سۋرەتشىلەر وداعىنىڭ مۇشەسى مارات بەكەەۆتىڭ «تولىق اي ءىى» كارتيناسىنداعى تۇستەردىڭ ءبىر-بىرىمەن ماتاسا كەلىپ, جاڭا ءبىر ەسىكتىڭ قاقپاسىن قاعىپ تۇرۋى وقىرماننىڭ كوڭىل تولقىنىسىن تۋعىزۋى مۇمكىن. كەز كەلگەن ەسىك – جاڭا جولداردىڭ العاشقى ادىمى. كارتينا سيمۆوليزم ەلەمەنتتەرىمەن ابستراكتسيونيزم ستيلىندە ورىندالۋىنىڭ ءمانى سوندا جاتىر.
ابستراكتسيونيزم – كەسكىندەمە مەن ونەردەگى جالپى قورشاعان ورتانى ناقتى بەينەلەۋدەن باس تارتاتىن ستيل. بۇل ءستيلدى ۇستانۋشىلار كورەرمەندەرگە بەلگىلى ءبىر سەزىم تۋدىرۋ ءۇشىن سىزىقتاردى, جازىقتىقتاردى جانە باسقا دا نىسانداردى بىرىكتىرە وتىرىپ قاراپايىم جانە كۇردەلى پىشىندەردى سالادى ءھام تۇستەردى ويناتادى.
تۋىندى كوشپەلى تايپالاردىڭ ەجەلگى مادەنيەتىنىڭ ءبىرى – تاڭىرشىلدىك سيمۆولدارىنا تولى. ونەردەگى سيمۆولدىق تۋىندىلارعا ءتان قاسيەتتەر – ميستيكا, جۇمباق ميفتىك جانە كيەلى تاقىرىپتار جانە سيۋجەتتەر, يشارالار, استارلاپ جەتكىزۋ. وسىلاردىڭ بارلىعى مارات بەكەەۆتىڭ كارتينالارىندا بار.
شىنىندا, ءبىز قالالىقتار قاۋىرت كۇندەردىڭ قىم-قۋىت جۇگىرىسىمەن اپتىعىپ ءجۇرىپ, تىرشىلىك كورىنىستەرىنەن اسەر الا المايمىز. جۇمىسقا ادەتتەگىدەي اسىعىپ بارا جاتقان كەزىڭىزدە كوشەدەگى ويىن بالاسى جولىڭىزدى بوگەپ: «اعاتاي, جاڭا عانا اسپاننىڭ انەبىر شەتى جۇمساق كوگىلدىر تۇستەن جىبەك كۇلگىنگە قاراي اۋىسىپ ەدى, ەندى كەلىپ توتيايىنداي كوكپەڭبەك بولا قالىپتى عوي», دەپ ءتىل قاتسا, نە دەپ ايتارىڭىزدى ويلاندىڭىز با؟ سۇراۋشىنىڭ اقىل-ەسىنىڭ دۇرىس نە بۇرىستىعىنا كۇمان كەلتىرىپ, ءارى قاراي شارۋاڭىزعا بەتتەيتىن ەدىڭىز. ومىرگە بالا تۇسىنىكپەن قاراۋ ءسىز ءۇشىن قوراش, وتە قارابايىر تولعام سەكىلدى.
اسپاننىڭ اينىعىشتىعىنا, جارىقتىڭ جەر بەتىنە اسەرىنە, ءسات سايىن وزگەرىپ وتىراتىن كۇن شۇعىلاسى مەن كولەڭكەنىڭ تارتىسىنا, ءتۇن جامىلعان دۇنيەنىڭ ديدارىنا بوياۋ جاقساڭىز, ءومىر ءبىر ساتتە وزگەرىپ شىعا كەلەتىن ەدى. بىراق كوك اسپاننىڭ بەتىندە قالقىعان قازباۋىر بۇلتتاردىڭ ءبىر قالىپتا تۇرمايتىنى وكىنىشتى. ايتپەسە ومىرگە سۋرەتشىنىڭ كوزىمەن قاراعانعا نە جەتسىن!
