ونىڭ ايتۋىنشا, 2020 جىلدان باستاپ ستوماتولوگيالىق قىزمەت اقىسىن تولەۋ سحەماسى وزگەردى. بۇرىن قىزمەت اقىسى كونسۋلتاتيۆتىك-دياگنوستيكالىق قىزمەت كورسەتەتىن كلينيكاعا تىكەلەي اۋدارىلاتىن بولسا, بيىلدان باستاپ ەمحانالار ارقىلى تولەنەدى. ول ءۇشىن ەمدەۋ ۇيىمدارى اراسىندا قوسىمشا كەلىسىمشارت بەكىتىلەدى.
«ساقتاندىرۋ ەنگىزىلگەنگە دەيىن ستوماتولوگيالىق كومەك تەك پاتسيەنتتىڭ تىركەلگەن ەمحاناسى ارقىلى عانا كورسەتىلەتىن. جاڭا جۇيەنىڭ ارقاسىندا اتالعان ساناتتاعى ازاماتتار بۇل قىزمەتتى ەلىمىزدىڭ كەز كەلگەن جەرىندە پايدالانا الادى», دەدى تلەۋحان ابىلداەۆ.
مسق قالالىق فيليالى مالىمەتىنە سۇيەنسەك, ازاماتتاردىڭ جەكەلەگەن ساناتتارى, دالىرەك ايتقاندا, 18 جاسقا دەيىنگى بالالار مەن جۇكتى ايەلدەر امبۋلاتوريا دەڭگەيىندەگى ستوماتولوگيالىق كومەكتى ساقتاندىرۋ پاكەتى ارقىلى الا الادى. ولار: ءتىستى جانسىزداندىرۋ, پلومبا سالۋ, تەراپەۆتىڭ قابىلداۋى, پۋلپيت پەن پەريودونتيتتى ەمدەۋ, گيپوپلازيا مەن فليۋوروز سالدارىنان اناتوميالىق ءپىشىنى بۇزىلعان ءتىستى تولىق قالپىنا كەلتىرۋ سىندى تاعى دا باسقا قىزمەتتەردى پايدالانا الادى.
سونىمەن قاتار ءتىستى جۇلدىرۋ, ءتىل مەن ەرىن جۇگەنشىگىندەگى اقاۋدى جويۋ, جاقتى رەنتگەنگە ءتۇسىرۋ, انەستەزيا سىندى قىزمەتتەر دە وسى پاكەت شەڭبەرىندە كورسەتىلەدى. ال, شۇعىل ستوماتولوگيالىق كومەك بۇرىنعىشا مەملەكەت تاراپىنان كەپىلدەندىرىلگەن تەگىن مەديتسينالىق كومەك پاكەتىندە قالدىرىلدى.
شۇعىل كومەككە: 18 جاسقا دەيىنگى بالالار, جۇكتى ايەلدەر, ۇلى وتان سوعىسىنىڭ قاتىسۋشىلارى, 1,2,3 توپتاعى مۇگەدەكتەر, «التىن القا», «كۇمىس القا» يەلەنگەن كوپ بالالى انالار, اتاۋلى الەۋمەتتىك كومەك الۋشىلار, جاسىنا قاراي زەينەتكە شىققان زەينەتكەرلەر, جۇقپالى, الەۋمەتتىك ماڭىزى بار اۋرۋلار مەن قورشاعان ورتاعا قاۋىپ توندىرەتىن سىرقاتتارعا شالدىققان پاتسيەنتتەر جۇگىنە الادى.
