15 ماۋسىمدا جاريالانعان قازاقستان وڭىرلەرىندەگى ەپيدەميالىق احۋالدى باعالاۋ ماتريتساسى بويىنشا, «قىزىل ايماقتا» نۇر-سۇلتان قالاسى, «سارى ايماقتا» اتىراۋ, باتىس قازاقستان جانە قاراعاندى وبلىستارى تۇر. ال «جاسىل ايماقتا» – الماتى, شىمكەنت قالالارى, اقمولا, الماتى, اقتوبە, جامبىل, قوستاناي, قىزىلوردا, ماڭعىستاۋ, شىعىس قازاقستان, پاۆلودار, سولتۇستىك قازاقستان جانە تۇركىستان وبلىستارى. بۇدان ءبىر كۇن بۇرىن عانا «سارعايىپ» تۇرعان اقمولا وبلىسىندا جاعداي دۇرىستالىپ, «جاسىلعا» كوشتى.
سونداي-اق قازاقستاندا ءبىرىنشى كومپونەنتپەن 2 547 363 ادام, ەكىنشى كومپونەنتپەن 1 435 334 ادام ۆاكتسينا سالدىردى. «قىزىل ايماقتا» قالىپ وتىرعان ەلوردادا ۆاكتسينالاۋ قارقىنى ءالى دە باسەڭ. سوڭعى مالىمەت بويىنشا ءبىرىنشى كومپونەنت بويىنشا نۇر-سۇلتان قالاسىندا 176 مىڭنان اسا ادام ەكپە الدى.
دەگەنمەن, استاناداعى اسقىنعان جاعدايدىڭ وڭالۋىنا وسى ۆاكتسينالاۋ اسەر ەتىپ جاتىر. ويتكەنى قالادا كارانتين جانە وقشاۋلاۋ رەجىمىن بۇزعان جاعدايلار ءالى دە ازايار ەمەس. بۇل رەتتە ەلوردا اكىمى التاي كولگىنوۆتىڭ جەتەكشىلىگىمەن نۇر-سۇلتان قالاسى اكىمدىگىنىڭ قالالىق شتابىنىڭ وتىرىسىندا كوروناۆيرۋس ينفەكتسياسى تارالۋىنىڭ الدىن الۋ ماسەلەلەرى قارالدى. ەندى ساقتىق شارالارىن تالاپقا سايكەس ۇستاماعان قالا تۇرعىندارى جاۋاپكەرشىلىككە تارتىلىپ, ايىپپۇل سوماسى شامامەن 90 مىڭ تەڭگەنى (30 اەك) قۇرايدى.
بۇگىنگى تاڭدا, Ashyq جوباسىنا قاتىساتىن كاسىپكەرلىك نىساندارى ارقىلى ءۇي كارانتينىن بۇزعان 3 550 ادام انىقتالدى. ولاردىڭ ىشىندە «قىزىل مارتەبەسى» بار, ياعني سovid-19 جۇقتىرعان 1 651 كەلۋشى, «سارى مارتەبەسى» بار 1 899 ادام انىقتالدى.
كارانتين شارالارىن ساقتاۋ بويىنشا مونيتورينگ توپتارىنا جۇمىستى كۇشەيتۋ تاپسىرىلدى. سونىمەن قاتار ءموبيلدى توپتار Ashyq جوباسىنا قاتىساتىن كاسىپكەرلىك نىساندارىنىڭ جۇمىسىن تەكسەرەدى. ياعني كەلۋشىلەردىڭ مارتەبەسى تەكسەرىلەتىنى, سانيتارلىق نورمالاردىڭ ساقتالاتىنى, بەلگىلەنگەن ۋاقىت رەجىمى بۇزىلمايتىنى جانە باسقا دا تالاپ قاتاڭ قاداعالانادى. كارانتين شارالارى بۇزىلعان جانە ساقتالماعان جاعدايدا نىساندار جابىلادى.
«تۇرعىندار ءوز جاۋاپسىزدىعىنان جاقىندارىنا قاۋىپتى ىندەتتى جۇقتىرۋى مۇمكىن ەكەنىن ەسكەرمەيدى. ولاردىڭ اعزاسى كوروناۆيرۋستى جەڭە الاتىنىنا كەپىلدىك جوق. سوندىقتان ءبىز قاتاڭ شارالار قابىلداۋعا ءماجبۇرمىز. مۇنىڭ ءبارى قالا تۇرعىندارى مەن ەلوردامىزدىڭ قاۋىپسىزدىگى ءۇشىن جاسالىپ جاتىر. كوروناۆيرۋس كورسەتكىشى ازايىپ جاتقانىنا قاراماستان, قالا ءالى دە «قىزىل ايماقتا». سىرقاتتانۋشىلىقتىڭ تومەندەۋى ۆاكتسينالاۋ ەسەبىنەن ءجۇرىپ جاتىر. ۆاكتسينالانعانداردىڭ سانىن كوبەيتىپ, ۇجىمدىق يممۋنيتەتتى قالىپتاستىرا وتىرىپ, ءبىز كوروناۆيرۋستى جەڭە الامىز», دەدى نۇر-سۇلتاننىڭ باس مەملەكەتتىك سانيتارلىق دارىگەرى سارقات بەيسەنوۆا.
