پوليتسيا دەپارتامەنتىنىڭ مالىمەتىنشە, اپات 27 مامىردا ساعات 14-تە شولوحوۆ پەن تيۋلەنين كوشەلەرىنىڭ قيىلىسىندا بولعان. سوقتىعىسۋ ناتيجەسىندە جەدەل جاردەم كولىگى ءبىر بۇيىرىنە قاراي اۋدارىلعان.
«وقيعا ورنىندا پوليتسيا قىزمەتكەرلەرى جۇمىس ىستەپ جاتىر. Toyota Alphard جەدەل جاردەم كولىگىمەن سوقتىعىستى. اپاتتىڭ ءمان-جايى انىقتالادى», دەپ حابارلادى پوليتسيا وكىلدەرى.
وبلىستىق دەنساۋلىق ساقتاۋ باسقارماسى وكىلى دە اپاتقا قاتىستى ءمان-جايدى حابارلادى.
«بايتەرەك اۋدانى دارينسكايا اۋرۋحاناسىنىڭ سانيتار كولىگى جول اپاتىنا ۇشىرادى. وندا جۇكتى ايەل مەدبيكەمەن بىرگە كارديولوگيالىق ورتالىققا بارا جاتقان. ارنايى كولىكتە سيرەنا قوسىلىپ تۇرعان. بىراق جۇرگىزۋشىلەردىڭ ءبىرى جەدەل جاردەم كولىگىنە جول بەرمەي اپات بولدى», دەدى بقو دەنساۋلىق ساقتاۋ باسقارماسىنىڭ ءباسپاسوز قىزمەتىندەگىلەر.
وبلىستىق دەنساۋلىق ساقتاۋ باسقارماسى وكىلدەرى جۇكتى ايەل مەن مەدبيكە كىشىگىرىم جاراقات العانىن ايتتى. ناۋقاس وبلىستىق پەريناتالدىق ورتالىققا جەتكىزىلگەن. ىشتەگى بالا زارداپ شەككەن جوق. ايەل جۇكتىلىكتىڭ 35-ءىنشى اپتاسىندا بولعان. ول جاعىمسىز سالداردىڭ الدىن الۋ ءۇشىن اۋرۋحاناعا جاتقىزىلدى.
