بۇل مەرەكە جىل سايىن 23 ماۋسىمدا اتاپ وتىلەدى. قازاقستان ۇلتتىق وليمپيادالىق كوميتەتى بارلىق قازاقستاندىقتاردى مۇمكىندىگىنشە بەلسەندى بولىپ, وليمپيادالىق قۇندىلىقتاردى زەرتتەپ, جاڭا سپورت تۇرلەرىمەن تانىسۋ ءۇشىن بۇكىل ماۋسىمدى وليمپيادالىق قۇندىلىقتارعا ارنايدى. بارلىق ءىس-شارالار حالىقارالىق وليمپيادالىق قوزعالىستىڭ ء«بارىمىز بىرگە: جىلدام, بيىككە, مىقتى» جاڭا ۇرانىمەن وتەدى.
بەس وليمپيادالىق ساقينا بەس قۇرلىقتى بەينەلەيتىنى سياقتى, ەلىمىزدىڭ سپورتتاعى بىرلىگىن سيپاتتاۋ ماقساتىندا قازاقستاننىڭ بەس ايماعىندا مەرەكەلىك ەستافەتا وتەدى.
ۇلتتىق وليمپيادا كوميتەتىنىڭ قولداۋىمەن مەرەكەلىك ەستافەتانى ءبىرىنشى بولىپ شىعىس قازاقستان وبلىسى باستادى. ەلىمىزدە جەڭىل اتلەتيكانىڭ نەگىزگى ايماعى بولىپ سانالاتىن وسكەمەندە بالالار اراسىندا جەڭىل اتلەتيكادان جارىس ءوتتى. جەڭىل اتلەتيكانىڭ تاڭدالۋى كەزدەيسوقتىق ەمەس. سەبەبى, جەڭىل اتلەتيكادان وليمپيادا چەمپيونى جانە بىرنەشە دۇركىن جۇلدەگەرى ولگا رىپاكوۆا وسى ايماقتان, شىعىس قازاقستان وبلىسىنان شىققان.
ولگا رىپاكوۆا اتىنداعى جەڭىل اتلەتيكا مانەجىندە 60-تان استام جاس سپورتشىلار 50 جانە 200 مەترگە جۇگىرۋ, ۇزىندىققا سەكىرۋ جانە باسقا ستارتتاردا باق سىناستى. رىپاكوۆا ورتالىعىندا 600-دەن استام بالالار مەن جاسوسپىرىمدەر 24 جاتتىقتىرۋشىنىڭ جەتەكشىلىگىمەن سپورتپەن تەگىن اينالىسادى. سونداي-اق, 2021 جىلى ناۋرىزدا مۇندا جەڭىل اتلەتيكا بولىمىنەن باسقا ۇستەل تەننيسى ءبولىمى دە اشىلدى.
– ءبىزدىڭ بالالار وتە دارىندى. بىزبەن بىرگە جاتتىعاتىنداردىڭ اراسىندا سپورت شەبەرلەرى, حالىقارالىق جارىستاردىڭ جۇلدەگەرلەرى, جاستار اراسىنداعى الەم جانە ازيا چەمپيوناتىنىڭ قاتىسۋشىلارى. وليمپيادا چەمپيونى ولگا رىپاكوۆا وسىندا جاتتىعادى, بالالار ونىڭ دايىندىعىن, جاتتىعۋ بارىسىن كورەدى دە جىگەرلەنىپ, سونداي بولۋعا تالپىنادى. اسىرەسە, جاڭادان كەلگەن بالالار ەرەكشە ىنتالانىپ قالادى. ءبىز وليمپيادا كۇنىن ءداستۇرلى تۇردە جىلدا اتاپ وتەمىز. تەك بىلتىر كارانتينگە بايلانىستى جارىس وتكىزىلمەدى, ايتپەسە, بالالار بۇل مەرەكەنى جىلدا تاعاتسىزدانىپ كۇتىپ, ەرەكشە دايىندالادى, - دەدى سپورت شەبەرى, جوعارى ساناتتى جاتتىقتىرۋشى ۆلاديسلاۆ لەشين.
