ەكونوميكا • 22 ماۋسىم، 2021

التىن وڭدەيتىن الىپ كەشەن

21 رەت كورسەتىلدى

«قازاقستاننىڭ دامۋ بانكى» اق باستاپقى التىندى كەن وڭدەۋ كەشەنىن سالۋ جانە پايدالانۋ جوباسىن قارجىلاندىرماق. كاسىپورىننىڭ وندىرىستىك قۋاتى جىلىنا 5 ملن توننا كەندى قۇرايدى، دايىن ءونىمدى قۇرامىندا 88% التىنى بار دورە قورىتپاسى قۇيمالارى تۇرىندە شىعارۋ جوسپارلانۋدا. قۇرىلىسقا جۇمسالاتىن شىعىننىڭ جالپى كولەمى – 425 ملن دوللار. قدب 9 جىل مەرزىمگە 300 ملن دوللارعا دەيىنگى سوماعا قارىز بەردى. 125 ملن دوللار سوماسىنداعى قاجەتتى ينۆەستيتسيالاردىڭ قالعان كولەمىن RG Processing جشس ءوز قاراجاتى ەسەبىنەن قامتاماسىز ەتەدى.

اۋدانى 67،7 گا جاڭا تاۋ-كەن-مەتاللۋرگيالىق كەشەننىڭ قۇرى­لى­سى 2020 جىلى باستالدى. RG Processing كاسىپورىندى 2022 جىلدىڭ ءۇشىنشى توقسانىندا ىسكە قوسپاق. كەشەن اقمولا وبلى­سى­نىڭ بۋراباي جانە بۇلان­دى اۋداندارىنىڭ اۋما­عىن­دا ورنالاسادى، وندىرىستىك ۇدەرىستىڭ شيكىزاتى قوسالقى قارىز الۋشى كومپانيا – RG Gold جشس سولتۇستىك جانە وڭتۇستىك راي­گورودوك كەن ورىندارىندا ون­دى­رە­­­تىن باستاپقى التىندى كەن سا­نا­­لادى.

جوبانى «ۆەرنىي كاپيتال» كوم­پانيالار توبى تاۋ-كەن ىسىندەگى ءىرى Resource Capital Funds تىكەلەي ينۆەس­تي­تسيالار قو­رىمەن سەرىكتەسە وتىرىپ ىسكە اسىرادى. RCF – تاۋ-كەن سەكتورىنا ينۆەس­تيتسيالار سالۋعا باعىتتالعان جال­پى باس­قارۋداعى جەكە تىكەلەي ين­ۆەس­تي­تسيالار قورلارىنىڭ توبى. توپ 1988 جىلى قۇرىلعان، ونىڭ ينۆەس­تي­تسيالىق مانداتىنا قاتتى مينەرالدى شيكىزاتتىڭ بارلىق ءتۇرى جانە اكتيۆتەردىڭ كەڭ گەوگرافياسى كىرەدى. قۇرىلعاننان بەرى RCF 51 ەلدە جوبالارى جانە شيكىزاتتىڭ 30 ءتۇرى بار 181 تاۋ-كەن كومپانياسىنا ينۆەستيتسيا سالدى.

تكمك تەحنولوگيالىق سىزبا­سى كەندى مينيمالدى وپەرا­تسيالىق شىعىندارمەن جانە قورشاعان ورتانى قورعاۋ بو­­يىنشا الەمدىك ستاندارتتاردى ەنگىزۋ مۇمكىندىگىمەن وڭتايلى ءوندىرۋ ماقساتىندا جو­با­لان­عان. جابدىق جەتكىزۋشىلەرى – جەتەكشى الەمدىك وندىرۋشىلەر، بۇل جو­با­نىڭ ۇزاق مەرزىمدى پەرسپەكتيۆادا ەكونوميكالىق تيىمدىلىگىن ەلەۋلى دارەجەدە ارتتىرادى.

قۇرامىندا 88% التىنى بار دورە قورىتپاسىنىڭ قۇيمالارى تولىق كولەمدە وندىرىلەتىن ءونىمدى ساتۋعا ۇزاق مەرزىمدى كەلىسىمشارت جاسالعان قازاقستانداعى اففيناج زاۋىتىنا ساتىلماق.

