ەكونوميكا • 21 ماۋسىم، 2021

زەينەتاقى زاڭىنا جاڭا تۇزەتۋلەر ەنگىزىلەدى دەگەن اقپارات جالعان

892 رەت كورسەتىلدى

ەڭبەك جانە حالىقتى الەۋمەتتىك قورعاۋ مينيسترلىگى ەكونوميست ولجاس قۇدايبەرگەنوۆتىڭ ەلىمىزدىڭ مەملەكەتتىك ورگاندارى جۇمىس بەرۋشىلەر ەسەبىنەن قوسىمشا 5 پايىزدىق زەينەتاقى جارنالارىن ەنگىزۋ جوسپارىنا قايتا ورالعانى تۋرالى جازباسىنا پىكىر ءبىلدىردى، دەپ حابارلايدى  Egemen.kz.

ۆەدومستۆو زەينەتاقى زاڭناماسىنا جاڭا تۇزەتۋلەر ازىرلەنىپ جاتپاعانىن ءمالىم ەتتى. جۇمىس بەرۋشىلەردىڭ 5 پايىز مولشەرىندەگى مىندەتتى زەينەتاقى جارنالارىن (مزج) ەنگىزۋ تۋرالى نورمالار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە زەينەتاقىمەن قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» 2015 جىلعى 2 تامىزداعى زاڭمەن قابىلدانعان.

«جۇمىس بەرۋشىلەردىڭ مىندەتتى زەينەتاقى جارنالارىن ەنگىزۋدى 2018 جىلعى 1 قاڭتاردان باستاپ جۇزەگە اسىرۋ جوسپارلانعان بولاتىن. الايدا مىندەتتى الەۋمەتتىك مەديتسينالىق ساقتاندىرۋ بويىنشا جوسپار ەنگىزىلگەلى جاتقانىن ەسكەرە وتىرىپ، وسى تۇزەتۋلەردى قولدانىسقا ەنگىزۋ مەرزىمى 2020 جىلعا اۋىستىرىلدى.

مەملەكەت باسشىسىنىڭ تاپسىرماسى بويىنشا 2019 جىلى زاڭنامالىق تۇزەتۋلەر قابىلداندى، وعان سايكەس مزج ەنگىزۋ مەرزىمى 2023 جىلعا اۋىستىرىلدى ("قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك ساقتاندىرۋ، الەۋمەتتىك قامسىزداندىرۋ جانە دەنساۋلىق ساقتاۋ سالاسىنداعى مەملەكەتتىك-جەكەشەلىك ارىپتەستىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى»، دەلىنگەن ەڭبەك مينيسترلىگىنىڭ جاۋابىندا.

سونداي-اق مينيسترلىك 2019 جىلى مەملەكەت باسشىسىنىڭ تاپسىرماسى بويىنشا ۇكىمەت جانىنان زەينەتاقى جۇيەسىن ودان ءارى دامىتۋ، ونىڭ ىشىندە جۇمىس بەرۋشىلەردىڭ 5 پايىزدىق مىندەتتى زەينەتاقى جارنالارىن ەنگىزۋ ماسەلەلەرىن قاراۋ بويىنشا جۇمىس توبى قۇرىلعانىن ايتتى. ۆەدومستۆو مالىمەتى بويىنشا، جۇمىس توبىنا مەملەكەتتىك ورگانداردىڭ وكىلدەرى، پارلامەنت دەپۋتاتتارى مەن ساراپشىلار كىرەدى.

«جۇمىس توبى اياسىندا ازىرلەنگەن ۇسىنىستاردى مەملەكەت باسشىسى قولدادى، ال ۇسىنىلعان شارالاردىڭ ءبىر بولىگى زاڭنامالىق دەڭگەيدە دە، ءىس جۇزىندە دە جۇزەگە اسىرىلدى. مىسالى، 2021 جىلدان باستاپ زەينەتاقى جيناقتارىنىڭ ءبىر بولىگىن تۇرعىن ءۇي جاعدايلارىن جاقسارتۋعا، ەمدەلۋگە، قارجى ۇيىمدارىنىڭ باسقارۋىنا بەرۋگە ماقساتتى پايدالانۋ مۇمكىندىگى بەرىلدى. قولدانىستاعى زاڭناماعا سايكەس جۇمىس بەرۋشىلەر مزج-نى 2023 جىلدان باستاپ ءوز قاراجاتى ەسەبىنەن جۇمىسكەرلەر پايداسىنا اۋداراتىن بولادى.

بۇل حالىقارالىق ستاندارتتارعا سايكەس كەلەتىن زەينەتاقى جاسىنا جەتكەن كەزدە قازاقستاندىقتاردىڭ زەينەتاقى جيناقتارىنىڭ بارابار دەڭگەيىن (زەينەتكەرلىككە شىققاننان كەيىنگى تابىستى اۋىستىرۋ كوەففيتسيەنتى) ساقتاۋعا، سونداي-اق بجزق-نىڭ بارلىق سالىمشىسى زەينەتاقى جيناقتارىنىڭ ءبىر بولىگىن نىسانالى پايدالانۋ قۇقىعىن ىسكە اسىرۋعا مۇمكىندىك بەرەدى»، دەلىنگەن حابارلامادا.

بىرنەشە كۇن بۇرىن ەكونوميست ولجاس قۇدايبەرگەنوۆ ەلىمىزدىڭ مەملەكەتتىك ورگاندارى جۇمىس بەرۋشىلەر ەسەبىنەن قوسىمشا 5 پايىزدىق زەينەتاقى جارنالارىن ەنگىزۋ جونىندەگى جوسپارعا قايتا ورالعانىن جازعان بولاتىن.

سوڭعى جاڭالىقتار

قورجىن تولا – قولا

TOKYO2020 • كەشە

الىمجەتتىك ازايعانىمەن...

قازاقستان • كەشە

تۋريستكە دە ءتارتىپ بار

ايماقتار • كەشە

ۇقساس جاڭالىقتار