ونلاين كرەديت الۋدىڭ قازاقستاندا وڭاي بولعانى سونشالىق, 1 جىلدا 1 مىڭ ازامات ءوزىنىڭ اتىندا كرەديت بار ەكەنىن بىلمەگەن. ەندى بوتەن بىرەۋدىڭ سىرتىنان نەسيە راسىمدەيتىن الاياقتاردىڭ جولىن كەسۋ ءۇشىن ءۇش ءتۇرلى ءتاسىل قولدانىلادى. العاشقىسى, نەسيە الۋشى ەلەكتروندى قولتاڭبا ارقىلى جەكە دەرەكتەرىن ەنگىزۋى قاجەت. ەكىنشىسى – ءتۇر-سۇلباڭىزدى بيومەتريالىق يدەنتيفيكاتتاۋدان وتكىزۋگە رۇقسات بەرۋىڭىز شارت.
سونداي-اق قارىز الۋشىنىڭ جەكە دەرەكتەرى مەن بەينەسىن ەكى فاكتورلى تەكسەرۋ ارقىلى دا جۇزەگە اسىرۋعا بولادى. ياعني تەلەفونعا كەلگەن ارنايى كودتى ەنگىزە وتىرىپ تا, ونلاين-كرەديت الا بەرەسىز. بىراق قارجى ۇيىمى بۇل جاعدايدا دا كليەنتكە بيومەتريالىق تالاپتاردى ورىنداۋىن سۇرايدى.
«بارلىق شاعىن كرەديتتىك ۇيىمدارعا ۇلتتىق بانكتىڭ ارنايى سەرۆيستىك جۇيەسىن پايدالانا وتىرىپ, كليەنتتى ناقتى تەكسەرۋ, ونىڭ دەرەكتەرىن وتىنىمدە بەرىلگەن دەرەكتەرمەن سالىستىرىپ تەكسەرۋدى, كليەنتتىڭ ناقتى بيومەتريالىق دەرەكتەرىنىڭ جەكە باسىن كۋالاندىراتىن قۇجاتتاردا كورسەتىلگەن دەرەكتەرگە سايكەس بولۋىن قامتاماسىز ەتۋ مىندەتتەلەدى», دەدى قازاقستان ميكروقارجى ۇيىمدارى قاۋىمداستىعىنىڭ باسشىسى ەربول ومارحانوۆ.
