– قازاقستان مەن ارمەنيا اراسىندا تاريحي تۇرعىدان جاقسى قارىم-قاتىناس قالىپتاستى. تاۋەلسىزدىك جىلدارىندا مەن ارمەنيانىڭ بارلىق پرەزيدەنتتەرىمەن ارىپتەستىك بايلانىستا بولدىم. ءبىزدىڭ ەلدەر اراسىندا شەشىمىن تاپپاعان ماسەلە جوق. قازىر ارمەنياداعى جاعداي كۇردەلى ەكەنىن بىلەمىن, – دەدى ەلباسى.
نۇرسۇلتان نازارباەۆ ارمەنيا, ازەربايجان جانە رەسەي كوشباسشىلارى اراسىندا 2020 جىلى 9 قاراشادا قول جەتكىزىلگەن ۋاعدالاستىق ەرەۆان مەن باكۋ اراسىنداعى بارلىق تۇيتكىلدى ماسەلەلەردى شەشۋگە جول اشاتىنىنا سەنىم ءبىلدىردى.
ارمەنيا پرەزيدەنتى ارمەن ساركيسيان قازاقستاننىڭ تۇڭعىش پرەزيدەنتىنە قوناقجايلىق تانىتىپ, ماڭىزدى ماسەلەلەردى تالقىلاۋعا مۇمكىندىك بەرگەنى ءۇشىن العىس ايتتى.
– ءبىز جاقسى ءارى جاقىن قارىم-قاتىناستامىز. بۇل شىن مانىندە سولاي. ۇزاق جىلدان بەرى قازاقستاندا ارميان قاۋىمى باقۋاتتى ءومىر ءسۇرىپ جاتىر. ءبىزدىڭ دوستىعىمىزدىڭ ارمەنيا رەسپۋبليكاسىمەن قاتار, بارشا ارميان ۇلتى ءۇشىن دە ماڭىزى زور, – دەدى ا.ساركيسيان.
