بۇعان دەيىن اقتوبە قالاسىنىڭ تۇرعىندارى شاھارداعى جاعىمسىز ءيىس بويىنشا ءجيى شاعىمدانعان بولاتىن.
ءوڭىر باسشىسى وڭداسىن ءورازاليننىڭ ايتۋىنشا, شالقار كولىنىڭ ماسەلەسى شەشىمىن تاپتى. مەملەكەت باسشىسىنىڭ تاپسىرماسىمەن وتكەن جىلى جەرگىلىكتى بيۋدجەت ەسەبىنەن جوبالاۋ-سمەتالىق قۇجاتتار ازىرلەندى. بيىلدان باستاپ ۇكىمەت تاراپىنان 3 ملرد تەڭگەگە جۋىق قارجى ءبولىندى.
«قازىرگى كەزدە كولدىڭ تابانىن تازارتۋ, ونىڭ سۋ ايدىنىن قالپىنا كەلتىرۋ جۇمىستارى جۇرگىزىلۋدە. جوبا 2 جىلعا جوسپارلانعان. بىراق مەردىگەرمەن بارلىق جۇمىستاردى جىل سوڭىنا دەيىن اياقتاپ, كوكتەمدە سۋ تاسىعاندا ءبىراز سۋ جيناپ الامىز دەگەن ءۇمىتىمىز بار», دەدى ايماق باسشىسى.
سونىمەن قاتار اكىم وڭىردەگى ەكولوگيالىق ماسەلەلەرگە توقتالدى. ونىڭ ايتۋىنشا, 2007 جىلى سالىنعان اۋدانى 60 گا جەردە ورنالاسقان قالدىقتاردى ساقتايتىن پوليگون 25 جىلعا ەسەپتەلگەن بولاتىن.
«قالانىڭ قارقىندى وسۋىنەن ول قازىردىڭ وزىندە تولىپ تۇر. سونداي-اق, جەكەشەلەندىرۋ پروتسەستەرىنە بايلانىستى بۇرىنعى كوممۋنالدىق مەكەمەلەر جويىلدى. بۇگىندە مىڭداعان قوقىستى جينايتىن قۇرالدار الىنىپ, تەحنيكا اكەلىنۋدە, پوليگوندى تازارتۋ جۇمىستارى 1 قازاندا اياقتالادى دەپ جوسپارلانۋدا. وعان دەيىن تاسىمالداۋ جانە قوقىس جينايتىن مەكەمەلەرىنىڭ جۇمىسىن جۇيەگە كەلتىرۋ كوزدەلگەن. جىل اياعىنا دەيىن بۇل ماسەلە شەشىلەدى», دەدى وبلىس اكىمى.
ونىڭ ايتۋىنشا, جاعىمسىز ءيىستىڭ شىعۋىن حيميالىق قوسىندىلار مەن باكتەريالاردىڭ كۇشىمەن ازايتۋ شارالارى قابىلدانۋدا.
