ايماقتار • 14 ماۋسىم، 2021

قاراعاندىدا گەماتولوگ دارىگەرلەردىڭ سانى بىرنەشە ەسەگە ارتتى

مەملەكەتتىك-جەكەمەنشىك ارىپتەستىكتىڭ ارقاسىندا قاراعاندى وبلىسىندا ءۇش جىل ىشىندە گەماتولوگ دارىگەرلەر سانى بىرنەشە ەسەگە ارتتى. بۇل تۋرالى قاراعاندى گەماتولوگيا ورتالىعىنىڭ جەتەكشىسى يرينا پيۆوۆاروۆا ايتىپ بەردى، دەپ حابارلايدى Egemen.kz

ايىم ءداۋىت

گەماتولوگيا ورتالىعىنىڭ قاراعاندى فيليالى 2018 جىلى اشىلعان. ءۇش جىل بۇرىن مەديتسينالىق مەكەمەدە گەماتولوگتىڭ 1،5 ستاۆكاسى بولعان.

«بۇگىنگى تاڭدا وندا 16 دارىگەر جۇمىس ىستەيدى. عيماراتتا جوندەۋ جۇمىستارى جۇرگىزىلدى، «تازا اۋا پالاتالارى» جۇيەسى جۇمىس ىستەيدى، زاماناۋي HEPA-سۇزگىلەر ورناتىلدى جانە حيميوتەراپياعا ارنالعان پرەپاراتتاردى ساتىپ الۋ جۇيەسى رەتكە كەلتىرىلدى. وسىنىڭ ءبارىن مەملەكەتتىك-جەكەمەنشىك ارىپتەستىكتىڭ ارقاسىندا جۇزەگە اسىرۋعا مۇمكىندىك تۋدى. لەيكوزدىڭ جەڭىل جانە ورتاشا تۇرىمەن اۋىراتىن ناۋقاستارعا ىڭعايلى بولۋ ءۇشىن ورتالىقتا كۇندىزگى ستاتسيونار جۇمىس ىستەيدى. ناۋقاستار سول جەردە حيميوتەراپيا الا الادى. تاۋلىك بويى ستاتسيوناردا تەك اۋىر ناۋقاستار عانا ەمدەلەدى. مەديتسينالىق مەكەمەدە امبۋلاتوريالىق ورتالىق جۇمىس ىستەيدى، ول باستاپقى دياگنوستيكا ورتالىعىنان (كۇندىزگى جانە قاشىقتىقتان) جانە ديسپانسەرلەۋ ورتالىعىنان تۇرادى. قازىر گەماتولوگيا ورتالىعى امسك قىزمەتىمەن بىرگە لەيكوزدى ەرتە انىقتاۋ ءۇشىن جۇمىس ىستەۋدە. دارىگەرلەر قاراعاندى وبلىسىندا قان وبىرىمەن اۋىراتىن ناۋقاستىڭ ورتاشا جاسى – 41 جاس ەكەنىن اتاپ ءوتتى. الايدا، سوڭعى جىلدارى دارىگەرلەر اۋرۋدى ەرتە كەزەڭدە جانە قارت ادامداردا انىقتاي الدى. بۇل قوسىمشا رەسۋرستاردى قاجەت ەتەدى»، دەيدى «گەماتولوگيا ورتالىعى» جشس باسشىسى يرينا پيۆوۆاروۆا.

سوندىقتان مەديتسينالىق مەكەمەنى كەڭەيتۋ جانە كوشىرۋ تۋرالى جوسپارلانىپ وتىر.

«سونداي-اق ءبىز ليمفوماسى بار ناۋقاستارعا ارنالعان ءۇي-جايدى كەڭەيتۋدى جوسپارلاپ وتىرمىز. ارينە، ءبىز رەانيماتسيانى كۇشەيتۋىمىز كەرەك. ادامدارمەن عانا ەمەس، دياليز بەن گەموفيلتراتسيا قولىمىزدا بولۋى ءۇشىن بىزگە جەرگىلىكتى نەفرولوگيالىق ورتالىق قاجەت»، دەپ اتاپ ءوتتى يرينا پيۆوۆاروۆا.

مەديتسينالىق مەكەمەدە ۋاقىت وتە كەلە سۇيەك كەمىگىن ترانسپلانتاتسيالاۋ ءبولىمىن اشۋ پىسىقتالىپ جاتىر.

ء«بىز اۋتولوگيالىق ترانسپلانتاتسيالاۋ جۇرگىزۋگە قابىلەتتىمىز. ول دەگەنىمىز، جاسۋشالار ادامنىڭ وزىنەن الىنىپ، وزىنە اۋىستىرىلاتىن مەديتسينالىق ارەكەت. بىزدە وعان رۇقسات بار. قاراعاندىدا نۇر-سۇلتانداعى ترانسپلانتاتسيا ورتالىعىنىڭ جوباسىن ازىرلەگەن كوماندانىڭ ءبىر بولىگى جۇمىس ىستەيدى. اۋتولوگيالىق ترانسپلانتاتسيا ىسىكتىڭ ومىرلىك تسيكلىن بىرنەشە ەسە قىسقارتۋعا مۇمكىندىك بەرەدى»، دەپ قوستى يرينا پيۆوۆاروۆا.