وسىلايشا, الەمدەگى ەڭ قىمبات بيلەت 7 مينۋتتىڭ ىشىندە ساتىلدى. ازىرگە ونىڭ يەسى كىم ەكەنى بەلگىسىز. دجەف بەزوس يەلىك ەتەتىن Blue Origin كومپانياسى جۇلدىزى جانعان ادامنىڭ اتى-ءجونىن الداعى بىرنەشە اپتادا حابارلاۋعا ۋادە بەرىپ وتىر.
Amazon-نىڭ نەگىزىن قالاۋشىمەن بىرگە ۇشۋعا الەمنىڭ 159 ەلىنەن 8 مىڭعا جۋىق ۇمىتكەر قاتىسقان. دەگەنمەن ونلاين اۋكتسيونعا ەڭ جوعارى ۇسىنىس جاساعان 20 ادام عانا ەنگەن ەكەن.
اۋكتسيون جەڭىمپازى بەزوس جانە ونىڭ ءىنىسى ماركپەن باتىس تەحاستاعى Blue Origin عارىش ايلاعىندا ءۇش كۇندىك دايىندىقتان وتكەننەن كەيىن عارىشقا ۇشادى.
Blue Origin كومپانياسى جوسپار بويىنشا العاشقى ساپاردى بيىلعى شىلدەگە جوسپارلاپ وتىر. سوعان سايكەس, New Shepard عارىش كەمەسى العاش رەت اسپان الەمىنە ادام الىپ شىقپاق.
New Shepard كەمەسىندە جولاۋشىلارعا ارنالعان كاپسۋلا بار. ساپار بارىسىندا جولاۋشىلار 10 مينۋت اسپان الەمىندە بولادى. كاپسۋلا جەردەن 104 كيلومەتر بيىكتىككە دەيىن كوتەرىلمەك. ال جالپى ساپاردىڭ ۇزاقتىعى 40 مينۋتقا سوزىلماق.
تولىعىمەن اۆتوماتتاندىرىلعان كاپسۋلاعا 6 جولاۋشى سىيادى. Blue Origin-ءنىڭ ساتۋ بويىنشا جەتەكشى ديرەكتورى اريان كورنەلل اۋكتسيوننان كەيىن كەمەگە كىمدەردىڭ ناقتى مىنەتىنىن الداعى ۋاقىتتا حابارلايتىنىن جەتكىزدى.
ايتا كەتەرلىگى, New Shepard-تىڭ عارىشقا ۇشىرىلۋى «اپوللون-11» كەمەسىنىڭ ايعا قونعانىنا 52 جىل تولۋىمەن تۇسپا-تۇس كەلىپ وتىر. اۋكتسيوننان تۇسكەن قاراجات Blue Origin’s for the Future كلۋبىنا, ياعني جاستار اراسىندا عىلىم مەن تەحنولوگيانى ناسيحاتتاۋعا بەرىلمەك.
ەسەرسوق 4 ايعا سوتتالدى
فرانتسيا پرەزيدەنتى ەممانۋەل ماكروندى بەتىنەن شاپالاقپەن تارتىپ جىبەرگەن 28 جاستاعى جىگىت 4 ايعا باس بوستاندىعىنان ايىرىلدى.
سونداي-اق دامەن تارەلگە قوسىمشا 14 اي شارتتى جازا كەسىلدى. بۇدان بولەك, تارەلگە بەس جىل بويى مەملەكەتتىك قىزمەتتە بولۋعا جانە قارۋ يەلەنۋگە تىيىم سالىندى.
ۆالانس قالاسىنىڭ سوتى وسىنداي شەشىم شىعاردى. تارەل سوتتا ءوزىنىڭ وڭشىل كوزقاراستاعى ادام ەكەنىن, ماكروندى فرانتسياداعى جاعدايدىڭ ناشارلاۋىنا كىنالى دەپ سانايتىندىقتان, قول كوتەرگەنىن جەتكىزگەن.
فرانتسيا پرەزيدەنتىنىڭ ءباسپاسوز قىزمەتى وسى وقىس وقيعاعا قاراماستان, ماكرون حالىقپەن كەزدەسە بەرەدى دەپ مالىمدەدى.
«پرەزيدەنتتىڭ حالىقپەن بەتپە-بەت جۇزدەسۋى – وتە ماڭىزدى شارا. ەلىمىز ىندەتتەن قاتتى جاپا شەكتى. ءبىز داعدارىستى ەڭسەرىپ, ەكونوميكامىزدى قالپىنا كەلتىرۋىمىز كەرەك. ال مەملەكەت باسشىسى شەشىم قابىلداۋ ءۇشىن تۇرعىندارمەن جۇزبە-ءجۇز تىلدەسىپ, ولاردىڭ پىكىرىن ءبىلۋى ءتيىس», دەيدى فرانتسيا پرەزيدەنتىنىڭ ءباسپاسوز حاتشىسى گابريەل اتتال.
ەستەرىڭىزدە بولسا, وتكەن سەيسەنبىدە ە.ماكرون دروم دەپارتامەنتىندە حالىقپەن كەزدەسۋى كەزىندە وقىس وقيعا ورىن العان-دى. مەملەكەت باسشىسى كولىكتەن شىعىپ, قورشاۋمەن بولىنگەن تۇرعىندارمەن كەزدەسۋ ءۇشىن ءبىر توپ ادامعا جاقىندايدى. وسى كەزدە ءبىر ەر ادام ماكروندى قولىنان ۇستاپ تۇرىپ, بەتىنەن شاپالاقپەن تارتىپ جىبەرگەن. پرەزيدەنت كۇزەتى شاپشاڭ قيمىلداپ, بۇزاقىنى ۇستاعان.
