«مەملەكەتتىك رامىزدەر كۇنى ءاربىر شىنايى پاتريوت, ءوز ەلىنىڭ ۇلانى ءۇشىن ەرەكشە قاستەرلى مەرەكە. بيىلعى مەرەكەنىڭ تاۋەلسىزدىگىمىزدىڭ 30 جىلدىعى اتالىپ وتەتىن مەرەيلى جىلعا كەلۋى ونىڭ ماعىناسىن ايشىقتاي تۇسەدى. ال وسى ۋاقىتتا جاستار فورۋمىن وتكىزۋ - سيمۆوليكالىق تۇرعىدان دا, تاربيەلىك جاعىنان دا ايرىقشا مانگە يە ءىس-شارا. بايتاق ەلىمىزدىڭ تۇكپىر-تۇكپىرىنەن جينالعان پىكىرلەس, نيەتتەس, ناعىز پاتريوت جاستاردى كورگەنىمە وتە قۋانىشتىمىن. وزدەرىڭىز بىلەتىندەي, وسىدان 29 جىل بۇرىن ەلىمىزدە تۇڭعىش رەت مەملەكەتتىك رامىزدەر قابىلدانعان بولاتىن. تۋ, ەلتاڭبا جانە ءانۇران حالىقتىڭ ارمانى مەن مۇراتىن, دارحاندىعى مەن دارالىعىن, الەۋمەتى مەن مۇمكىندىگىنىڭ جيىنتىق كورىنىسى. مەن بارشاڭىزدى بۇگىنگى قر مەملەكەتتىك رامىزدەر كۇنىمەن شىن جۇرەكتەن قۇتتىقتايمىن», دەدى باۋىرجان بايبەك.
ول بۇگىندە قازاقستان تۇراقتى دامىپ, وركەن جايعان مەملەكەت ەكەندىگىن باسا ايتتى.
«سىزدەر - تاۋەلسىز قازاقستاننىڭ وسكەلەڭ ۇرپاعى وتانىمىزدى, بىرەگەي جولىمىزدى, ەكونوميكامىزدى وركەندەتۋگە تەرەڭ ءبىلىم, قاجىرلى ەڭبەك, ءوزارا ورتاق ماقساتقا جۇمىلۋ ارقىلى ۇلەس قوساسىزدار دەپ الدىڭعى بۋىن ۇلكەن سەنىم ارتادى. ەلباسى نۇرسۇلتان نازارباەۆ ءبىر سوزىندە: ء«بىز تاۋەلسىزدىككە اسا زارىعىپ جەتتىك. ەندى سول تاۋەلسىزدىكتىڭ قاسيەتتى بەلىگىلەرىن دە ەرەكشە قادىرلەۋمىز, قاستەرلەۋىمىز كەرەك. ءاربىر ازامات قازاقستاننىڭ تۋىن, ەلتاڭباسىن, ءانۇرانىن تۇمارداي قاسيەت تۇتۋى قاجەت. ەلدىگىمىزدىڭ سىنالاتىن تۇسى دا وسى» دەگەن ەدى. تۇڭعىش پرەزيدەنتىمىزدىڭ وسىناۋ ۇلاعاتتى ءسوزىن ەلىمىزدىڭ ءاربىر ازاماتى جۇرەك تۇكپىرىندە ساقتاپ, اركەز جادىندا ۇستاپ, ورىنداۋى قاجەت. جاستار ەرتەڭگى جارقىن بولاشاعىمىز عانا ەمەس, الەمدىك دەڭگەيدەگى بۇگىنگى باسەكەگە قابىلەتتىلىگىمىزدىڭ دە نەگىزى. سىزدەردىڭ ءبىلىم الىپ, جان-جاقتى دامۋلارىڭىز, ازامات بولىپ قالىپتاسۋىڭىز ءۇشىن جاعداي جاساۋ, مەملەكەتتىك ساياساتتىڭ دا Nur Otan پارتياسىنىڭ دا نەگىزگى باسىمدىعى», دەدى پارتيا توراعاسىنىڭ ءبىرىنشى ورىنباسارى.
