتتارمەن ۆاكتسينالاۋ پروتسەدۋراسى اياقتالدى. بارلىعى – 208 مىڭ دوزا. بىزدە رەسەيلىك پرەپاراتتىڭ 59 مىڭ دوزاسى بار. كەشە سپۋتنيك V ەكپەسىنىڭ ەكىنشى كومپونەنتىنىڭ 40 مىڭ دوزاسىن الدىق, – دەپ اتاپ ءوتتى ول.
وسىلايشا, ءوڭىردىڭ 198 مىڭ تۇرعىنى كوروناۆيرۋستان قورعالدى. قازانعا دەيىن 747 مىڭ شىعىسقازاقستاندىقتى ەگۋ جوسپارلانۋدا. حالىق ءۇشىن قولجەتىمدىلىك پەن جايلىلىقتى ارتتىرۋ ءۇشىن ەگۋ پۋنكتتەرىنىڭ سانى ۇنەمى ارتىپ كەلەدى.
وسكەمەن قالاسىنىڭ №2 ەمحاناسىنىڭ ۋچاسكەلىك قىزمەتىنىڭ ءبولىم مەڭگەرۋشىسى ايگەرىم ءشارىپوۆانىڭ ايتۋىنشا, ۆاكتسينالاۋ باستالعاننان بەرى ەمحانانىڭ ەگۋ پۋنكتىندە 9 مىڭعا جۋىق ادام يممۋنداۋدان ءوتتى.
– الدىمەن ءبىز مەديتسينا قىزمەتكەرلەرىن, پەداگوگتەردى, پوليتسيا مەن اسكەري قىزمەتكەرلەردى ۆاكتسينالادىق. قازىر قالا تۇرعىندارىمەن بەلسەندى جۇمىس ىستەيمىز. ادامدار بىزگە سەنبى جانە جەكسەنبى كۇندەرى دە كەلەدى. ىڭعايلى بولۋ ءۇشىن ەگۋ پۋنكتى كۇن سايىن 20.00-گە دەيىن اشىق. CoronaVac ۆاكتسيناسىنىڭ ءبىرىنشى جانە ەكىنشى كومپونەنتىن الدىق, – دەدى ءا.ءشارىپوۆا.
سونىمەن قاتار وسكەمەندەگى «ادك-River», «يمپەراتور» جانە «ەۆرازيا» ساۋدا ۇيلەرىندە ورنالاسقان مەديتسينالىق نۇكتەلەردە ۆاكتسينالاۋ ورتالىعى اشىلدى.
– بارلىق ەگۋ پۋنكتىندە ۆاكتسينا جەتكىلىكتى. ءبىز سوزىلمالى اۋرۋلارى بار ادامدارعا ەگۋدى كوزدەپ وتىرمىز. ويتكەنى بۇل ساناتتاعى ادامدارعا ىندەت تەز جۇعادى, – دەدى ە.راحيمباەۆا.
ايتا كەتەرلىگى, مامانداردىڭ جاساپ وتىرعان مونيتورينگىنە سەنسەك, ۆاكتسينا الىنعان اۋماقتاردا كوروناۆيرۋس اۋرۋىنىڭ سانى سوعۇرلىم از سەكىلدى. سوندىقتان دا مەديتسينالىق ۇيىمداردىڭ باس دارىگەرلەرى كاسىپورىنداردا ەكپە الۋ قاجەتتىلىگى تۋرالى ءتۇسىندىرۋ جۇمىستارىن جۇرگىزەدى.
– پرەزيدەنت قاسىم-جومارت توقاەۆ بالالارىمىزدى وسى اۋرۋدان بارىنشا قورعاۋىمىز كەرەك ەكەنىن اتاپ ءوتتى. جاقىندا مۇعالىمدەرمەن سويلەستىك. وسى ورايدا ولاردى ەشكىم ماجبۇرلەمەيتىنىن اتاپ وتكىم كەلەدى. ويتكەنى ۆاكتسينا ەرىكتى تۇردە الىنىپ جاتىر, – دەدى ە.راحىمباەۆا.
كوروناۆيرۋستىڭ سالدارىنان كەيبىرەۋى رەانيماتسيادا ايلاپ جاتىر. سودان كەيىن تولىق قالپىنا كەلۋى ءۇشىن ءبىر جىل قاجەت كورىنەدى. ۆيرۋس وتە قاۋىپتى. يممۋندىق جۇيەگە دە اسەرى بار. دارىگەرلەردىڭ ايتۋىنشا, ۆاكتسينا العان ادامعا ۆيرۋس جۇقسا دا جەڭىل وتەدى.
