ءبىلىم • 14 ماۋسىم، 2021

ەلوردالىق ستۋدەنتتەر 4 تالاپكەردىڭ ورنىنا تەست تاپسىرماقشى بولعان

51 رەت كورسەتىلدى

مەكتەپ تۇلەكتەرىن ۇبت-عا كىرگىزۋ كەزىندە Face-ID جۇيەسى ارقىلى 4 بوگدە تۇلعا انىقتالدى، دەپ حابارلايدى Egemen.kz

4 تالاپكەردىڭ ورنىنا تەستىلەۋگە ەلوردالىق ەكى جوعارى وقۋ ورنىنىڭ 4 ستۋدەنتى قاتىسپاق بولعان. ول ءۇشىن جالعان قۇجاتتار دا جاسالعان. دەگەنمەن، تۇلعانى تسيفرلىق سايكەستەندىرۋ Face-ID جۇيەسى اتالعان بۇزۋشىلىقتاردى انىقتاۋعا مۇمكىندىك بەردى. بۇل جۇيە بيىل ۇبت تاپسىراتىن بارلىق ورتالىقتا ەنگىزىلدى.

«بوگدە تۇلعالار اۋديتورياعا كىرە المادى، ويتكەنى ۇبت-عا كىرگىزۋ تۇلعانى سايكەستەندىرۋ Face ID باعدارلاماسى ارقىلى جۇرگىزىلەدى. باعدارلاما ءتىپتى ەگىزدەردى دە انىقتاي الادى. ۇلتتىق تەستىلەۋ ورتالىعىنىڭ قىزمەتكەرلەرى ۇبت تاپسىرۋ كەزىندە مەكتەپ وقۋشىلارى تاراپىنان ورىن الۋى مۇمكىن بۇزۋشىلىقتاردى قالاي انىقتاۋ كەرەكتىگىن جاقسى بىلەدى. تەستىلەۋگە ءوز ورنىنا بوگدە ادامدى كىرگىزبەك بولعانداردىڭ اراسىندا «التىن بەلگى» يەگەرى دا بار»، دەپ اتاپ ءوتتى قر بعم ۇلتتىق تەستىلەۋ ورتالىعى ديرەكتورىنىڭ م.ا. ناۋجان ديداربەكوۆا.

تەستىلەنۋشىلەر مەن بوگدە تۇلعالارعا قاتىستى اقپارات قۇقىق قورعاۋ ورگاندارىنا جىبەرىلدى. ولارعا قاتىستى قر قىلمىستىق كودەكسىنىڭ 385-بابى 2-بولىگى بويىنشا قىلمىستىق ءىس قوزعالدى.

بيىل ۇبت تاپسىرۋ نىساندارىندا ءۇش ساتىلى جۇيە ەنگىزىلگەن. اتاپ ايتساق، تەستىلەنۋشى جەكە كۋالىگىن كورسەتەدى، كەيىن Face-ID جۇيەسىنەن وتەدى. سونداي-اق ءاربىر تەستىلەۋشىنىڭ الدىندا كامەرا ورناتىلعان. وسى شارالاردىڭ بارلىعى ۇلتتىق بىرىڭعاي تەستىلەۋدى تاپسىرۋ ءراسىمىنىڭ اشىقتىعىن قامتاماسىز ەتۋگە باعىتتالعان.

بۇگىنگى تاڭدا ۇلتتىق بىرىڭعاي تەستىلەۋدى تاپسىرعانداردىڭ سانى شامامەن 150 مىڭ ادام.

وسى رەتتە قر بعم ۇلتتىق تەستىلەۋ ورتالىعى تالاپكەرلەردى اكادەميالىق ادالدىق قاعيدالارىن ساقتاۋعا شاقىرادى.

سوڭعى جاڭالىقتار

ەرتەڭ ۇكىمەت وتىرىسى وتەدى

ۇكىمەت • بۇگىن، 15:00

شاپپا شوت پەن «قۇيرىقتى» پىشاق

ايماقتار • بۇگىن، 08:32

جاڭاوزەندەگى جىلىجاي

ايماقتار • بۇگىن، 08:30

ۇقساس جاڭالىقتار