وتكەن جىلى شىمكەنت قالاسىندا بوكستان قازاقستان رەسپۋبليكاسىنىڭ بىرىنشىلىگى ءوتتى. وعان ەلىمىزدىڭ بارلىق وڭىرىنەن 190 سپورتشى قاتىستى. بايقاعانىمىز, اتالعان تۋرنيردە ۇلتتىق ۇلاننىڭ سپورتتىق-شتاتتىق كومانداسىنىڭ مۇشەلەرى اتوي سالدى. اتاپ ايتقاندا, ايەلدەر اراسىندا ەفرەيتور نازىم قىزايباي, قاتارداعى جاۋىنگەر نادەجدا ريابەتس, ەرلەر اراسىندا قاتارداعى جاۋىنگەر بەكزات نۇرداۋلەتوۆ ءوز سالماق دارەجەسىندە باس جۇلدەگە يە بولدى.
وسى جەردە زاڭدى سۇراق تۋادى. ءار وبلىستىڭ نامىسىن قورعاپ جۇرگەن سپورتشىلار قالايشا ۇلتتىق ۇلان سپورت كومانداسىن دايارلاۋ ورتالىعىنىڭ ساپىندا ونەر كورسەتەدى؟ ورتالىققا قالاي قابىلدانادى جانە قانداي قولداۋ كورسەتىلەدى؟ وسى جانە وزگە دە ساۋالدىڭ جاۋابىن بىلمەككە ءبىز ۇلتتىق ۇلان سپورت كومانداسىن دايارلاۋ ورتالىعىنىڭ باستىعى, پولكوۆنيك ءساتجان ابىشەۆتى سوزگە تارتقان ەدىك.
– بىلتىر وتكەن بوكستان قازاقستان چەمپيوناتىندا ءسىز اتاپ كورسەتكەن سپورتشىلاردان بولەك, ەفرەيتور ابىلايحان ءجۇسىپوۆ پەن قاتارداعى جاۋىنگەر سەرىك تەمىرجانوۆ ءوز سالماقتارىندا چەمپيون اتاندى. ەفرەيتور ءىلياس سۇلەيمەنوۆ ءۇشىنشى ورىن الدى, – دەپ باستادى ءوز اڭگىمەسىن پولكوۆنيك ءساتجان ابىشەۆ. – جىلدىق جوسپارعا سايكەس بوكستان قازاقستان بىرىنشىلىگىنە بارىپ, سپورتشىلارىمىزعا قولداۋ كورسەتتىك. ولاردىڭ پسيحولوگيالىق جاعدايىن, دەنە دايارلىعىن بايقادىق. بۇدان بولەك, ءبىز كۇرەس تۇرلەرى بويىنشا كومانداعا دا كوڭىل بولۋدەمىز. جۋىردا دزيۋدودان ۇلاندىق سپورتشى ەلدوس سمەتوۆ تاشكەنتتە وتكەن تۋرنيردە كۇمىس مەدالدى جەڭىپ الدى. سونداي-اق گرەك-ريم كۇرەسىنەن 67 كيلو سالماقتا المات كەبىسباەۆ پەن 77 كيلو سالماق دارەجەسىندە تەمىرلان شادۋكاەۆ الەم بىرىنشىلىگىندە (U-23) قولا جۇلدەگەر اتاندى. يۋليا گالىشەۆا موگۋل سپورتى بويىنشا الەم چەمپيوناتىنىڭ كۇمىس مەدالىن جەڭىپ الدى. بۇل – ۇلان سپورتى عانا ەمەس, جالپى ەلىمىزدىڭ سپورتى ءۇشىن دە ۇلكەن جەتىستىك.
– ۇلكەن جەتىستىك ەكەنى راس. بىراق ءسىز اتىن اتاعان سپورتشىلار – تەك ۇلتتىق ۇلان اسكەرىنىڭ عانا ەمەس, ەلىمىزدىڭ دە ماقتانىشتارى. وقىرماندارىمىزعا تۇسىنىكتى بولۋ ءۇشىن سپورتشىلاردىڭ ۇلاندىقتاردىڭ قاتارىنا قالاي قوسىلاتىنى تۋرالى ايتا كەتسەڭىز.
– سپورتتىق-شتاتتىق كوماندا 1993 جىلى قاراشا ايىندا قازاقستان رەسپۋبليكاسى ىشكى ىستەر ءمينيسترىنىڭ بۇيرىعىمەن قۇرىلدى. ءبىز ىشكى ىستەر ورگاندارىنىڭ قۇرامداس بولىگى بولعاندىقتان, ەلىمىزدەگى «دينامو» دەنە شىنىقتىرۋ جانە سپورتتىق قوعامىمەن تىعىز بايلانىس ورناتقانبىز. ولاردىڭ قۇرامىنا جاس سپورتشىلار قابىلدانادى. اسكەرگە شاقىرۋ ناۋقانى باستالعاندا قوعامداستىق بىزگە سپورتشىلاردىڭ ءتىزىمىن ۇسىنادى. ءبىز ولاردان اسكەري انت قابىلداپ, مەرزىمدى اسكەري قىزمەتشىلەردىڭ قاتارىنا قوسامىز. وسىلايشا, ولار ءبىزدىڭ سپورتتىق كوماندا قۇرامىنا ەنەدى. ءارى قاراي سپورتتىق جانە اسكەري مانساپتارىن ۇلتتىق ۇلان قاتارىندا جالعاستىرادى.