– ارينە, ءبارىمىز ولگا رىپاكوۆا سياقتى وليمپياداعا بارۋدى ارماندايمىز. سوندىقتان ءبىز جاتتىعۋدى ۇزبەي, تىنباي دايىندالامىز. وسى ورتالىقتى سالعاندارعا جانە جاتتىقتىرۋشىلارىمىزعا وراسان زور العىسىمىزدى ايتامىز بارلىعىن حالىقارالىق وليمپيادا كۇنىمەن قۇتتىقتايمىن, - دەدى جارىسقا قاتىسۋشى جاميليا دۋانوۆا.
بۇگىنگى سپورتتىق شارانىڭ باستى قوناعى جاقىندا توكيو وليمپياداسىنا اتتاناتىن 2012 جىلعى لوندوندا وتكەن جازعى وليمپيادا ويىندارىنىڭ چەمپيونى, الەم چەمپيونى ولگا رىپاكوۆا بولدى.
– سپورتشىلارمەن سويلەسىپ, كەزدەسۋ قاشاندا وتە اسەرلى, جاعىمدى ەموتسيا سىيلايدى. بالالار كىشكەنتاي, جاس ەكەندىگىنە قاراماستان ماقساتتارى ايقىن, وليمپيادالىق رۋحقا يە جانە جەڭىسكە دەگەن ۇمتىلىسى زور. مەن ولاردى ۇلكەن بولاشاق كۇتىپ تۇرعانى انىق. سەبەبى, ولار سپورتتى مىنەز قالىپتاسا باستاعان كەزدە باستادى. ءدال وسىنداي ىنتا مەن ەرىك-جىگەردى, توزىمدىلىك پەن سەنىمدىلىكتىڭ ارقاسىندا بالالاردى ءوز مۇمكىندىكتەرىن ءمۇلت جىبەرمەيتىن, ەشتەڭەدەن جاسقانىپ,تەك جەتىستىككە جەتەلەيتىن جارقىن بولاشاق كۇتىپ تۇرعانىنا نىق سەنىمدىمىن, - دەدى ولگا رىپاكوۆا.
بارلىق بالالارعا حالىقارالىق وليمپيادا كوميتەتىنىڭ باسشىسى توماس باح پەن ەلىمىزدىڭ ۇلتتىق وليمپيادالىق كوميتەتىنىڭ پرەزيدەنتى تيمۋر ق ۇلىباەۆتىڭ قولدارى قويىلعان وليمپيادا كۇنىنە قاتىسقانى ءۇشىن سەرتيفيكاتتار تابىستالدى.
شىعىستان, وسكەمەننەن كەيىن وليمپيادا كۇنى اياسىندا سولتۇستىك ءوڭىر ەستافەتانى جالعاستىرادى. 19 ماۋسىم كۇنى وليمپيادا چەمپيونى الەكساندر ۆينوكۋروۆ, ازيا التىنىنىڭ ءتورت دۇركىن يەگەرى, ۆەلوسپورتتان قازاقستان قۇراماسىنىڭ ۇزدىگى الەكسەي لۋتسەنكونىڭ قاتىسۋىمەن پەتروپاۆلدا ۆەلوشەرۋ وتەدى. وڭتۇستىك استانا سانالاتىن الماتى قالاسىندا 20 ماۋسىم كۇنى سپورتتىق قۇزعا ورمەلەۋدەن ويىندار, باتىس وڭىردە, اتاپ ايتقاندا اقتاۋدا 21 ماۋسىمدا بوكس پەن دزيۋدو بويىنشا شەبەرلىك ساباقتارى وتكىزىلەدى.
ەستافەتا 23 ماۋسىم كۇنى ەل ورتالىعى ەلوردادا اياقتالادى. ترياتلون ساياباعىندا باسكەتبول, ستريتبول ويىندارى, تەكبول جارىسى جانە كانوەدە ۇلكەن سپورتتىق فەستيۆال وتەدى. سونىمەن قاتار, ءداستۇر بويىنشا قازاقستاننىڭ ۇوك پەن سپورتشىلار ەلىمىزدىڭ ءار تۇكپىرىندە وسى كۇنى دۇنيەگە كەلگەن سابيلەردى قۇتتىقتاپ, ولارعا جاقسى تىلەكتەر جازىلعان سىيلىقتار مەن حاتتار تابىستايدى.
