مەديتسينا • 14 ماۋسىم، 2021

اقتوبەدە ەپيدەميالىق احۋال تۇراقتالىپ كەلەدى

21 رەت كورسەتىلدى

اقتوبەدە كوروناۆيرۋس ينفەكتسياسىن جۇقتىرۋ دەرەگى ازايدى. قازىر ينفەكتسيالىق اۋرۋحانانىڭ ءوزى رەزەرۆكە قويىلىپ، ناۋقاستار فتيزيوپۋلمونولوگيالىق ورتالىقتا ەم الىپ جاتىر، دەپ حابارلايدى Egemen.kz.

ءبىر تاۋلىكتە تاعى 12 ادامنان كوروناۆيرۋس ينفەكتسياسى انىقتالدى. ونىڭ تەڭ جارتىسى دەرتتىڭ سيمپتومدى تۇرىنە شالدىققان. اقتوبە قالاسىندا بەس، مارتوك اۋدانىندا ءبىر ادام اۋرۋ بەلگىلەرىمەن دارىگەر كومەگىنە جۇگىنگەن.

وبلىستىق سانيتاريالىق-ەپيدەميالىق باقىلاۋ دەپارتامەنتى ءباسپاسوز قىزمەتىنىڭ حابارلاۋىنشا، وڭىردە بارلىعى 11 522 جاعداي تىركەلىپ، ونىڭ 96 پايىزعا جۋىعى جازىلدى. ءالى دە 2 مىڭنان استام ادام ءۇي كارانتينىندە. ال ينفەكتسيالىق ستاتسيونارلاردا 188 ادام ەم الىپ جاتىر.

«اۋرۋشاڭدىقتىڭ تومەندەۋىنە بايلانىستى ينفەكتسيالىق ستاتسيونار سانى ازايدى. سونىڭ ىشىندە اۋدانداردا كەرەۋەت سانى قىسقاردى. ال اقتوبە قالاسى بويىنشا وبلىستىق فتيزيوپۋلمونولوگيالىق ورتالىعى عانا كوروناۆيرۋس ينفەكتسياسىن جۇقتىرعانداردى قابىلدايدى. ال ينفەكتسيالىق اۋرۋحانانىڭ ءوزى رەزەرۆتە بولادى»، دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.

سونىمەن بىرگە COVID-19-دەن ايىققان ناۋقاستار امبۋلاتورلىق جانە ستاتسيونارلىق تۇردە ساۋىقتىرۋدان ءوتتى. بۇگىنگە دەيىن 1500 ادام دەنساۋلىعىن نىعايتتى.

«ەگەر ناۋقاس دەرتتى اۋىر جانە ورتاشا اۋىرلىقتا وتكەرسە، شاعىمى بولسا، ۋچاسكەلىك دارىگەرگە بارۋى ءتيىس. سودان كەيىن ساۋىقتىرۋ كۋرسىنان وتۋگە بولادى»، دەدى بەكبولات ءىزباساروۆ.

اقتوبە وبلىسى بويىنشا قازىر 17 بالا باقىلاۋدا. ولاردىڭ ءبارى امبۋلاتورلىق ەم الىپ جاتىر.

«اقتوبە وبلىسى بويىنشا 202 450 دوزا جەتكىزىلدى. 97 284 ادام ءبىرىنشىسىن، 49738 ادام ەكى كومپونەنتىن دە قابىلدادى. قازىرگى كەزدە ۆاكتسينا بار. تۇرعىندار دارىگەر تەكسەرۋىنەن ءوتىپ، قابىلداۋىنا بولادى»، دەدى وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى بەكبولات ءىزباساروۆ.

سوڭعى جاڭالىقتار

اقپاراتتىق حابارلاما

ەگەمەن قازاقستان • كەشە

دوللار تاعى دا ارزاندادى

ەكونوميكا • كەشە

ۇقساس جاڭالىقتار