«ەل ءۇمىتى» باستاماسى 2019 جىلدان بەرى قولعا الىندى. مۇنىڭ اياسىنداعى العاشقى جوبا – «مىڭ بالا» ۇلتتىق وليمپياداسى. جوبانى نۇرسۇلتان نازارباەۆ قورى مەن ەلباسى اكادەمياسى ءبىلىم جانە عىلىم مينيسترلىگىنىڭ قولداۋىمەن ۇيىمداستىرىپ كەلەدى.
بۇل وليمپيادا اۋىل مەكتەپتەرىندە وقىپ جۇرگەن تالانتتى, قابىلەتتى بالالاردى ىرىكتەپ, جەڭىمپاز بولعانداردىڭ ءارى قاراي ءبىلىم الۋىن تەرەڭدەتىپ وقىتاتىن ارناۋلى مەكتەپتەردە جالعاستىرۋىنا مۇمكىندىك بەرەدى. ايتالىق, ەكى جىل ىشىندە وليمپيادا 400 مىڭنان اسا وقۋشىنى قامتىعان ەكەن. ولاردىڭ بارلىعى – اۋىل مەكتەپتەرىندە وقيتىن 5-6-سىنىپ وقۋشىسى. بۇگىنگى تاڭدا وتكەن جىلعى جوبا جەڭىمپازدارىنىڭ 300-گە جۋىعى دارىندى بالالارعا ارنالعان مامانداندىرىلعان مەكتەپتەردە وقىپ جاتىر. بۇل وقۋشىلاردىڭ قازىر ۇلگەرىمى دە جاقسى ەكەن.
ءا.جانعوزيننىڭ ايتۋىنشا, وليمپيادانىڭ نەگىزگى ءۇش ۇستانىمى بار: قولجەتىمدىلىك, اشىقتىق جانە ينكليۋزيۆتىلىك. كەز كەلگەن اۋىل بالاسىنا قولجەتىمدى بولۋ ءۇشىن وليمپياداعا تىركەۋ جانە تەستىلەۋ ونلاين ءوتتى. بارلىعى قالىس قالماي قۇلاعدار بولۋ ءۇشىن ەلباسى اكادەمياسىنىڭ يۋتۋب پاراقشاسىندا ۆەبينارلاردى تىكەلەي ەفيردە وتكىزىپ, وليمپياداعا تىركەۋ مەن قاتىسۋ جونىندەگى بارلىق نۇسقاۋلىقتار بەرىلدى. ناتيجەسىندە, 124 مىڭنان اسا قارالىم جينادى. وسىلايشا, تسيفرلى داعدىلار دا قالىپتاستى. قىزىعۋشىلىق تانىتقان بالالار ينتەرنەتكە قوسىلعان كەز كەلگەن قۇرىلعى ارقىلى ساناۋلى مينۋتتار ىشىندە تىركەلە الدى. وسىلايشا, بيىلعى وليمپياداعا 4 مىڭنان اسا اۋىل مەكتەپتەرىندە وقيتىن 5-6-سىنىپتاردىڭ 150 مىڭعا جۋىق وقۋشىسى تىركەلدى. ءبىرىنشى كەزەڭدە وقۋشىلار ۇيدە وتىرىپ-اق تەست تاپسىردى. ال ينتەرنەت جىلدامدىعى تومەن بولعاندارعا مەكتەپكە بارىپ تاپسىرۋعا مۇمكىندىك بەرىلدى. دەرەكتەرگە سۇيەنسەك, قاتىسۋشىلاردىڭ 29%-ى پلانشەت پەن كومپيۋتەر ارقىلى, 71%-ى ۇيالى تەلەفون ارقىلى تەست تاپسىرعان.
