بۇل شەشىم پرەزيدەنت لۋكاشەنكومەن ەكى كۇنگە سوزىلعان كەلىسسوز ناتيجەسىندە قابىلداندى. كەلىسسوز سوچيدە قارا تەڭىزدەگى كەمەلەردىڭ بىرىندە ءوتتى.
بۇل قاراجات ماسكەۋدىڭ بەلارۋسكە ەكىجاقتى قارىم-قاتىناستى نىعايتۋ, سەرىكتەستىكتى دامىتۋ ماقساتىندا قارىزعا بەرىلەتىن 1,5 ملرد اقش دوللاردىڭ ءبىر بولىگى. مينسك بۇل كەلىسىمنىڭ ءبىرىنشى بولىگىن, ياعني 500 ملن دوللاردى قازان ايىندا العان ەدى. ەندى ەكىنشى ترانشتى ماۋسىمعا دەيىن الىپ ۇلگەرەتىنى ءمالىم بولدى.
پۋتين بولسا, ەۋروپالىق ارىپتەستەرىنىڭ ۇشاققا قاتىستى وقيعاعا جاۋابىن سىنعا الدى. پرەزيدەنتتىڭ ويىنشا, بۇل – ەموتسياعا بەرىلىپ جاسالعان ارەكەت. رەسەي ءوز كەزەگىندە, كەرىسىنشە, بەلارۋسكە قاتىنايتىن ۇشاقتار سانىن ارتتىرماق. كرەملدىڭ ءباسپاسوز حاتشىسى دميتري پەسكوۆ: «بۇل شەشىم بەلارۋسكە سانكتسيا سالدارىنان كەلەتىن شىعىندى ازايتۋعا كومەكتەسپەك», دەيدى.
ەكى كۇنگە سوزىلعان كەمەدەگى كەزدەسۋدە پۋتين مەن لۋكاشەنكو اۋە قاتىناسى مەن «بەلاۆيا» كومپانياسىنىڭ ۇشاتىن باعىتتارىن تالقىلادى. ەكى ەلدىڭ كولىك مينيسترلىكتەرى اۋە قاتىناسىنىڭ جاڭا جوسپارىن دايىندايتىن بولدى. «بەلاۆيانىڭ» ەلگە ورالۋ باعىتىن قايتا قاراستىرۋ كەرەك. ول ءۇشىن بارلىق مۇمكىن باعىتتار ەسەپكە الىنادى», دەدى رەسەي تاراپى.
سونىمەن قاتار دميتري پەسكوۆ پرەزيدەنتتەر ۇشاقتا بولعان پروتاسەۆيچ پەن ساپەگانىڭ دا جايىن تالقىلادى. د.پەسكوۆ بۇل تاقىرىپتى ۆلاديمير پۋتين ءوزى كوتەرگەنىن, رەسەي ازاماتى ساپەگانىڭ تاعدىرى ولاردى بەيجاي قالدىرمايتىنىن حابارلادى.
«كرەمل ساپەگانىڭ بەلارۋستە تۇرۋعا رۇقساتى بارىن ەندى ءبىلدى. دەگەنمەن ءبارى زاڭ اياسىندا شەشىلۋى كەرەك. پرەزيدەنت پۋتين سىرتقى ىستەر مينيسترىنە ازاماتىمىزدىڭ ءىسىن باقىلاۋعا الىپ, نازاردان شىعارماۋ جونىندە تاپسىرما بەردى», دەدى د.پەسكوۆ.
