العاشقى تۋردا جارىستى ۇيىمداستىرۋشىلار – لاتۆيادان بۋلليت سەرياسىندا باسىم ءتۇسىپ, الەم چەمپيوناتىن كوتەرىڭكى كوڭىل كۇيدە باستاعان قازاقستان قۇراماسىنىڭ حوككەيشىلەرى ەكىنشى تۋردا دا جەڭىستى جولىن جالعادى. جەرلەستەرىمىز توپتىق كەزەڭنىڭ ەكىنشى ماتچىندا 2019 جىلى سلوۆاكيادا ۇيىمداستىرىلعان سوڭعى الەم چەمپيوناتىنىڭ جەڭىمپازى – فينليانديا حوككەيشىلەرمەن كەزدەسىپ, نەگىزگى ۋاقىتتا 1:1 ەسەبىمەن تەڭ ءتۇستى. وۆەرتايمدا دا جەڭىمپاز كوماندا انىقتالمادى. ماتچ سوڭىنداعى بۋلليت سەرياسىندا باعى جانىپ, قارسىلاستارىنا قاراعاندا مىقتىلىق تانىتقان قازاقستاندىق حوككەيشىلەر الەم چەمپيوندارىنىڭ جىگەرىن قۇم قىلدى.
كەزدەسۋدىڭ ءبىرىنشى كەزەڭىندە كوماندالار ءبىر-ءبىرىنىڭ قاقپاسىنا شايبا سوعا الماي, ۇزىلىسكە تەڭ ەسەپپەن شىقتى.
دەگەنمەن بۇل كەزەڭدە فينليانديا حوككەيشىلەرى باسىم بولدى. العاشقى 20 مينۋتتا قارسىلاستار ءبىزدىڭ قاقپاعا 15 ءدال سوققى جاساسا, قازاقستاندىق حوككەيشىلەر ءبىر عانا انىق سوققىمەن شەكتەلدى. ۇزىلىستەن كەيىن ازداپ ەس جيعان جەرلەستەرىمىز قارسىلاستىڭ قاقپا ماڭايىندا ءجيى بوي كورسەتە باستادى. الايدا ەسەپتى ءبىرىنشى بولىپ فينليانديا قۇراماسى اشتى. ەكىنشى كەزەڭنىڭ 34-مينۋتىندا انتون لۋندەلل قاربالاس ساتتە قاقپاشىمىز نيكيتا بوياركيندى قاپى قالدىرىپ, گول سوعىپ كەتتى. دەسە دە الەم چەمپيوندارىنىڭ قۋانىشى ۇزاققا سوزىلعان جوق. ارادان ەكى جارىم مينۋت وتكەندە جەرلەستەرىمىز تارازى باسىن تەڭەستىردى. نيكيتا ميحايليستەن پاس العان شابۋىلشى كيريلل پانيۋكوۆ مەرگەندىگىمەن كوزگە ءتۇسىپ, الەم چەمپيوناتىنداعى العاشقى شايباسىن سالدى.
ءۇشىنشى كەزەڭدە دە تابلوداعى كورسەتكىش وزگەرىسسىز قالىپ, كەزدەسۋ وۆەرتايمعا ۇلاستى. قوسىمشا ۋاقىتتا دا كوماندالار جەڭىمپازدى انىقتاي المادى. ال بۋلليتتە قازاقستان قۇراماسى 3:1 ەسەبىمەن جەڭىسكە جەتتى. شەشۋشى گولدىڭ اۆتورى – رومان ستارچەنكو بولدى. سونداي-اق كەرتيس ۆولك پەن نيكيتا ميحايليس تە گول سوقتى.
تاريحقا كوز جۇگىرتەر بولساق, قازاقستان مەن فينليانديا قۇرامالارى بۇگىنگە دەيىن ءوزارا ءتورت مارتە مۇزايدىندا جولىعىپ, بارلىق ماتچ فينليانديانىڭ جەڭىسىمەن اياقتالعان. مىنە, بەسىنشى كەزدەسۋ دەگەندە قازاقستان قۇراماسى ءۇش دۇركىن الەم چەمپيوندارىن جەڭدى.
