مەديتسينا • 20 ماۋسىم، 2021

التىن قولدى انەستەزيولوگ

249 رەت كورسەتىلدى

بالالار دارىگەرى بولۋدىڭ وزىندىك ەرەكشەلىگى بولسا كەرەك ءارى جاۋاپكەرشىلىگى دە جوعارى ەكەنى انىق. مۇنى كىشكەنتاي ەمدەلۋشىگە كومەك كورسەتەتىن ءاربىر اق جەلەڭدى ابزال جان جاقسى تۇسىنەدى. قولى جەڭىل، جۇزىنەن مەيىرىم توگىلىپ تۇراتىن مەديتسنا قىزمەتكەرىنىڭ مىندەتى تىم جاۋاپتى ەكەنىن ەمحاناعا تابىلدىرىعىن اتتاعان اتا-انا دا ۇعىنادى.

وسى تۇرعىدان قاراعاندا تالدىقورعانداعى كوپسالالى بالالار اۋرۋحاناسىندا قىزمەت ەتەتىن دارىگەرلەردىڭ ەڭبەگى ەرەسەن. وبلىس ورتالىعىنداعى مەكەمەگە ايماقتىڭ 17 اۋدانىنان دا دەرتىنە ءدارۋ ىزدەگەن ناۋقاس بالالار كەلەدى. وكىنىشكە قاراي، اۋرۋحاناعا جول اپاتىنا دۋشار بولىپ، جاراقات العان بالالار ءجيى ءتۇسىپ جاتادى. كوپ جاعدايدا كىشكەنتاي پاتسيەنتەرگە وتا جاساۋعا تۋرا كەلەدى ەكەن. سوندىقتان دا مۇنداعى رەانيماتسيا جانە ينتەنسيۆتى تەراپيا ءبولىمىنىڭ ماماندارىنىڭ جۇمىسى ۇنەمى قاۋىرت. اسىرەسە، حيرۋرگ دارىگەر مەن انەستەزيولوگيالىق كومەك كورسەتۋشى مەيىربيكەنىڭ جۇمىسى قاتاڭ تالاپ پەن ەرەكشە كاسىبيلىكتى تالاپ ەتەتىنى انىق. بۇگىن ءبىز سونداي ماقتاۋلى ماماننىڭ ءبىرى - وبلىستىق كوپسالالى بالالار اۋرۋحاناسىنىڭ باس مەيىربيكەسى، انەستەزيولوگ گۇلنارحان تىلەۋباەۆا تۋرالى از-كەم ءسوز قوعاماقپىز.

گۇلنارحان رۇستەمبەكقىزى بالا كۇنىنەن دارىگەر بولۋدى ارمانداعان ەكەن. ادەتتە، مەديتسينا سالاسىنا جۇرەك قالاۋىمەن كەلگەن جاننىڭ ءبارى بالالىق شاعىندا قۋىرشاققا «ەم-دوم» جاساپ، ەكپە سالىپ ويناپ وسكەنىن ايتادى عوي. ءبىزدىڭ كەيىپكەرىمىز دە سونداي ساتتەرىن ەلجىرەي وتىرىپ ەسكە الادى. 1983 جىلى سول كەزدەگى مەديتسينالىق ۋچيليششەگە قۇجات تاپسىرعاندا  ءسابي شاقتاعى رمانىنا ءبىر تابان جاقىنداعانداي بولعان ەكەن. ارنايى وقۋ ورىنىن ۇزدىك اياقتاپ، جولدامامەن قازىرگى جۇمىس ورنىنا كەلدى. ياعني، ول تالدىقورعانداعى كوپسالالى بالالار اۋرۋحاناسىندا تابان اۋدارماي ءالى كۇنگە دەيىن قىزمەت ەتىپ ءجۇر. جاس ماماننىڭ ءبىلىمى مەن ەلگەزەك مىنەزىنە سەنىم ارتقان باسشىلىق ونى بىردەن اۋرۋحاناداعى ەڭ جاۋپتى ءبولىم – حيرۋرگيا بولىمشەسىنە كەزەكشى مەيىربيكە - انەستەزيولوگ ەتىپ جىبەرىپتى. بۇل – 1986 جىل بولاتىن. سودان 1994 جىلعا دەيىن نەبىر جاۋاپتى وتالارعا قاتىسىپ، رەانيماتسيا مەن ينتەنسيۆتى تەراپيا باعىتىندا اسقان شەبەرلىكپەن جۇمىس ىستەپ كەلدى. كەيىننەن باس مەيرىبيكە قىزمەتىنە اۋىسقان. اق جەلەڭدى ابزال انا 4 بالا ءوسىرىپ، قۇتتى ورنىنا قوندىرعان ەكەن. قازىر 3 نەمەرە ءسۇيىپ وتىرعان اسىل اجە.

- مەديتسينا قىزمەتكەرى بولۋدى بالا كەزىمنەن ارمانداپ، تاڭدادىم عوي. وعان جىلدام قول جەتكىزۋ ءۇشىن بىردەن ۋچيليششەگە ءتۇستىم،بۇل تاجىريبە ءۇشىن تاپتىرماس جول بولدى. ال جوعارى ءبىلىمدى ەڭبەك ەتىپ ءجۇرىپ الدىم. جالپى، تاعدىرىما ريزامىن. ويتكەنى، مەن وقۋدى بىتىرگەندە بالالار اۋرۋحاناسىندا جۇمىس ىستەيمىن دەپ ويلامادىم. وسى جولعا توعىستىرعانى ءۇشىن شۇكىرشىلىك ەتەمىن. ويتكەنى، بالالاردىڭ دەنساۋلىعى ءۇشىن كۇرەسۋ اسقان جاۋاپكەرشىلىكتى تالاپ ەتەدى.  كەيدە ناۋقاس بالاعا تۋعان اناسىنان بەتەر بايەك بولاسىڭ، اۋىر وتا كەزىندە جانىڭ شىرقىرايتىن كەزدەر بولادى. انەستەزيولوگ ءاربىر وتا كەزىندە قىلكوپىرمەن ءجۇرىپ وتكەندەي بولادى دەسەم ارتىق ايتپاسپىن. ويتكەنى، ناۋقاسقا وتا الدىندا ناركوز سالۋ اسقان دالدىك پەن كاسىبيلىكتى قاجەت ەتەدى. وپەراتسيادان كەيىن قالىپتى جاعدايعا جىلدام ورالۋ دا انەستەزيولوگتىڭ جاۋاپكەرشىلىگىنە سىن. ونىڭ ۇستىنە، دارىگەرلەر ىشتە ناۋقاستىڭ ءومىرى ءۇشىن كۇرەسىپ جاتقاندا، سىرتتا ونىڭ ەڭ جاقىن ادامى ءۇمىت پەن كۇدىك اراسىندا تۇرادى. مۇنى سوزبەن ايتىپ جەتكىزۋ قيىن، ارينە. ادەتتە رەانيماتسيا ءبولىمىنىڭ دارىگەرلەرى وتا جاساپ شىققاندا ءومىر مەن ءولىمنىڭ اراسىنان ءسۇيىنشى حابار الىپ كەلگەن پەرىشتەدەي كورىنەتىن سياقتى، - دەيدى گۇلنارحان رۇستەمبەكقىزى.

سوڭعى جاڭالىقتار

ەرتەڭىن ويلاعان ەكپە الادى

كوروناۆيرۋس • بۇگىن، 16:53

ۇقساس جاڭالىقتار