بەيسەنوۆانىڭ ايتۋىنشا, ەلوردادا 101 ءتارتىپ بۇزۋشى انىقتالدى, ولار قوسىمشاداعى «قىزىل» جانە «سارى» ستاتۋسىنا قاراماستان مەكەمەلەرگە كىرگەن. سارحات بەيسەنوۆا ءوز سوزىندە ولارعا وقشاۋلاۋ رەجيمىن ساقتاۋ بويىنشا ءتۇسىندىرۋ جۇمىستارى جۇرگىزىلەتىنىن اتاپ ءوتتى.
«امبۋلاتوريالىق ناۋقاستاردىڭ جانە جاقىن بايلانىستا بولعان ادامداردىڭ شەكتەۋ شارالارى مەن كارانتيندى بۇزۋىنا بىرنەشە رەت نازار اۋدارىلدى. ولار ءالى دە كوروناۆيرۋستىق ينفەكتسيانىڭ كوبەيۋىنىڭ نەگىزگى سەبەبى بولىپ قالا بەرەدى», دەدى نۇر-سۇلتاننىڭ باس سانيتارلىق دارىگەرى.
قالانىڭ باس سانيتارلىق دارىگەرىنىڭ مالىمەتىنشە, جۇرگىزىلىپ جاتقان ءىس-شارالاردىڭ ارقاسىندا COVID-19 جاعدايى تۇراقتانىپ, ىندەت كورسەتكىشى تومەندەدى. 100 مىڭ تۇرعىنعا شاققانداعى اپتالىق سىرقاتتانۋشىلىق كورسەتكىشى مامىر ايىمەن سالىستىرعاندا 210-نان 110-عا دەيىن تومەندەدى. قازىرگى ۋاقىتتا قالادا ينفەكتسيانىڭ بەلسەندى وشاعى – 1 576, ونىڭ ىشىندە: ءۇي – 1 229, ۇيىمداستىرىلعاندار اراسىندا – 347. مەديتسينالىق باقىلاۋدا 3 216 بايلانىستا بولعان ادام بار.
كوروناۆيرۋستىق ينفەكتسيانىڭ تارالۋىنىڭ الدىن الۋ ماقساتىندا قازاقستان رەسپۋبليكاسى دەنساۋلىق ساقتاۋ مينيسترلىگى كۆي-مەن اۋىراتىن ناۋقاستار مەن بايلانىستا بولعان ادامدار ءۇشىن سانيتاريالىق قاعيدالاردى بەكىتتى. وقشاۋلاۋ رەجيمىن ورىنداماي, «Ashyq» پلاتفورماسى ارقىلى انىقتالعاندارعا اكىمشىلىك جازا قاراستىرىلعان.
قاۋلىعا سايكەس, ەگەر ازامات ستاتۋسىن بىلە تۇرا, ءوزىن-ءوزى وقشاۋلاۋ رەجيمىن بۇزسا جانە اينالاسىنداعىلارعا قاساقانا جۇقتىرۋ قاۋپىن تۋدىرسا, وندا قر اقبتك-ءنىڭ 425-بابىنىڭ 1-بولىگىمەن وعان 30 اەك نەمەسە 87 510 تەڭگە مولشەرىندە اكىمشىلىك ايىپپۇل تۇرىندەگى جازا قولدانىلادى. وسى قاعيدالار 2021 جىلدىڭ 10 ماۋسىمىندا كۇشىنە ەنەدى.
«قىزىل» نەمەسە «سارى» ستاتۋسى بار تۇرعىندار وقشاۋلاۋ رەجيمىن بۇزىپ, قوعامدىق ورىنداردا ەمىن-ەركىن جۇرسە, COVID-19 تاسىمالداۋشى بولىپ سانالادى. وسىلايشا يممۋنيتەتى تومەن ازاماتتارعا, قارتتار مەن بالالارعا, سونداي-اق باسقا دا قاۋىپ توبىنداعى ادامدارعا جۇقتىرادى. بۇل ءوز كەزەگىندە نۇر-سۇلتان قالاسىنىڭ «قىزىل ايماقتاعى» ۋاقىتىن ۇلعايتىپ, سىرقاتتانۋشىلىق كورسەتكىشىنىڭ كۇندەلىكتى وسۋىنە اسەر ەتەدى», دەپ قورىتىندىلادى نۇر-سۇلتان قالاسىنىڭ باس سانيتارلىق دارىگەرى.
