وبلىستىق ءبىلىم باسقارماسىنىڭ جوسپارىنا ساي, قازىرگى قولايلى سانيتارلىق-ەپيدەميالىق جاعدايداعى كانيكۋل ۋاقىتىندا قالا سىرتىنداعى 11 لاگەر مەن 102 شاتىرلى جانە كيىز ءۇيلى بالالار لاگەرى جۇمىس ىستەيدى. اتالعان دەمالىس ورىندارى 190 مىڭنان اسا وقۋشىنى قابىلداۋعا ءازىر ەكەن. ولاردىڭ باسىم بولىگى الەۋمەتتىك از قامتىلعان وتباسىلارىنىڭ بالالارى بولماق.
وڭىرلىك كوممۋنيكاتسيالار قىزمەتىندە وتكەن بريفينگتە وبلىستىق ءبىلىم باسقارماسىنىڭ باسشىسى گۇلسىم قوجاحمەتوۆا وسىنداي جوسپارىمەن ءبولىسىپ, جازعى ۋاقىتتا وقۋشىلاردىڭ پايدالى جانە قاۋىپسىز بوس ۋاقىتىن ۇيىمداستىرۋ تۋرالى ايتىپ بەردى. سونداي-اق ول مۇعالىمى شومىلۋ ماۋسىمى كەزىندە بالالاردىڭ قاۋىپسىزدىگىن قامتاماسىز ەتۋ ءۇشىن ءبىلىم باسقارماسى «قاۋىپسىز جاز» اكتسياسىن, «جاس قۇتقارۋشى» وبلىستىق جانە وڭىرلىك جارىستارىن وتكىزەتىنىن اتاپ ءوتتى.
– بالالار مەن پەداگوگتەر سۋعا باتقان كەزدە العاشقى مەديتسينالىق كومەك كورسەتۋدى ۇيرەنەدى, جادىنامالار مەن بۋكلەتتەر تاراتۋعا باستاماشىلىق جاسايدى. مەكتەپ باسشىلىعى وقۋشىلاردى جۇزۋگە ۇيرەتۋ بويىنشا باسسەيندەرمەن مەموراندۋمدارعا قول قويادى. سونىمەن قاتار جەرگىلىكتى اتقارۋشى ورگاندار قاڭقالى باسسەيندەردى ساتىپ الۋ بويىنشا جۇمىستار جۇرگىزۋدە, – دەدى گ.قوجاحمەتوۆا.
بۇعان قوسا جازعى كانيكۋل كەزىندە «قاۋىپسىز اتتراكتسيون», «قاۋىپسىز لاگەر», «قاۋىپسىز الاڭ» اكتسيالارىن ۇيىمداستىرۋ دا جوسپاردا بار ەكەن. مۇنداعى باستى ماقسات – اتا-انالاردى اشىق وتتى, ەلەكتر قۇرالدارىن, گاز جابدىقتارىن پايدالانۋ ەرەجەلەرى, سونىمەن بىرگە سۋدا ءجۇزۋ جانە جولدا ءجۇرۋ ەرەجەلەرى تۋرالى بالالارمەن اڭگىمەلەسۋگە شاقىرۋ. بالالارعا شۇعىل قىزمەتتەردىڭ 112, 101, 102, 103 نومىرلەرىن ۇيرەتۋ كەرەك.
ال اتالعان بريفينگكە قاتىسقان قاراعاندى وبلىسى تجد باسشىسىنىڭ مىندەتىن اتقارۋشى اقىلبەك احمەتجانوۆ جازعى كانيكۋل كەزىندە ۆەدومستۆوعا قاراستى بولىمشەلەردىڭ جوعارى دايىندىق رەجىمىنە كوشىرىلگەنىن مالىمدەدى. قۇتقارۋشىلار سۋ ايدىندارىندا رەيدتەر جۇرگىزىپ, دەمالۋشىلارعا جادىنامالار تاراتىلاتىنىن ايتتى.
– بۇگىنگە دەيىن ولار جابدىقتالماعان سۋ ايدىندارىنا 174 تىيىم سالۋ بەلگىسى ورناتىلدى. ءبىزدىڭ باستامامىز بويىنشا 2GIS جۇيەسىندە شومىلۋعا بولاتىن سۋ ايدىندارى مەن دەمالىس ايماقتارى ارنايى بەلگىلەرمەن بەلگىلەندى, – دەدى ا.احمەتجانوۆ.
وبلىستىق تجد باسشىسىنىڭ مىندەتىن اتقارۋشى وڭىردەگى فەدوروۆ, سامارقاند, شەرۋباي-نۇرا, كەڭگىر سۋقويمالارىنىڭ جاعالاۋلارىندا, سونداي-اق بالقاش جانە ايناكول كولدەرىندە تاۋلىك بويى جەتى قۇتقارۋ بولىمشەسىنىڭ جۇمىس ىستەيتىنىن حابارلادى. مۇنداعى قىزمەتكەرلەر قاجەتتى اۆتوكولىك تەحنيكاسىمەن جانە ءجۇزۋ قۇرالدارىمەن جەتكىلىكتى مولشەردە جابدىقتالعان ەكەن.
بۇدان بولەك, توتەنشە جاعدايلار دەپارتامەنتىنىڭ قىزمەتكەرلەرى جۇزدەن اسا قوعامدىق قۇتقارۋشىنى وقىتىپ-ۇيرەتۋ جۇمىستارىن ۇيىمداستىرعان. ولار وبلىستىڭ سۋ ايدىندارىندا قاۋىپسىزدىك ءىس-شارالارىن جۇزەگە اسىرۋ جۇمىستارىنا تارتىلادى.
قاراعاندى
