بالىق شارۋاشىلىعى كوميتەتى ءباسپاسوز قىزمەتىنىڭ اقپاراتىنا قاراعاندا, بالىق قورعاۋ اكتسياسى 1 ءساۋىر - 31 مامىردا اتىراۋ, ماڭعىستاۋ جانە باتىس قازاقستان وبلىستارى اۋماعىنداعى جايىق-كاسپي باسسەينىنىڭ سۋ ايدىندارىندا ءوتتى. اكتسيا كەزىندە بالىق قورعاۋ زاڭناماسىن بۇزۋدىڭ 1262 دەرەگىن انىقتالدى. ونىڭ ىشىندە اتىراۋدا – 952, ماڭعىستاۋدا – 137, باتىس قازاقستان وبلىسىندا 173 قۇقىق بۇزۋشىلىق تىركەلىپ وتىر.
«وسى كەزەڭدە 862 قۇقىق بۇزۋشى اكىمشىلىك جاۋاپكەرشىلىككە تارتىلدى. ونىڭ 114-ىنە سوت تارتىبىمەن 56 قىلمىستىق ءىس قوزعالدى. ءتارتىپ بۇزۋشىلارعا 15,4 ملن تەڭگە ايىپپۇل سالىندى. زاڭسىز اينالىمنان 35 توننادان استام بالىق تاركىلەندى. ونىڭ 4,6 تونناسى – بەكىرە تۇقىمداس بالىق تۇرلەرى. سونداي-اق, 908 اۋلاۋ, 95 ءجۇزۋ, 23 كولىك قۇرالى الىندى. جايىق-كاسپي باسسەينىنىڭ سۋ قويمالارىنان سينتەتيكالىق مونوجىپتەن دايىندالىپ, زاڭسىز ورناتىلعان 3035 اۋلاۋ قۇرالى تابىلدى», دەپ ءمالىم ەتتى بالىق شارۋاشىلىعى كوميتەتىنىڭ ءباسپاسوز قىزمەتىنەن.
بالىق قورعاۋ اكتسياسى كەزىندە بەكىرە تۇقىمداس بالىقتاردى زاڭسىز تاسىمالداعان, ساقتاعان دەرەكتەر دە بار.
«ماسەلەن, 15 ساۋىردە اتىراۋ وبلىسىنداعى جانباي اۋىلىنىڭ ماڭىندا جالپى سالماعى 100 كەلى بەكىرە تۇقىمداس بالىق تاسىمالداعان اۆتوكولىك ۇستالدى. سول كۇنى اتىراۋ قالاسىندا جەرگىلىكتى تۇرعىننان 812 كەلى 247 دانا بەكىرە تۇقىمداس بالىق تاركىلەندى. ال, 17 ساۋىردە «اقجايىق» مەملەكەتتىك تابيعي رەزەرۆاتىنىڭ اۋماعىنداعى تىيىم سالىنعان جەردە كاسىپشىلىك بالىق اۋلاۋدى جۇزەگە اسىرعان 2 ادام انىقتالدى. شاعىن كولەمدى كەمەنى تەكسەرۋ كەزىندە 2,2 توننا بالىق تابىلىپ, تاركىلەندى. ۇستالعان ادامدارعا تيەسىلى سۋدان اۋلاۋ قۇرالى (ۆەنتەر) الىندى. ماڭعىستاۋ وبلىسىنىڭ فورت-شەۆچەنكو قالاسىندا 26 ساۋىردە 148,55 كەلى بەكىرە تۇقىمداس بالىقتى زاڭسىز تاسىمالداعان جەرگىلىكتى تۇرعىننىڭ باسقارۋىنداعى اۆتوكولىك توقتاتىلدى» دەپ حابارلادى كوميتەتتىڭ ءباسپاسوز قىزمەتى.
ال, باتىس قازاقستان وبلىسىندا رۇقسات قۇجاتتىنسىز بالىق تاسىمالداعان 16 اۆتوكولىك جۇرگىزۋشىسى ۇستالىپتى. وسىنداي ءىس-شارالاردىڭ ناتيجەسىندە 15 تونناعا جۋىق بالىق تاركىلەنىپ, 15 قىلمىستىق ءىس قوزعالىپ وتىر.
اكتسيا كەزىندە بازارلار مەن مامانداندىرىلعان دۇكەندەردە سينتەتيكالىق مونوجىپتەن جاسالعان بالىق اۋلاۋ قۇرالدارىنىڭ زاڭسىز ساتىلۋىنا مونيتورينگ جۇرگىزىلدى. ونىڭ ناتيجەسىندە 29 ساۋىردە اتىراۋ قالاسىنداعى بازارلاردىڭ بىرىندە تىيىم سالىنعان 79 اۋلاۋ قۇرالىن ساتۋ دەرەگى انىقتالىپ, ءتارتىپ بۇزۋشىعا قر اكىمشىلك قۇقىقبۇزۋشىلىق تۋرالى كودەكسىنىڭ 196-بابىمەن 72,9 مىڭ تەڭگە ايىپپۇل سالىندى.
