ماسەلەنىڭ ءمانىسى مىنادا. كامماراتا كەنتىندە تۇرعىندار باسقا جاققا كوشىپ, قاڭىراپ قالعان پاتەرلەر كوپ. ءبىر كەزدەرى داڭقى توسكە ورلەگەن ەلدى مەكەندى قايتا جانداندىرۋ ءۇشىن جەرگىلىكتى بيلىك قالاعاندارعا باسپانانى تەگىن بەرۋگە ۋادە ەتتى.
وكىنىشكە قاراي, بۇل باستاما سوڭىنا دەيىن جەتكەن جوق. بىرىنشىدەن, داڭعاراداي ءۇيدىڭ قۇنى سيمۆوليكالىق 1 ەۋرو ەكەنىن ەلدىڭ ءبارى ەستىدى. سودان كەيىن اپەننين تۇبەگىنىڭ تۇكپىر-تۇكپىرىنەن كامماراتاعا اعىلعاندار كوبەيدى. ءۇي الۋعا ءوتىنىش بىلدىرگەندەر قاراسى كوبەيدى.
قالا اكىمشىلىگى مۇندايدى كۇتپەسە كەرەك. كەلىپ تۇسكەن ءوتىنىشتىڭ ءبارىن قاراپ شىعۋعا ۋاقىت تاپشى بولدى. ءارى ونىڭ ءبارىن باقىلاپ شىعاتىنداي قىزمەتكەرلەر دە جوق ەدى.
ەكىنشىدەن, كامماراتا بيلىگى ەندى-ەندى ەس جيعاندا كوروناۆيرۋس داعدارىسى باستالدى. قىتايدان كەيىن وسى يتاليادا ۆيرۋس ءورشىپ, بۇكىل ەۋروپانى مازالاعانى ءمالىم. سونىڭ سالدارىنان جوبا توقتاپ قالدى دا, بىردە-ءبىر باسپانا بەرىلگەن جوق.
«حالىقتىڭ ىقىلاسىنا راحمەت, قازىر ءوتىنىش وتە كوپ. كامماراتا – وتە عاجايىپ قالا. سيتسيليانىڭ ىشكى جاعىنا سالىنعان تەرراسا سەكىلدى. مۇندا ارالدىڭ بۇكىل عاجايىبىنا كۋا بولاسىز. ءتىپتى بىرنەشە شاقىرىم قاشىقتا جاتقان ەتنا جانارتاۋى دا وسى جەردەن انىق كورىنەدى. مۇندا كەلگەننىڭ ءبارى قالاعا عاشىق بولادى. وكىنىشكە قاراي, پاندەميا سالدارىنان جوبا توقتاپ قالدى», دەيدى كەنت اكىمى دجۋزەپپە مانگياپان.
ءبىر قىزىعى, الەمدە پاندەميانىڭ شەتى كورىنە باستاعاننان كەيىن كامماراتاداعى احۋال دا وڭ باعىتقا بەت الدى. جاستار كەنتكە كوپتەپ كەلىپ جاتىر. ماسەلەن, پاندەميا سالدارىنان ۇلكەن قالالارعا جۇمىس ىزدەپ كەتكەندەر تۋعان جەرىنە ورالا باستادى.
ونىڭ ۇستىنە, قاشىقتان جۇمىس ىستەۋ ءتاسىلى اۋىلدىق جەرلەردەن ۇزاماي-اق كوپتەگەن تىرلىكتى بىتىرۋگە بولاتىنىن كورسەتىپ بەردى. ناتيجەسىندە, كامماراتا سەكىلدى شاعىن قالالاردىڭ ءومىرى قايتا قىزدى.
دەگەنمەن «تەگىن باسپانانىڭ» مىنانداي ەرەجەسى بار. ءۇيدى ساتىپ العان ازامات 5 مىڭ ەۋرو دەپوزيت سالىپ قويۋى كەرەك. سونداي-اق ءۇش جىل ىشىندە وزىنە بۇيىرعان باسپانانى جاڭارتىپ, جوندەۋى ءتيىس. سودان كەيىن دەپوزيتتەگى 5 مىڭ ەۋرو قايتارىلىپ بەرىلەدى.
ءبىر ايتا كەتەرلىگى, كامماراتاداعى ۇيلەردى جوندەۋ قۇنى ءارتۇرلى. ماسەلەن, ءبىر باسپانانى قالپىنا كەلتىرۋ ءۇشىن 60-80 مىڭ ەۋرو كەتسە, كەلەسىسىن جاڭارتۋعا 4-5 مىڭ ەۋرو عانا جۇمسالۋى مۇمكىن. ايتسە دە جوندەلگەن ۇيلەردىڭ قۇنى بىرنەشە ەسە قىمباتتايتىنىن دا ايتا كەتكەن ءجون.
ەسكى ۇيلەر يەسىن تاپقانىمەن, كەنت باسشىلىعى تاعى ءبىر ماسەلەگە تاپ كەلدى. كىم قاي جەردەن پاتەر الۋى ءتيىس؟ اركىم ءوزىنىڭ قالاۋىنشا باسپانالارىن جاڭارتسا, شاعىن قالانىڭ بىرەگەي كەلبەتى بۇزىلىپ كەتپەي مە؟
باسشىلىقتىڭ باسى قاتىپ جۇرگەندە, شەشىم وڭاي تابىلدى. قايتا كەلگەن جاستار StreetTo دەپ اتالاتىن ەرىكتىلەر ۇيىمىن قۇرىپ, باسپانا العاندارعا كومەك قولىن سوزىپ ءجۇر. ماسەلەن, كامماراتا ورتالىعىندا كوشەلەر وتە تار. كولىكپەن بارۋ مۇمكىن ەمەس. وسىنداي ەرەكشەلىگىن بۇزباس ءۇشىن StreetTo ەرىكتىلەرى باسپانا ىزدەگەندەر اراسىندا ساۋالناما جۇرگىزەدى. ءسويتىپ ولارعا نە كەرەك ەكەنىن انىقتاپ, قالاداعى ۇيلەردى ءوتىنىش بەرۋشىلەردىڭ قالاۋىنا قاراي بولەدى.
ەرىكتىلەر مەن قالا اكىمشىلىگى وسىلايشا, ەلدى مەكەننىڭ بىرەگەي كەلبەتىن ساقتاپ قالماق. سونداي-اق قاي جەردە قانداي كاسىپ اشۋعا بولاتىنى جونىندە دە اقىل-كەڭەسىن ايامايدى.
قىسقاسى, كامماراتا كەنتى قايتادان قالپىنا كەلە باستادى.