«كەشەننىڭ قۇرىلىسى ءالى سالىنىپ جاتقاندىعىنا قارا­ماس­تان، دايىن ءونىمدى جەتكىزۋگە كوپ­­جىلدىق كەلىسىمشارتقا قول جەت­­كىزدىك. دورە قورىتپاسى ىش­كى نارىقتا ۇلكەن سۇرا­نىس­­قا يە، سەبەبى جىل سايىن بىزدە شامامەن 5 توننا التىن وندى­رى­لە­دى. التىننىڭ وتىمدىلىگى جوعارى جانە تاسىمالدانۋى وڭاي بولعاندىقتان، ونى ساتۋدا قيىن­دىقتار تۋىندامايدى»، دەدى RG Processing باس ديرەكتورى لوۋرەنس روسسوۋ.

ل.روسسوۋدىڭ ايتۋىنشا، جوبانى ىسكە اسىرۋ ورنىنا فابريكانىڭ رەسۋرستىق بازاعا جاقىن بولۋىنا بايلانىستى اقمولا وبلىسى تاڭ­دال­دى، بۇل كەندى تاسىمالداۋ شى­­عىندارىن ەداۋىر ازايتپاق. سو­نى­مەن قاتار وڭىردە قاجەتتى ين­فرا­قۇرىلىم دامىعان، جوعارى بى­لىكتى كادرلار بار.

«بۇگىنگى تاڭدا اقمولا وبلىسى ەلدە التىندى ءوندىرۋ بو­يىنشا الدىڭعى ورىندا تۇر. سوندىقتان ىشكى نارىقتىڭ دورە قورىتپاسىنا قاجەت­تىلىكتەرىن قىسقارتۋعا قابى­لەت­­تى جاڭا فاب­ري­كانىڭ ءدال وسى جەردە سالىن­ۋى ورىندى. بۇل جوبا ءوڭىر ءۇشىن دە ماڭىزدى، ياعني ءوڭىردىڭ ەكو­نو­ميكالىق الەۋەتى ارتادى، شا­مامەن 1000 تۇراقتى جۇمىس ورنى مەن فابريكانىڭ قۇ­­رى­لىسى كەزەڭىندە 500 ۋا­قىت­شا جۇمىس ورنى قۇرىلادى. كا­سىپورىننىڭ ەلدىڭ بيۋدجەتىنە اۋدا­راتىن سالىقتىق تولەمدەرى جىلىنا 20 ملرد تەڭگەدەن اسادى. بانكتىڭ ۇلتتىق ەكونوميكانى تۇراقتى دامىتۋ بويىنشا نەگىز­گى ميسسياسىن ەسكەرە وتىرىپ، جو­با­نى ىسكە اسىرۋ ەسەبىنەن ەل­دىڭ التىندى ستراتەگيالىق قورى ەلەۋ­لى دارەجەدە تولىساتىنىن ايتا كەتۋ كەرەك»، دەپ اتاپ ءوتتى قدب كليەنتتەرمەن جۇمىس ىستەۋ جو­نىن­دە­گى ديرەكتسياسىنىڭ اعا بانكيرى قاسىم مۇحانبەتوۆ.

دامۋ بانكى 300 ملن دوللارعا دەيىن، سونىڭ ىشىندە 217 ملن دوللار جانە 34،8 ملرد تەڭگە مۋل­تيۆا­ليۋ­تالىق قارىز ۇسىن­دى. قا­رىز الۋ مەرزىمى – 9 جىل، قدب-نىڭ قارجى قۇرالدارى قۇرىلىس-مونتاج جۇ­مىس­تارى مەن جابدىقتى ساتىپ الۋعا جۇم­سا­لادى. جوبانىڭ رەس­پۋب­لي­كالىق يندۋستريالاندىرۋ كارتاسىنا ەنگىزىلگەنىن ەس­كەرە وتىرىپ، قارجىلاندىرۋ ين­دۋستريالدى-يننوۆاتسيالىق دا­مۋ­دىڭ مەم­لە­كەت­تىك باعدارلاماسى (يدمب) اياسىندا دا جۇزەگە اسىرىلاتىن بولادى.

 

سوڭعى جاڭالىقتار

شىعىس «قىزىل» ايماقتا

ايماقتار • كەشە

تسيفرلى تەڭگە جوباسى تالقىلاندى

ەكونوميكا • 23 شىلدە، 2021

اقپاراتتىق حابارلاما

ەگەمەن قازاقستان • 23 شىلدە، 2021

ۇقساس جاڭالىقتار