ونلاين فورماتتا وتكەن ءباسپاسوز ءماسليحاتى بارىسىندا شقو تۋريزم جانە سىرتقى بايلانىستار باسقارماسىنىڭ باسشىسى مارات قاباقوۆ جىل باسىنان بەرى كاسىپكەرلەر جاز ايلارىندا دەمالىس بازالارىنا كەلەتىن تۋريستەردەن پتر انىقتاما تالاپ ەتپەۋ تۋرالى ءوتىنىش جاساعانىن ايتتى. وسىلايشا, كەلۋشىلەردى ورنالاستىرۋ بويىنشا بىرقاتار ەرەجە بەكىتىلگەن. ناقتى ايتقاندا, «Ashyq» جۇيەسىندە «كوك» جانە «جاسىل» مارتەبەسى بار تۋريستەر ەش قيىندىقسىز دەمالىس ورنىنا بارا الادى. سونىمەن قاتار پتر انىقتامامەن نەمەسە ۆاكتسيناتسيا تاپسىرعانىن راستايتىن پاسپورتپەن كەلۋگە بولادى.
«ال «سارى» جانە «قىزىل» مارتەبەسى بار دەمالۋشىلارعا تۋريستىك-ساۋىقتىرۋ ورىندارىنا بولۋعا تىيىم سالىنعان. دەمالىس بازالارىندا كوروناۆيرۋستى جاپپاي جۇقتىرۋ جاعدايلارىن بولدىرماۋ ءۇشىن الەۋمەتتىك اراقاشىقتىق قاتاڭ ساقتالۋى قاجەت. سونداي-اق ادامدار كوپ شوعىرلانعان جەرلەردە كۇندەلىكتى پروفيلاكتيكالىق دەزينفەكتسيا جۇرگىزىلەدى. مونيتورينگتىك توپتار سانيتارلىق-ەپيدەميولوگيالىق تالاپتاردىڭ ساقتالۋىن جۇيەلى تۇردە تەكسەرۋدى جوسپارلاپ وتىر», دەدى شقو سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى عالىمبەك الين.
شقو كاسىپكەرلەر پالاتاسىنىڭ ديرەكتورى قايرات مامىرباەۆتىڭ ايتۋىنشا, بۇگىندە الاكول جاعالاۋىنداعى 188 دەمالىس بازاسىنىڭ 153-ءى سانيتارلىق-ەپيدەميولوگيالىق باقىلاۋ دەپارتامەنتىنىڭ قورىتىندىسىن العان. ال Ashyq جوباسىنا توعىز دەمالىس بازاسى قوسىلىپ ۇلگەردى.
