ۋىلدىرىق شاشۋ كەزىندە تىيىم سالىنعان بالىق ءوسىرۋ ورىندارىندا جانە ەرەكشە قورعالاتىن تابيعي اۋماقتاردا بالىقتى زاڭسىز اۋلاۋعا جول بەرمەۋ ءۇشىن 16 ءساۋىر مەن 30 مامىر ارالىعىندا «ۋىلدىرىق-2021» جەدەل الدىن الۋ ءىس-شاراسى وتكەن. وعان جۇمىلدىرىلعان پوليتسەيلەر ەكولوگيالىق قىلمىستاردى, ونىڭ ىشىندە بۇرىن جاسالعان قىلمىستاردى اشۋ ماقساتىندا جۇمىس ىستەدى. ولار قىلمىستىڭ الدىن الىپ قانا قويماي, وزەن-كولدەردەگى بالىق قورىن ساقتاپ قالۋعا ەلەۋلى ۇلەس قوستى. ايتپەسە, سۋ جاعالاپ جۇرگەن براكونەرلەر از ەمەس ەدى.
– تابيعات قورعاۋ پوليتسياسىنىڭ بولىمشەلەرى بالىق رەسۋرستارىن قورعاۋ ماقساتىندا كۇن سايىن رەيدتىك ءىس-شارالار وتكىزىپ, ناتيجەسىندە 316 قۇقىق بۇزۋشىلىقتى انىقتادى. جەدەل الدىن الۋ ءىس-شاراسى بارىسىندا براكونەرلەر 2 توننادان استام بالىق اۋلاپ, مەملەكەتكە كەلتىرىلگەن زالال 3 ملن تەڭگەدەن استى. 300-گە جۋىق ءتارتىپ بۇزۋشى اكىمشىلىك جاۋاپكەرشىلىككە تارتىلدى, – دەدى وبلىستىق پوليتسيا دەپارتامەنتىنىڭ باستىعى ساعات ماديەۆ.
رەيد كەزىندە وزەن-كولدەردىڭ جاعالاۋىنان 56 قىلمىس قۇرالى (سينتەتيكالىق تورلار, بالىق ۇستاۋعا ارنالعان شانىشقى, سۇزگىشتەر, ت.ب.) تاركىلەنىپ, 3760 مەتر اۋ تابىلدى. اتالعان فاكتىلەر بويىنشا اكىمشىلىك قۇقىق بۇزۋشىلىق تۋرالى كودەكستىڭ 383-بابىنىڭ 3-بولىگى (بالىق
اۋلاۋ جانە بالىق رەسۋرستارى مەن باسقا دا سۋ جانۋارلارىن قورعاۋ ەرەجەلەرىن بۇزۋ) بويىنشا 9 ماتەريال سوتقا جولداندى. قىلمىستىق كودەكستىڭ جابايى جانۋارلار مەن وسىمدىكتەردىڭ تۇرلەرىن, ولاردىڭ بولىكتەرىن نەمەسە دەريۆاتتارىن زاڭسىز ساتىپ الۋ, وتكىزۋ, تاسىمالداۋ, اكەلۋ, اكەتۋ, ساقتاۋ جونىندەگى 6-بابى جانە 335-بابى (بالىق رەسۋرستارىن, باسقا دا سۋ جانۋارلارى مەن وسىمدىكتەرىن زاڭسىز ءوندىرۋ) بويىنشا 7 زاڭ بۇزۋشىلىق فاكتىلەرى انىقتالدى.
براكونەرلىك وقيعالارىنىڭ ءبىرى وسى جىلدىڭ 19 مامىرىندا بۇقتىرما سۋ قويماسىنىڭ جاعاسىندا بولدى. تابيعاتتى قورعاۋ پوليتسياسى ءبولىمىنىڭ قىزمەتكەرلەرى التاي اۋدانى وكتيابر كەنتىنىڭ 1992 جانە 1977 جىلعى ەكى تۇرعىنىن ۇستادى. تەكسەرۋ كەزىندە ۇستالعانداردىڭ بىرىنە تيەسىلى «Mitsubishi» اۆتوكولىگىندە موتورى بار اليۋميني قايىق جانە 179 كيلو ريپۋس بالىعى تابىلدى. اقشاعا شاققاندا, مەملەكەتكە 874 750 تەڭگەنىڭ شىعىنى كەلتىرىلگەن. اتالعان فاكت بويىنشا قىلمىستىق كودەكستىڭ 335-بابى 1-بولىگى بويىنشا سوتقا دەيىنگى تەرگەۋ باستالدى.
قۇقىق قورعاۋ ورگاندارىنىڭ مالىمەتىنشە, تاركىلەنگەن بالىق ارنايى قابىلداۋ ورنىنا تاپسىرىلادى. ال ساتۋدان تۇسكەن تابىس مەملەكەت قازىناسىنا اۋدارىلادى.
شىعىس قازاقستان وبلىسى
