«ەرتەڭ ءبىزدىڭ كاسىبي مەرەكەمىز – دۇنيەجۇزىلىك قورشاعان ورتا كۇنى اتالىپ وتەدى. بۇل ءبىزدىڭ مەرەكەمىز عانا ەمەس, قورشاعان ورتانى قورعاۋعا ۇلكەن ۇلەس قوسىپ جۇرگەندەرگە ورتاق كۇن. 5 ماۋسىمنىڭ دا كەزدەيسوق تاڭدالماعانىن اتاپ وتكىم كەلەدى. 1972 جىلى 5 ماۋسىمدا ستوكگولم كونفەرەنتسياسى ءوز جۇمىسىن باستاعان ەدى. ونداعى نەگىزگى ماسەلەلەردىڭ ءبىرى – قورشاعان ورتانى قورعاۋ سالاسىنداعى حالىقارالىق ساياساتتى ازىرلەۋ بولدى. وسىعان بايلانىستى بۇۇ باس اسسامبلەياسى 5 ماۋسىمدى قورشاعان ورتا كۇنى دەپ بەلگىلەيتىن قارار قابىلدادى. بۇل قاراردا ەكولوگيالىق پروبلەمالار, قورشاعان ورتانى تازارتۋعا شاقىرۋ تۋرالى كوپ ايتىلادى», دەدى ەكولوگيا ءمينيسترى حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىندا وتكەن جاستارمەن كەزدەسۋدە.
جىل سايىن دۇنيەجۇزىلىك قورشاعان ورتانى قورعاۋ كۇنىنىڭ ارنايى تاقىرىبى مەن ۇرانى بەلگىلەنەدى. بيىلعى تاقىرىپ – «قايتا قاراستىرۋ, قايتا قۇرۋ جانە قالپىنا كەلتىرۋ» بولماق. ءمينيستردىڭ ايتۋىنشا, ءبىز دە قازىر قايتا قاراستىرۋ كەزەڭىندە تۇرمىز.
«سوڭعى جىلدارى تازا اۋا, قورشاعان ورتانى قورعاۋ تاقىرىبىنا بەي-جاي قارامايتىن قاراپايىم ازاماتتاردىڭ ەكولوگيا تاقىرىبىن بەلسەندى كوتەرىپ جۇرگەندەرى ءبىزدى قاتتى قۋانتادى. پاندەميا كەزىندە پلانەتا ءبىراز دەمالدى, بۇل بىزگە تابيعاتتىڭ ءرولى مەن ادامنىڭ ورنىن قايتا قاراستىرۋىمىز كەرەگىن كورسەتەدى», دەدى ماعزۇم مىرزاعاليەۆ.
كەزدەسۋ بارىسىندا مينيستر ەلدەگى باسا ءمان بەرىلۋى قاجەت ەكى ماڭىزدى پروبلەمانى اتاپ ءوتتى.
«تازا اۋا جانە قالدىقتاردىڭ از وڭدەلۋى ماسەلەلەرى وزەكتى بولىپ وتىر. ءبىزدىڭ اينالامىزدا ۇشىپ جۇرگەن پاكەتتەر, لاستانعان ساياباقتار وتە كوپ. ءبىز دە قازىر بەلگىلى ءبىر قايتا ءمان بەرۋگە, قايتا قاراستىرۋعا كەلە جاتىرمىز. تاعى ءبىر ءۇشىنشى ماسەلە – كليماتتىڭ وزگەرۋى دە وتە كوپ اسەر ەتەدى. ورتالىق ازيا ءوڭىرى جاھاندىق كليماتتىق وزگەرىستەرگە, جاھاندىق تەمپەراتۋرانىڭ كوتەرىلۋىنە اناعۇرلىم بەيىم بولادى. سوڭعى 100 جىلدا قازاقستاندا تەمپەراتۋرا 1,37 گرادۋسقا كوتەرىلگەن. وكىنىشكە قاراي سوڭعى جىلدارى تەمپەراتۋرانىڭ جوعارىلاۋ ءۇردىسى جىلدام جۇرۋدە. ءبىز ءۇشىن بۇل – كۇردەلى سىن-قاتەر. ءبىزدىڭ اۋماق شولەيتتەنۋگە, جەردىڭ توزۋىنا تەز ۇشىرايدى. سۋ رەسۋرستارىنىڭ بولۋى دا اسا ماڭىزدى. بىزدەگى بارلىق سۋدىڭ جارتىسىنا جۋىعى سىرتتان كەلەدى. وسىلايشا, بارلىق كليماتتىق وزگەرىستەر سۋدىڭ قولجەتىمدى بولۋىنا اسەر ەتەدى», دەپ تۇيىندەدى مينيستر.
