بيزنەس سۋبەكتىلەرىنىڭ نىساندارىنا ورناتىلعان Ashyq پلاتفورماسى جامان تۇماۋدىڭ تارالۋ قاۋپىن ازايتۋدىڭ بىردەن-ءبىر ءتيىمدى جولى ەكەنى بەلگىلى. وبلىس بويىنشا جوباعا قاتىسۋ ءۇشىن جۇزدەگەن ءوتىنىم ءتۇسىپ, ونىڭ باسىم بولىگى رەسمي راسىمدەلىپ, كاسىپكەرلەرگە QR-كود بەرىلگەن.
– بۇگىندە وبلىس ورتالىعىندا 151 سۋبەكتى Ashyq پلاتفورماسى ارقىلى جۇمىس ىستەپ تۇر, – دەيدى كوكشەتاۋ قالالىق كاسىپكەرلىك ءبولىمىنىڭ باسشىسى اندرەي پودگۋرسكي, – العاشقى بەتتە كاسىپكەرلەر تاراپىنان تۇسىنىسپەۋشىلىكتىڭ بولعانى راس. جاڭالىققا جاتىرقاي قارايتىندار تابىلادى عوي. ءبىز ولاردىڭ باسىن قوسىپ, نە ءۇشىن قاجەت ەكەندىگىن تۇسىندىردىك. الدىمەن حالىقتىڭ دەنساۋلىعىن ساقتاۋ, داۋاسىز دەرتتىڭ الدىن الۋ قاجەت. ەكىنشى جاعىنان حالىققا قىزمەت كورسەتۋ دەڭگەيى كەمىمەيدى. كاسىپكەرلەر جاڭالىقتىڭ جاي-جاپسارىن جاقسى تۇسىنگەننەن كەيىن وتىنىمدەرىن بەرە باستادى.
ءبولىم باسشىسىنىڭ ايتۋىنا قاراعاندا, Ashyq پلاتفورماسى ارقىلى جۇمىس ىستەيتىن نىسانداردىڭ جارتىسىنان استامى – قوعامدىق تاماقتاندىرۋ ورىندارى. جاڭالىقتىڭ جاي-جاپسارىن, تيىمدىلىگىن كاسىپكەرلەر دە ايتىپ وتىر.
– داۋاسىز دەرتتىڭ دابىلى جەتكەننەن بەرى ءبىزدىڭ سالادا جۇمىس ىستەيتىن كاسىپكەرلەرگە وڭاي بولعان جوق, – دەيدى وبلىس ورتالىعىنداعى «بارحات» ءدامحاناسىنىڭ يەسى ايسۇلۋ باجاقوۆا, – ارقايسىمىزدىڭ تولەيتىن نەسيەلەرىمىز بار. جۇمىسىمىز توقتاپ, شارۋامىز قوجىراپ كەتتى. تىعىرىقتان شىعار جولدىڭ ءبىرى وسى جاڭالىق ەكەنىن جەتە ءتۇسىنىپ وتىرمىز. ءبىر ايتا كەتەرلىگى, قوعامدىق تاماقتاندىرۋ ورىندارىنىڭ جۇمىس ىستەۋىنە عانا ەمەس, وڭىردەگى دەرتكە توسقاۋىل قويۋعا سەپتىگى زور. تۇيىندەي ايتقاندا, ەكى جاققا دا ءتيىمدى.
وبلىس ورتالىعىنداعى بىرقاتار كومپيۋتەرلىك كلۋب, شاشتاراز, مونشا ءتارىزدى قوعامدىق ورىندار وسى پلاتفورما ارقىلى جۇمىس ىستەۋدە.
– ءبىزدىڭ نىسانعا دا پلاتفورما ورناتىلدى, – دەيدى «زەۆس» كومپيۋتەرلىك كلۋبىنىڭ ديرەكتورى ولجاس شايمۇرات, – قازىر الاڭسىز جۇمىس ىستەۋدەمىز. حالقىمىزدا «ساقتانساڭ ساۋ بولاسىڭ» دەيتۇعىن قاناتتى ءسوز بار عوي. كلۋبقا كەلۋشىلەر جازاتايىم ىندەت جۇقتىرىپ السا, قانشاما قيىندىقتى باسىنان كەشىرەر ەدى. ەندى مىنە, جاعىمدى جاڭالىقتىڭ ناتيجەسىندە قاۋىپ-قاتەردىڭ الدىن الىپ وتىرمىز. ءوز باسىم پلاتفورمانىڭ تيىمدىلىگى اۋرۋدىڭ الدىن الۋ دەپ ەسەپتەيمىن. شىنىندا دا بۇل –دەرت جۇقتىرماۋدىڭ بىردەن-ءبىر جولى. الداعى ۋاقىتتا تسيفرلى پلاتفورما ءار كاسىپكەردىڭ سەنىمدى كومەكشىسى بولۋى ابدەن مۇمكىن.
Ashyq پلاتفورماسى ورناتىلماعان نىساندار شەكتەۋلى ۋاقىتتا عانا جۇمىس ىستەيدى. اتالعان قوسىمشا جالپى بازامەن بىرىكتىرىلگەندىكتەن, بارلىق دەرەك مولدىرەپ كورىنىپ تۇر. زاماناۋي تەحنولوگيانىڭ جەتىستىگىن وڭىردەگى كاسىپكەرلەر كادەگە جاراتۋعا ابدەن ق ۇلىقتى. كاسىبىن جاڭا باستاعاندار دا بىردەن وتىنىمدەرىن بەرىپ, تىركەلۋگە اسىعۋدا.
ءسوز اراسىندا پلاتفورمانىڭ ءتيىمدى ەكەنىن دالەلدەيتىن ءبىر مىسالدى سىنالاپ كەلتىرە كەتەيىك. وسى جاڭالىق ارقىلى وبلىس ورتالىعىندا قوعامدىق تاماقتاندىرۋ ورىندارىندا «قىزىل» جانە «سارى مارتەبەسى» بار 12 كەلۋشى انىقتالىپ, ونىڭ تورتەۋىندە پتر تەستىنىڭ وڭ ناتيجەسى جانە 8-ءى قاۋىپتى ىندەتتى تاسىمالداۋشىلار ەكەنى انىقتالعان. مىسالى, كوكشەتاۋداعى FamilyMood IPARTMOOD مەيرامحاناسى مەن «مياسورۋبكا» نىساندارى سياقتى قوعامدىق تاماقتانۋ ورىندارىندا «قىزىل مارتەبەسىمەن» بىرنەشە ادامنىڭ كەلگەنى انىقتالعان. مۇنداي وقيعا ششۋچينسك قالاسىنداعى «ياگۋار» فيتنەس-ورتالىعى مەن بۋراباي كەنتىندەگى «دوستار» ءدامحاناسىندا دا ورىن العان. وسى ءبىر مىسالدان-اق قاۋىپتىڭ سەيىلمەي تۇرعاندىعىن, ادامداردىڭ ءالى دە بەيقام ەكەندىگىن, جاڭالىقتىڭ پايداسىن اڭعارۋعا بولادى.
