وسى الەمدىك دودادان كەيىن حالىقارالىق دزيۋدو قاۋىمداستىعى دزيۋدوشىلارعا ءتيىستى ۇپايلارىن تاراتىپ, الەمدىك رەيتينگ ارقىلى وليمپياداعا جولداما العان بالۋانداردىڭ ءتىزىمىن جاريالايدى.
دۇنيەجۇزىلىك جارىستىڭ قارساڭىندا دزيۋدوشىلارىمىزدىڭ وليمپيادالىق رەيتينگىندەگى ورىندارى قانداي؟ تورتجىلدىقتىڭ باستى دوداسىندا ەل نامىسىن قانشا بالۋان قورعاۋى مۇمكىن؟ وسى سۇراقتارعا جاۋاپ ىزدەپ كورسەك.
دزيۋدودان ەرلەر قۇراماسىنىڭ باس باپكەرى عالىمجان جىلگەلديەۆ 60 كيلو سالماق دارەجەسىندە سىنعا ءتۇسىپ جۇرگەن ەلدوس سمەتوۆتىڭ وليمپيا ويىندارىنا باراتىنىن ايتقان بولاتىن. ءيا, ەلدوستىڭ ءدال قازىرگى تاڭدا توكيوعا باراتىنىنا تالاس جوق. وسى اپتانىڭ باسىندا جاڭارتىلعان وليمپيادالىق رەيتينگتە ەلدوس ءتورتىنشى ساتىدا دا تۇر. العاشقى ۇشتىكتە ەكى جاپون بالۋانى جانە ءبىر رەسەيلىك بالۋان بار.
66 كيلو سالماقتا ەكى بىردەي مىقتى بالۋانىمىز بار. ءبىرى – الەم چەمپيوناتىنىڭ كۇمىس جۇلدەگەرى ەرلان سەرىكجانوۆ, ەكىنشىسى – كوپتەگەن حالىقارالىق جارىستا توپ جارىپ جۇرگەن ەلدوس جۇماحانوۆ. ەكى بالۋان دا ەل نامىسىن قورعاۋعا لايىق. دەگەنمەن وليمپياداعا ءبىر عانا بالۋاننىڭ باراتىنىن ەسكەرسەك, بۇل جەردە ەرلان سەرىكجانوۆتىڭ شوقتىعى بيىك تۇر. ول وليمپيادالىق رەيتينگتە 3831 ۇپايمەن 13-ورىندا. ال ەلدوس جۇماحانوۆ 2787 ۇپايمەن 23-ورىندا. الايدا ءبىر قىزىعى, الەم چەمپيوناتىنا ەلدوس بارادى. ەگەر ول فينالعا شىعىپ جاتسا, سەرىكجانوۆتىڭ الدىنا تۇسەدى. ويتكەنى كۇمىس جۇلدەگەرگە رەيتينگ بويىنشا 1044 ۇپاي, ال چەمپيونعا 2000 ۇپاي بەرىلەدى.
ەلدوستىڭ وليمپياداعا بارۋ-بارماۋى ءوز قولىندا.
73 كيلوداعى جانساي سماعۇلوۆ جىل باسىندا وليمپياداعا باراتىن بالۋانداردىڭ ەڭ سوڭعىسى بولىپ تۇرعان. بىراق دوحادا (قاتار) وتكەن «شەبەرلەر» باسەكەسىندە ۇزدىك بەستىككە كىرىپ, تاشكەنتتەگى گران سلام جارىسىندا كۇمىس جۇلدەگە يە بولعان بالۋانىمىز بىردەن 12-ورىنعا كوتەرىلدى. دەگەنمەن سوڭعى جارىستاردا جانسايدىڭ جولى بولمادى. قازىر ول 16-ورىندا. بىراق بۇل – وليمپياداعا بارۋعا جەتكىلىكتى ورىن. ەندى وسى ناتيجەدەن تومەندەمەۋى قاجەت.
81 كيلودا ءۇمىت ارتىپ وتىرعان بالۋاندارىمىزدىڭ ءبىرى – ديدار حامزا. 2018 جىلى جازعى ازيا ويىندارىنىڭ چەمپيونى بولعان ديداردىڭ, وكىنىشكە قاراي, سوڭعى كەزدەرى جولى بولماي ءجۇر. قازىر ول وليمپياداعا باراتىن بالۋانداردىڭ اراسىندا جوق. وسىدان ءبىر اي بۇرىن قۇرلىقتىق كۆوتا ارقىلى باراتىنداردىڭ تىزىمىندە ەدى. قازىر ودان دا شىعىپ قالعان – 32-ورىن.
90 كيلو سالماقتا كۇرەسەتىن يسلام بوزباەۆتىڭ دا جاعدايى ءماز ەمەس. وسىدان بىرنەشە اي بۇرىن وليمپياداعا باراتىن 18 بالۋاننىڭ ىشىندە (16-ورىن) ەدى. قازىر 24-ورىندا. ياعني وندا تەك قۇرلىقتىق كۆوتا عانا بار. الەم چەمپيوناتى – ونىڭ سوڭعى مۇمكىندىگى. ەگەر العاشقى اينالىمنان سۇرىنەتىن بولسا, وندا امالسىز وليمپيادانى تەلەديداردان تاماشالايدى.
وكىنىشكە قاراي, 100 كيلوداعى بالۋاندارىمىزدىڭ باعى جانباي قويدى. ەل نامىسىن قورعاپ جۇرگەن ايبەك سەرىكباەۆ – 50-ورىندا. ۆيكتور دەميانەنكو 70-ءشى ورىندا تۇر. بۇل ەكى بالۋان ءۇشىن توكيونىڭ ەسىگى تارس جابىلعان. سودان دا بولار, الەم چەمپيوناتىندا ەكى بالۋانىمىز دا كۇرەسپەيدى.
100 كيلودان جوعارى سالماقتاعى ەراسىل قاجىباەۆ وليمپيادالىق رەيتينگتە 35-ورىندا. جولداما الۋ ءۇشىن ەراسىلعا ءبىراز ەڭبەكتەنۋ كەرەك.
قىزدار قۇراماسىنىڭ باپكەرلەرى وليمپيادا جانە الەم چەمپيوناتىنىڭ قولا جۇلدەگەرى وتگونتسەتسەگ گالبادراحقا سەنىم ارتىپ وتىر. قاتىسقان جارىسىنان كەمى قولا مەدال الىپ قايتاتىن بالۋانىمىز 3353 ۇپايمەن 14-ورىندا. گالبادراح بيىل ەشبىر جارىسقا قاتىسپادى.
دەسە دە, بۇعان دەيىنگى جيناعان ۇپايىنىڭ كوپتىگىنىڭ ارقاسىندا وليمپياداعا باراتىن مۇمكىندىگىن ساقتاپ تۇر.
قورىتا كەلگەندە, ءدال قازىرگى تاڭدا قازاقستان قۇراماسىندا 5 سالماق دارەجەسى بويىنشا
(4 ەرلەر, 1 قىزدار) جولداما بار. التىنشى جولدامانى الامىز با, بەسەۋدەن تورتەۋگە ءتۇسىپ قالامىز با, ونى الەم چەمپيوناتىنان كەيىن بىلەتىن بولامىز.