بيىل ءبىزدىڭ قاتارىمىزعا بوكس سپورت تۇرىنەن اعايىندى ايبەك, نۇربەك ورالباەۆتار, ءساناتالى, ءساماتالى تولتاەۆتار, ەركىن كۇرەستەن ەرعالي الىشەروۆ, گرەك-ريم كۇرەسىنەن اداي قۇرمانسەيىتوۆ, جەڭىل اتلەتيكادان رۋسلان نيكيتين, اۋىر اتلەتيكادان نۇرعيسا ادىلەت, ەسكەك ەسۋدەن يۆان لۋكيانوۆ سەكىلدى جاستار كەلىپ قوسىلدى. ولار بۇگىندە سپورتتىق جانە اسكەري مانساپتارىنىڭ باستاۋىندا تۇر. ۇلتتىق ۇلاننىڭ سپورتتىق-شتاتتىق كومانداسى بولاشاق چەمپيونداردى ۇلكەن ومىرگە جەتەلەيتىن ەرلىك پەن ەلجاندىلىقتىڭ مەكتەبى ىسپەتتى.
– سوندا حالىقارالىق ارەنالاردا نەمەسە ەل بىرىنشىلىكتەرىندە ەندى تانىلا باستاعان سپورتشىلاردى قابىلداپ, قولداۋ كورسەتەتىن بولىپ تۇرسىزدار عوي. بۇل كىمگە ءتيىمدى؟
– بۇل – بارشاعا ءتيىمدى. سەبەبى سپورتشى اسكەري انت قابىلداعان سوڭ, مەرزىمدى اسكەري قىزمەتشىلەردىڭ قاتارىنا قوسىلا وتىرىپ, سپورتتىق كارەراسىن ءارى قاراي جالعاستىرا بەرەدى. جوعارىدا اتى اتالعان سپورتشىلارمەن قاتار, قاتارىمىزدا ءجۇزۋشى دميتري بالاندين, قىسقى سپورت تۇرىنەن سەرجانت رومان كرەچ, كىشى سەرجانت دميتري رەيحەرد, لەيتەنانت يۋليا گالىشەۆا, ەفرەيتور ەكاتەرينا ايدوۆا, اعا لەيتەنانت گالينا ۆيشنەۆسكايا سەكىلدى كوپتەگەن ايگىلى دە تانىمال سپورتشىلار بار. ودان بولەك, ءبىزدىڭ سپورت كوماندامىزدىڭ قۇرامىندا الەمگە اتتارى ءماشھۇر سپورتشىلارىمىز گەنادي گولوۆكين, سەرىك ەلەۋوۆ, باقىت سارسەكباەۆ جانە مارقۇم, مانەرلەپ سىرعاناۋشى دەنيس تەن بولعان. كەزىندە بارلىعى ۇلتتىق ۇلان قاتارىندا وتان الدىندا انت قابىلداعان.
– وسى ۋاقىتقا دەيىن سپورتشىلارىمىز قانداي جەتىستىكتەرگە قول جەتكىزدى؟
– بايراقتى باسەكەلەردە توپ جارىپ, ەل نامىسىن ابىرويمەن قورعاپ جۇرگەن سپورتشىلارىمىز جايىندا اۋىز تولتىرىپ ايتا الامىز. 2016 جىلى ريو-دە-جانەيرودا وتكەن XXXI جازعى وليمپيا ويىندارىنان ەلىمىزدىڭ سپورتشىلارى زور تابىسپەن ورالدى. سول الەمدىك سايىسقا ۇلتتىق ۇلان سپورت كومانداسىنىڭ قۇرامىنان سپورتتىڭ 8 تۇرىنەن 25 سپورتشى قاتىستى. ساڭلاقتارىمىز دودادا ەل قانجىعاسىنا 6 مەدال (1 التىن, 3 كۇمىس, 2 قولا) سالدى. بۇل سول الەمدىك بايراقتى باسەكەدە ەلىمىزدىڭ بارلىق سپورتشىسى ەنشىلەگەن جۇلدەلەردىڭ 35%-ىن قۇرايدى. جالپى, تاۋەلسىزدىك العالى بەرى ۇلاندىق سپورتشىلار وليمپيا ويىندارىندا – 32 مەدال (8 التىن, 13 كۇمىس, 11 قولا), الەم چەمپيوناتتارىندا – 60 مەدال (27 التىن, 16 كۇمىس, 17 قولا), ازيا چەمپيوناتتارىندا 250-دەن استام مەدال جەڭىپ الىپتى.
