ساپاردىڭ ءبىرىنشى كۇنى ا.تسوي سەمەي قالاسىنىڭ №6 ارالاس ۇلگىدەگى ەمحاناسىنا باردى. ەمحانادا العاشقى مەديتسينالىق-سانيتارلىق كومەكتى جانە كونسۋلتاتسيالىق-دياگنوستيكالىق كومەكتى قامتيتىن امبۋلاتوريالىق-ەمحانالىق كومەك كورسەتىلەدى. مەديتسينالىق ۇيىمعا 44 685 مىڭ ادام تىركەلگەن, اۋىسىمىنا 400 پاتسيەنت بارادى. مەديتسينالىق ۇيىمنىڭ قۇرىلىمىندا كلينيكالىق-دياگنوستيكالىق زەرتحانا, فۋنكتسيونالدىق دياگنوستيكا كابينەتى, ۋدز كابينەتى, DOTS تەراپيا, فيزيوتەراپيا كابينەتى, فليۋوروكارتوتەكا جانە باسقالارى بار.
سونىمەن قاتار 1 اقپاننان باستاپ ەمحانا بازاسىندا ۆاكتسينالاۋ پۋنكتتەرى اشىلدى. پۋنكت قاجەتتى توڭازىتقىش جانە بارلىق قاجەتتى جابدىقتارمەن جابدىقتالعان.
«قىسقا مەرزىمدە قازاقستان رەسپۋبليكاسىندا حالىقتى جاپپاي ۆاكتسينالاۋ ءۇشىن ەلىمىزدىڭ بارلىق ەمحانالارى مەن ءىرى ساۋدا ورتالىقتارىندا 1400 ۆاكتسينالاۋ پۋنكتى اشىلدى. ونىڭ ىشىندە اۋىل حالقى ءۇشىن 300 جىلجىمالى مەديتسينالىق كەشەن بار. 11 مىڭنان استام مەديتسينا قىزمەتكەرى ۆاكتسينالاۋ ناۋقانىنا تارتىلدى. 24 مامىرداعى جاعداي بويىنشا وڭىرلەردە ۆاكتسينالاردىڭ ءبىرىنشى كومپونەنتىنىڭ شامامەن 350 مىڭ دوزاسى جانە ەكىنشى كومپونەنتتىڭ شامامەن 681 مىڭ دوزاسى بار. ۆاكتسينانى جەتكىزۋ كەستەگە سايكەس جۇزەگە اسىرىلادى», دەدى ا.تسوي.
سونىمەن قاتار مينيستر الداعى ۋاقىتتا ۆاكتسينالاۋ قارقىنى ازاماتتاردىڭ وزدەرىنىڭ سانالى كوزقاراسىنا, ولاردىڭ جاقىندارىنىڭ دەنساۋلىعى مەن جالپىعا ورتاق يممۋنيتەت پايداسىنا دۇرىس تاڭدالۋىنا بايلانىستى بولاتىنىن اتاپ ءوتتى.
ساپاردىڭ ەكىنشى كۇنى مينيستر «InVitro+» كونسۋلتاتيۆتىك-دياگنوستيكالىق ەمحاناسىندا بولدى. 2021 جىلى سالىنعان جاڭا مەديتسينالىق مەكەمەدە زەرتحانالىق دياگنوستيكا جانە مەديتسينالىق وڭالتۋ بويىنشا كوپتەگەن مەديتسينالىق قىزمەت كورسەتىلەدى. «InVitro+» كدك – سەمەي قالاسىنداعى ءىرى مەديتسينالىق ورتالىق, وندا زەرتحانالىق دياگنوستيكا, ينفاركت پەن ينسۋلتتان كەيىن وڭالتۋ, سونداي-اق ۋرولوگيالىق جانە ەندوكريندىك اۋرۋلاردى ەمدەۋ سالاسىندا مول پراكتيكالىق تاجىريبەسى بار ماماندار جۇمىس ىستەيدى.
بۇدان ءارى ا.تسوي يادرولىق مەديتسينا ورتالىعىنا باردى, وندا قاتەرلى اۋرۋلاردى دياگنوستيكالاۋدان باستاپ راديكالدى ەمدەۋدەن كەيىن ونكولوگيالىق ناۋقاستى وڭالتۋعا دەيىنگى تولىق تسيكلدى كەشەندى مۋلتيديستسيپلينارلىق ءتاسىل قولدانىلادى, سونداي-اق پاللياتيۆتىك كومەك جۇزەگە اسىرىلادى.
كەلەسى نىسان شىعىس قازاقستان وبلىسىنىڭ اياگوز اۋدانارالىق اۋرۋحاناسى بولدى. اۋرۋحانا تولىعىمەن قايتا جاڭعىرتىلىپ, سوڭعى ۇلگىدەگى مەديتسينالىق جابدىقتارمەن (كت, انگيوگراف, وڭالتۋ جابدىقتارى جانە ت. ب.) جابدىقتالعان.
اۋدانارالىق اۋرۋحانادا تۇرعىندار ينسۋلت, ينفاركت جاعدايىندا قاجەتتى بىلىكتى كومەك الادى, مۇندا جەدەل ارالاسۋ جۇرگىزىلەدى, بوسانۋ جانە ت.ب. قابىلدانادى. ەندى ناۋقاستاردى 360 شاقىرىم قاشىقتىقتا ورنالاسقان سەمەي قالاسىنا قايتا جىبەرۋدىڭ قاجەتى جوق.
جالپى, دەنساۋلىق ساقتاۋ ءمينيسترى كوۆيدكە قارسى ءىس-شارالاردى ۇيىمداستىرۋ دەڭگەيىن جانە جالپى حالىققا مەديتسينالىق كومەك كورسەتۋ تاسىلدەرىن جوعارى باعالادى.
شىعىس قازاقستان وبلىسى
