بيىل 24-مامىردا باتىس قازاقستان وبلىسىنىڭ قاراتوبە اۋدانىنا قاراستى قوسكول اۋىلدىق وكرۋگىنىڭ اۋماعىنداعى شورا قىستاعىندا 1 جاستاعى يتالياندىق پرۋس ليچينكالارىنىڭ كوبەيىپ جاتقانى انىقتالدى.
باتىس قازاقستان وبلىسىندا بيىل 72,326 مىڭ گەكتارعا ءۇيىرلى شەگىرتكە زيانكەستەرى, ونىڭ ىشىندە 70,326 مىڭ گەكتارعا يتالياندىق پرۋس جانە 2 مىڭ گەكتارعا ازيالىق شەگىرتكە تارالۋى مۇمكىن دەگەن بولجام بار.
«حيميالىق ءىس-شارالاردى ۋاقىتىندا اتقارۋ ءۇشىن وڭىرگە ءدارى-دارمەكتەر جەتكىزىلدى. سونداي-اق حيميالىق وڭدەۋ قىزمەتتەرىن اتقاراتىندارمەن شارت جاسالدى. وعان بارلىعى 30 تەحنيكا (ونىڭ ىشىندە 3 گاز گەنەراتورى) جۇمىلدىرىلادى. بقو قاراتوبە اۋدانى قاراتوبە اۋىلدىق وكرۋگى اۋماعىندا «ەنجيو», «لوكۋستين», «يميدور», «كومبات» جانە «تسيپروفەن» پرەپاراتتارىمەن وڭدەۋ جۇمىستارى جوسپارلى تۇردە باستالدى», دەلىنگەن حابارلامادا.
رەسپۋبليكا بويىنشا 2021 جىلى 640,85 مىڭ گەكتار جەرگە ءۇيىرلى شەگىرتكە زيانكەستەرى, ونىڭ ىشىندە يتاليالىق پرۋس 384 مىڭ گەكتارعا, ازيالىق شەگىرتكە 142 مىڭ گەكتارعا جانە ماروككالىق شەگىرتكە 114 مىڭ گەكتارعا تارالۋى مۇمكىن دەپ بولجانىپ وتىر.
«پەستيتسيدتەر مەن حيميالىق وڭدەۋ قىزمەتتەرى بارلىق بولجامدى الاڭعا ساتىپ الىندى. سونىمەن قاتار 223 مىڭ گەكتارعا جەتەتىن پەستيتسيد قورى بار.
ءۇيىرلى شەگىرتكەلەردى ءتيىمدى وڭدەۋ ءۇشىن پەستيتسيدتەردىڭ ءتۇرلى توپتارىنىڭ پرەپاراتتارى ساتىپ الىندى. بۇل باعىت بويىنشا وبلىس اكىمدىكتەرىمەن بىرلەسە جۇمىس ىستەۋ جۇيەسى ازىرلەندى. قازىرگى ۋاقىتتا وبلىس اكىمدەرىنىڭ ورىنباسارلارى باسقاراتىن جەدەل شتابتار قۇرىلدى, سونداي-اق مونيتورينگ جانە حيميالىق وڭدەۋ جۇمىستارىن ۇيىمداستىرۋ جونىندەگى جۇمىس جوسپارلارى بەكىتىلدى.
وڭدەۋگە ارنايى بۇرىككىش 183 تەحنيكا (150 جەرۇستى بۇرىككىشى, 12 ۇشاق, اسا جەڭىل اۆياتسيانىڭ 13 كەمەسى جانە 8 اەروزولدى گاز گەنەراتورى) تارتىلاتىن بولادى», دەيدى ماماندار.
ءۇيىرلى شەگىرتكە زيانكەستەرىنىڭ وشاقتارىن انىقتاۋ ءۇشىن 38,4 ملن گەكتار جەر زەرتتەلەدى. وسى جۇمىستى جۇرگىزۋ ءۇشىن 524 اۆتوكولىك پەن 1230 تەكسەرۋشى تارتىلادى.
ماۋسىم ايىندا كورشىلەس مەملەكەتتەرمەن (قحر, رف, رۋ) شەكارالاس اۋماقتاردا شەگىرتكە زيانكەستەرىن انىقتاۋ ءۇشىن بىرلەسكەن زەرتتەۋ جۇرگىزۋ جوسپارلانىپ وتىر.
رەسپۋبليكانىڭ تۇركىستان جانە جامبىل وبلىستارىندا ماروككو شەگىرتكەسىنە قارسى وڭدەۋ جۇمىستارى اياقتالدى. ال, اقتوبە وبلىسى مەن بقو-دا يتالياندىق پرۋسقا قارسى وڭدەۋ جۇمىستارى باستالدى.
