بۇل تۋرالى سەيسەنبىدە ارمەنيا وككۋپاتسياسىنان بوساتىلعان شۋشا قالاسىندا تۇركيا مەن ءازىربايجان پرەزيدەنتتەرى رەدجەپ تايپ ەردوعان مەن يلحام اليەۆ قول قويعان بىرلەسكەن وداقتاستىق دەكلاراتسياسىندا ايتىلعان.
تۇركيا مەن ءازىربايجاننىڭ قاۋىپسىزدىك كەڭەستەرى ۇلتتىق قاۋىپسىزدىك ماسەلەلەرى بويىنشا جۇيەلى تۇردە بىرلەسكەن وتىرىستار وتكىزەدى.
ء«ازىربايجان تۇركيانىڭ ارمەنيا ەلىنىڭ 30 جىلدىق اگرەسسياسىن توقتاتۋ جانە باسىپ العان جەرلەردى ازات ەتۋ ماسەلەسىندەگى قولداۋىن جوعارى باعالايدى», دەلىنگەن قۇجات ماتىنىندە.
تاراپتار تۇرىك-ءازىربايجان قاتىناستارىن ودان ءارى كەڭەيتۋ مەن تەرەڭدەتۋدىڭ بارلىق پەرسپەكتيۆالارىن زەرتتەدى, دەلىنگەن دەكلاراتسيادا.
قۇجاتتا تۇركيا مەن ءازىربايجاننىڭ ايماقتىق جانە جاھاندىق قاۋىپسىزدىك پەن تۇراقتىلىق ماسەلەلەرىن شەشۋگە بىرلەسكەن كۇش-جىگەر جۇمساپ جاتقانى باسا ايتىلعان.
سونداي-اق تۇركيا مەن ءازىربايجان اراسىنداعى زانگەزۋر ءدالىزىنىڭ جانە ناحچىۆان-كارس تەمىرجول جەلىسىنىڭ اشىلۋى ەكى ەل اراسىنداعى قاتىناستاردىڭ دامۋىنا ىقپال ەتەتىندىگى اتاپ ءوتىلدى.
دەگەنمەن تۇركيا مەن ءازىربايجان اراسىنداعى اسكەري-ساياسي ىنتىماقتاستىق ءۇشىنشى مەملەكەتتەرگە قارسى باعىتتالماعان.
شۋشا دەكلاراتسيادا تاراپتار تەرروريزمگە, ۇيىمداسقان قىلمىسقا, ەسىرتكى كونترابانداسىنا, زاڭسىز كوشى-قونعا قارسى كۇرەستە بىرلەسكەن كۇش-جىگەر مەن ىنتىماقتاستىقتى كەڭەيتەتىنى دە اتاپ ءوتىلدى.