جانكۇيەرلەردىڭ پىكىرى بويىنشا, قازاقستان قۇراماسىنىڭ قاقپاشىسى نيكيتا بوياركين ءۇشىنشى جارىس كۇنىنىڭ ۇزدىك ويىنشىسى اتاندى. حالىقارالىق شايبالى حوككەي فەدەراتسياسىنىڭ تۋيتتەردەگى رەسمي پاراقشاسىندا جۇرگىزىلگەن ساۋالداما جانكۇيەرلەردىڭ 30,6 پايىزى بوياركيندى قولداعان. كەيىنگى ورىندارعا ترەۆور مۋر (اقش, 26,5), ماتياس ترەتتەنەس (نورۆەگيا, 24,7) جانە دەنني تەيلور (بەلارۋس, 18,2) جايعاسقان.
وسىلايشا, ەكىنشى تۋردا الەم چەمپيوندارىن جەڭگەن قازاقستان قۇراماسى ۆ توبىنداعى تۋرنير كەستەسىندە ەكىنشى ورىنعا كوتەرىلىپ, پلەي-وفف كەزەڭىنە تاعى ءبىر قادام جاقىندادى. جەرلەستەرىمىزدىڭ ەنشىسىندە 4 ۇپاي بار. ال ەكى ويىندا ۇپايدان شاشاۋ شىعارماعان گەرمانيا 6 ۇپايمەن توپ باسىندا كەلەدى. سونداي-اق 4 ۇپايى بار لاتۆيا مەن فينليانديا ءۇشىنشى جانە ءتورتىنشى ورىنداردى ءبولىسىپ تۇر.
ءبىرىنشى تۋردا فينليانديادان جەڭىلگەن اقش قۇراماسى ەكىنشى تۋردا كانادا حوككەيشىلەرىن 5:1 ەسەبىمەن جەڭىپ, العاشقى 3 ۇپايىنا قول جەتكىزدى. كانادا وسىمەن ەكىنشى ويىندا جەڭىلدى. سونىمەن قاتار ءبىزدىڭ توپتا ونەر كورسەتەتىن نورۆەگيا قۇراماسى دا يتاليانى (4:1) ۇتىپ, العاشقى ۇپايلارىن يەلەندى.
سونداي-اق كەشەگى كۇننىڭ تاعى ءبىر سەنساتسياسىن بەلارۋس حوككەيشىلەرى تىركەدى. 2017 جانە 2018 جىلدارداعى الەم چەمپيوناتتارىندا قاتارىنان ەكى جىل باس جۇلدەنى يەلەنگەن شۆەتسيا قۇراماسىمەن كەزدەسكەن بەلارۋس 1:0 ەسەبىمەن جەڭىسكە جەتتى. شۆەتسيا قاتارىنان ەكىنشى ويىندا ءبىر شايبا ايىرماشىلىعىمەن جەڭىلدى. ا توبىندا باق سىناپ جاتقان سلوۆاكيا ەكىنشى تۋردا ۇلىبريتانيا حوككەيشىلەرىن 2:1 ناتيجەسىمەن تىزە بۇكتىرسە, شۆەيتساريا دانيانى ۇتتى. ەسەپ – 1:0.
ا توبىنداعى تۋرنير كەستەسىندە ەكى ويىندا 6 ۇپايدان جيناعان رەسەي, سلوۆاكيا جانە شۆەيتساريا قۇرامالارى كوش باستادى. ال 3 ۇپايى بار دانيا مەن بەلارۋس ءۇشىنشى جانە ءتورتىنشى ورىندى ءبولىسىپ تۇر.
ايتا كەتەيىك, قازاقستان قۇراماسى كەلەسى ويىنىن بۇگىن اقش قۇراماسىمەن وتكىزەدى.