– وليمپيادانىڭ ماڭىزدى ۇستانىمىنىڭ ءبىرى – اشىقتىق. وسى ورايدا وليمپياداعا اۋىل بالالارى عانا قاتىساتىنىنا كوز جەتكىزگىمىز كەلدى. سول سەبەپتەن العاش رەت ۇلتتىق ءبىلىم بەرۋ دەرەكتەر قورىمەن قاتىسۋشىلاردىڭ اقپاراتتارىن سايكەستەندىردىك. وقۋشىلاردىڭ سوڭعى ەكى جىلدا اۋىل مەكتەبىندە وقيتىنى تەكسەرىلدى. ۇلتتىق ءبىلىم بەرۋ دەرەكتەر قورىنان تەكسەرۋ ارقىلى قاتىسۋشىلاردىڭ وبلىس, اۋدان بويىنشا ناتيجەلەرىنە تالداۋ جاساۋعا مۇمكىندىك بەرىلدى. ناتيجەسى ايقىن بولۋ ءۇشىن تەست سۇراقتارىنىڭ جاۋاپتارى عالامتوردان تابا المايتىنداي ەتىپ ازىرلەندى. ال ەكىنشى كەزەڭ 5-19 مامىر ارالىعىندا وقۋشىلار بارلىق سانيتارلىق-ەپيدەميالىق تالاپتى ساقتاي وتىرىپ, 54 U Study ايماقتىق تەستىلەۋ ورتالىقتارى بازاسىندا تەستىلەۋدەن ءوتتى. وليمپيادا ءادىل ءوتۋى ءۇشىن ۇبت وتەتىن ورتالىقتا وتكىزۋگە شەشىم قابىلدادىق. ەكىنشى كەزەڭگە وڭىرلەر بولىنىسىندە ەڭ كوپ ۇپاي جيناعان 4 مىڭعا جۋىق وقۋشى قاتىستى, – دەدى ەلباسى اكادەمياسىنىڭ ديرەكتورى.
بيىل وليمپيادا العاش رەت ونلاين فورماتتا ءوتتى. 1 000 جەڭىمپازدىڭ 500-ءى – 5-سىنىپ, 500-ءى – 6-سىنىپ وقۋشىلارى. 6-سىنىپ جەڭىمپازدارى ەلىمىزدىڭ دارىندى بالالارعا ارنالعان جەتەكشى مەكتەپتەرىندە: رەسپۋبليكالىق فيزيكا-ماتەماتيكا مەكتەبىندە, ء«بىلىم-يننوۆاتسيا» ليتسەيلەرىندە, «دارىن» مامانداندىرىلعان مەكتەپتەرگە وقۋعا مۇمكىندىك الادى. ال 5-سىنىپ بويىنشا جەڭىمپازداردىڭ Birge Oqý ونلاين مەكتەبىندە وقىعاننان باسقا, كەلەسى جىلى وليمپيادانىڭ ەكىنشى كەزەڭىنە اۆتوماتتى تۇردە قاتىسا الادى.
Birge Oqy ونلاين مەكتەبى – بۇل دا ەلباسى اكادەمياسىنىڭ اۋىل مەكتەپتەرى وقۋشىلارىنا ساپالى ءبىلىم بەرۋ ماقساتىندا جۇزەگە اسىرىلىپ جاتقان كەلەسى اۋقىمدى جوباسى. جاقىندا عانا بۇل ونلاين مەكتەپ العاشقى وقۋ جىلىن اياقتادى. وندا «مىڭ بالا» وليمپياداسىنىڭ فيناليستەرى مەن جەڭىمپازدارى ءبىلىم الىپ جاتىر. ونلاين مەكتەپتە وقۋشىلار سينحروندى فورماتتا عانا ەمەس, اسينحروندى باعىتتا دا وقي الادى. العاشىندا پىكىرتالاس الاڭى فورماتىندا باستاما العان جوبا, بۇگىن ونلاين مەكتەپكە دەيىن كەڭەيتىلدى. پيلوتتىق كەزەڭدە ونلاين مەكتەپكە «مىڭ بالا» وليمپياداسىنىڭ فيناليستەرى بولعان 3 مىڭنان اسا اۋىل وقۋشىسى قابىلدانعان. ال قازىر 48 توپتا 1 500-گە جۋىق وقۋشى ءبىلىمىن جەتىلدىردى.
