سپورت • 19 ماۋسىم، 2021

الەكساندر ۆينوكۋروۆ وليمپيادا كۇنىنە ارنالعان ۆەلوشەرۋدى باستادى

24 رەت كورسەتىلدى

حالىقارالىق وليمپيادا كۇنىن قازاقستاندا اتاپ ءوتۋ ەستافەتاسىن سولتۇستىك قازاقستان ءوز موينىنا الدى. پەتروپاۆلدا جاپپاي ۆەلوشەرۋ ءوتتى. ۆەلوشەرۋدى وليمپيادا چەمپيونى الەكساندر ۆينوكۋروۆ باستادى، دەپ حابارلايدى Egemen.kz.

بۇل مەرەكە جىل سايىن 23 ماۋسىمدا اتاپ وتىلەدى. اتالعان مەرەكە قازاقستاندا 28-ءشى رەت تويلانباق. وسىعان وراي، ۇلتتىق وليمپيادالىق كوميتەت بۇكىل ماۋسىمدى وليمپيادالىق قۇندىلىقتارعا ارنايدى. بارلىق ءىس-شارالار حالىقارالىق وليمپيادالىق قوزعالىستىڭ «بارىمىز بىرگە: جىلدام، بيىككە، مىقتى»  ۇرانىمەن وتەدى.

ۆينوكۋروۆ اتىنداعى سپورت سارايىنان جۇزدەن استام ۆەلوشاباندوز ۆەلوشەرۋگە شىقتى. ەرەسەكتەر مەن بالالار قالا كوشەلەرىمەن 10 شاقىرىمداي ءجۇرىپ ءوتتى.

قاتىسۋشىلارعا وليمپيادا كۇنىنە قاتىسقانى ءۇشىن حالىقارالىق وليمپيادا كوميتەتىنىڭ باسشىسى توماس باح پەن ەلدىڭ ۇلتتىق وليمپيادالىق كوميتەتىنىڭ پرەزيدەنتى تيمۋر ق ۇلىباەۆ قول قويعان سەرتيفيكاتتار تابىستالدى.

«مەن وسىندا كەلگەنىمە جانە سپورتتى سۇيەتىن جەرلەستەرىممەن كەزدەسكەنىمە قۋانىشتىمىن. بۇل كۇندەرى ۆەلوسپورتتان قازاقستان چەمپيوناتى ءوتىپ جاتىر، سوندىقتان پەتروپاۆلدى ءدال قازىرگى تاڭدا ۆەلوسيپەدشىلەر مەكەنى دەپ اتاۋعا بولادى. بۇگىنگى شاراعا قاتىسقاندار قاتارىندا بولاشاق وليمپياداشىلاردىڭ بار ەكەنىنە سەنىمدىمىن»، دەيدى وليمپيادا چەمپيونى الەكساندر ۆينوكۋروۆ.

وليمپيادا كۇنى اياسىندا مەرەكەنى اتاپ ءوتۋ 20 ماۋسىمدا الماتىدا سپورتتىق قۇزعا ورمەلەۋ بويىنشا سايىسپەن جالعاسادى.  21 ماۋسىمدا اقتاۋدا بوكس جانە دزيۋدودان شەبەرلىك سىنىپتارى وتكىزىلسە،  23 ماۋسىمدا ەلوردادا باسكەتبول ويىندارى، ستريت ۆوركاۋت، كانوەدە ەسۋدەن جانە تەكبولدان سايىستار ۇيىمداستىرىلاتىن سپورتتىق شارا وتەدى.

سوڭعى جاڭالىقتار

ۇقساس جاڭالىقتار