ايتا كەتەرلىگى, مۇندا جىلىنا 30 مۆت ەلەكتر ەنەرگياسىن وندىرەتىن كۇن ستانساسى جۇمىس ىستەپ تۇر. ەندى ەنەرگيا جەلدىڭ كۇشىمەن دە وندىرىلمەك. مۇنداي قۇرىلعىلاردىڭ تابيعاتقا, قورشاعان ورتاعا تيگىزەر زيانى جوق. كەرىسىنشە, جايىلىمداعى قويدىڭ ءوزى الىپ قاپالاقتاردىڭ تۇبىنە كەلىپ جۋسايتىن كورىنەدى. جەل مەن كۇن ستانسالارىنىڭ ەڭ باستى ارتىقشىلىعى – قۋات كوزى سارقىلمايدى. شىعىستاعى سۋ ەلەكتر ستانساسىنا ءتۇسىپ تۇرعان سالماقتى ازايتۋ ماقساتىندا 2017 جىلى بۇل جوبا ۇسىنىلىپ, «چارسك ۆەتەر» جشس جۇمىستى قولعا العان-تۇعىن. اۋدان اكىمدىگى قاپالاقتى 17 قۇرىلعى مەن ستانساسىنا جەر ءبولدى. قازىرگى ۋاقىتتا قۇرىلىس قارقىندى ءجۇرىپ جاتىر.
– بۇل سالادا ءبىزدىڭ تاجىريبەمىز بار. بىلەتىن شىعارسىزدار, الماتى وبلىسىنا قاراستى قاپشاعاي, سارىبۇلاق, شىلىكتە جەل ەلەكتر ستانسالارىن ورناتتىق. سونداي-اق اقمولانىڭ ەرەيمەنتاۋىندا جۇمىس ىستەپ, ەكولوگيالىق تازا جولمەن ەلەكتر ەنەرگياسىن ءوندىرىپ تۇر. جاڭعىزتوبەنىڭ توڭىرەگى دە زەرتتەلدى. جەلدىڭ كۇشى بار. جوسپارعا ساي, جىل سوڭىندا 17 قۇرىلعىنى ىسكە قوسامىز, – دەيدى مونتاجداۋشى جەڭىس التاەۆ.
جاسىل ەنەرگيا ءوندىرۋ جوباسىنىڭ قۇنى – 7 ملرد 400 ملن تەڭگە. كولەمدى ءارى سالماقتى قۇرىلعىلارىن ساتىپ الۋ ءوز الدىنا, جەتكىزۋ دە وڭاي ەمەستەي كورىندى. ويتكەنى سوناۋ گوللانديادان اكەلگەن ەكەن. ەندىگى جۇمىس, بىرنەشە توننا تارتاتىن گەنەراتوردى 60 مەتر بيىكتىككە كرانمەن كوتەرىپ ورناتۋ قاجەت. ونىڭ ءبارى ايتۋعا وڭاي بولعانىمەن, ءىس جۇزىندە قاجىر-قايراتتى قاجەت ەتەتىن جۇمىس. مونتاجداۋشى جەڭىس التاەۆتىڭ ايتۋىنشا, گەنەراتورلاردى بيىككە كوتەرۋ ءۇشىن ارنايى كراننىڭ كومەگى كەرەك. الايدا ەڭبەك اقتالادى. ەلگە تيگىزەر پايداسى دا زور. ەلەكتر ەنەرگياسىمەن قامتۋدان بولەك, ستانسا ىسكە قوسىلعان سوڭ 12 ادام تۇراقتى جۇمىسپەن قامتىلادى. قازىرگى ۋاقىتتا قۇرىلىسىمەن 40-50 ازامات اينالىسىپ ءجۇر. ونىڭ ىشىندە اۋىلدىقتار دا بار.
– بالامالى ەلەكتر ەنەرگياسى بويىنشا 2017 جىلدان بەرى جۇمىستار ءجۇرىپ جاتىر. جىلدىق قۋاتى 30 مۆت كۇن ەلەكتر ستانساسى ىسكە قوسىلعان. ەندى «چارسك ۆەتەر» مەكەمەسى جۇمىس جۇرگىزۋدە. كۇن مەن جەل ەلەكتر ستانسالارى ءبىر جەردەن ەنەرگيا بەرۋى ەلىمىزدىڭ باسقا وڭىرلەرىندە جوق, – دەيدى جارما اۋداندىق كاسىپكەرلىك ءبولىمىنىڭ باسشىسى ماقسات قاسىموۆ.
جەل ەلەكتر ستانساسىنىڭ جۇمىسىن قاراپايىم تىلمەن تۇسىندىرەر بولساق, سوققان جەلدەن توننا تارتاتىن قاپالاقتار ارقىلى قۋات ءوندىرىپ, ءبىر اككۋمۋلياتورعا قۇيادى. سول جەردەن ءارى قاراي تارايدى. ول ءۇشىن «KEGOC» اق باسشىلىعىمەن كەلىسىمشارت جاسالدى.
شىعىس قازاقستان وبلىسى,
جارما اۋدانى
