«سىيىنۋشىنىڭ قولى» كارتيناسى – ديۋرەردىڭ ماتتياس گريۋنەۆالدپەن بىرلەسە جازعان اتاقتى دومينيكاندىق موناستىر تريپتيحىنە دايىندىق بارىسىندا, ياكي جاتتىعۋ رەتىندە جازعان دۇنيەسى. ايتسە دە تۋىندى ءوزى كۇتپەگەن جەتىستىككە جەتتى. شابىت ۇستىندە اۆتور جالبارىنعان ادامنىڭ قولدارىن جانە كارتيناعا جان بىتىرگەن بارلىق نوبايلاردى كەرەمەت ونەر تۋىندىسىنا اينالدىرادى. بۇل ونىڭ ءوز قولى ەدى.
البرەحت ديۋرەر ءۇشىن قولدى اناتوميالىق دالدىكپەن بەينەلەۋ ماڭىزدى بولدى. شەبەر «مودەل» رەتىندە سول قولىن العان... ءيا, بۇل ونىڭ سول قولى. سۋرەتتە شەبەردىڭ ءبىر قولىن عانا تولىق كورەمىز, ال وڭ قولى اينا ارقىلى بەرىلگەن. زەرتتەۋشىلەردىڭ ايتۋىنشا, كارتيناداعى كەسكىن البرەحتتىڭ اعاسىنىڭ قولدارى بولۋى مۇمكىن. بۇگىندە ءارتۇرلى بولجام ايتىلادى.
كارتينانىڭ تولىق نۇسقاسىندا قولداردان باسقا, ۇلكەن پاراقتا ناماز وقىعان ءمۇريدتىڭ باسى دا سالىنعان بولاتىن. كەيىنىرەك سۋرەت الدەبىر سەبەپتەرمەن ەكىگە بولىنەدى. اۆتور ءوزىنىڭ بارلىق «جاتتىعۋ سىزبالارىن» قانداي دا ءبىر پاراق تۇرىندە ساقتاپ, كەيىننەن وڭدەلگەن ەلەمەنتتەردى باسقا كارتينالاردا قولدانعان.
«سىيىنۋشىنىڭ قولى» – ا.ديۋرەردىڭ شىعارماشىلىعىنىڭ ەڭ تانىمال ءموتيۆى. سۋرەت كوپتەگەن رەپرودۋكتسياعا يە بولىپ قانا قويماي, ءتىپتى مۇسىندىك فورمادا, سونداي-اق شاعىن رەلەفتەر تۇرىندە اقش-تا كەڭ تارالعان.
سۋرەت كوركەمدىك قۇندىلىعىمەن قاتار, دۇعا ەتۋدىڭ, كوڭىل ايتۋدىڭ جانە جالپى ءدىني قاتىناستىڭ سيمۆولى رەتىندە ۇلكەن تابىنۋشىلىق مانگە يە. سونىسىمەن قۇندى ءھام ەرەكشە.
اۆتور لاكونيكالىق سۋرەتتى كوك ءتۇستى قاعازعا جازىپ, ونى اق جانە سۇر بوياۋمەن سىرلاعان. ايتسە دە ودان تۋىندىنىڭ مادەني ءھام ءدىني ماعىناسى وزگەرمەيدى. مۇندا قارتايعان ادامنىڭ اجىمدەرى مەن تامىرلارى كوزگە وتتاي باسىلادى. بەلگىلى ءبىر سيپاتتاعى ديناميكادا بويالعان قولدار وقىرماننىڭ تاڭدانىسىن تۋدىرادى. سوندىقتان بۇل سۋرەتتى الەمدىك مۇرانىڭ ماڭىزدى شىعارمالارى قاتارىنا قوسۋعا بولادى.