سوندىقتان عوي, كارتيناعا ءبىر قاراعاندا وعان بەيبەرەكەت جينالعان سىزىقتار, فيگۋرالار مەن تاڭبالار سالىنعان سياقتى. ال زەردەلەپ قارايتىن بولساق, سۋرەتشىنىڭ كورەرمەندى بەلگىلى ءبىر ويلارعا نەمەسە كوڭىل كۇيگە اكەلەتىن تۇتاس كومپوزيتسيا جاساعانى تۇسىنىكتى بولادى. سۋرەتتەگى گرافيكا ەلەمەنتتەرى كەسكىندەمەگە اۋىسىپ وتىرادى. ولار قاتار تۇرادى, ارالاسادى جانە كورەرمەندى تاڭعالدىرادى. ءمۇيىزدى باسىن يگەن الىپ بۇقانى, ەكى بالاپان جاتقان ۇيانى, اتتى جانە بالىقتى كورەسىز.
سۋرەتشىنىڭ ەڭ كەرەمەت قاسيەتى – تۇستەردى ويناتا بىلۋىندە. ونىڭ كارتينالارى كەرەعارلىق ۇستانىمىمەن قۇرىلسا دا, بوياۋلاردىڭ رەڭكتەرى باسەڭدەتىلسە دە, ولاردىڭ كەز كەلگەنى جالپى ءتۇسىنىڭ قانداي بولعانىنا قاراماستان, ۇيلەسىمدى ورنالاسقان. بۇل سۋرەت تە جيناقى ءارى استارلى. كورىپ تۇرعاندارىڭىزداي كومپوزيتسيالىق ىرعاقتاردىڭ بەيبەرەكەتتىگى قارا نەمەسە كوك تۇستەرمەن بەينەلەنگەن. بۇل ونىڭ جۇمىستارىنا ەرەكشە مەتافيزيكالىق ءمان بەرەدى.
كارتينا جازۋدا قويىلاتىن ەرەجەلەردى اتتاپ ءوتىپ, ايدىڭ كوز قارىقتىرار جارىعىن, كوڭىل بيىگىندە جاڭبىردىڭ توگىپ ءوتىپ, تەڭىزبەن ارالاسىپ, جارتاسقا ۇرعان كوك دولى كەيپىن كەنەپكە تۇسىرە بىلگەن, ۇستاتپايدى-اۋ دەگەندى دارگەيىنە جىققان اۆتوردىڭ ەڭبەگى ۇلكەن. ايعا جەردەن كوز سالعان جانارلاردىڭ جيىنتىعى بار مۇندا. پاليتراداعى بوياۋلاردىڭ ارقايسىسى ءوز ورىندارىنان جىلجىپ, قۇبىلمالى رەڭككە, تاڭعاجايىپ تۇستەرگە ۇلاسۋعا اسىعىپ تۇرعانداي. ساعىمداي قۇبىلىپ, سابىنداي بۇزىلىپ, تانيتىندى دا, تانىمايتىندى دا وزىنە تەلمىرتكەن تۋىندىنىڭ جۇمباعى وسىندا.
بەينەلەۋ ونەرىنىڭ بيىك مىنبەرىنەن قاراعاندا, جەتى بوياۋ تۋرالى ورتاعا سالار پىكىر, جەكە تالعام تۇرعىسىنان اۆتورعا قويار ساۋالدار كوپ. جەتى بوياۋ ارقىلى ادالدىق پەن ارامدىقتى, اڭقاۋلىق پەن قۋلىقتى, ماحاببات پەن زۇلىمدىقتى, ءسۇيىنۋ مەن كۇيىنۋدى, ءبىر سوزبەن ايتقاندا, ءومىر دەگەن ۇلكەن ۇعىمعا ءتان كەرەعار قۇبىلىستاردى اي بەتىنە ورنالاستىرعان سۋرەتشىنىڭ جالعىزدى كوپتەن, جالپىنى جالقىدان بولە قارامايتىنى سەزىلەدى. مىڭداعان جۇلدىزداردىڭ اراسىندا, اسقاق قالپىن جوعالتپاعان, كوزگە بىردەن شالىناتىن سۇلۋ ايدىڭ سىزباسى رەنتگەنگە تۇسكەندە وسىلاي بولماق. بۇل سۋرەتشىنىڭ ءوز اسپانىنداعى ايى.
