قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ وسىعان دەيىن دەپارتامەنتتىڭ باسشىسى بولعان سەرگەي كەنەتاەۆقا العىسىن ءبىلدىرىپ, اتقارعان جۇمىسى ءۇشىن العىس ايتتى.
حۋان فەرناندەس 1957 جىلى 3 جەلتوقسان كۇنى مادريد قالاسىندا دۇنيە ەسىگىن اشقان. كوپ جىلدار بويى يسپانيا چەمپيوناتىنىڭ ماتچتارىندا تورەشى بولعان. سونىمەن قاتار يسپانيالىش مامان چەمپيوندار ليگاسى, ۋەفا كۋبوگى, الەم چەمپيوناتى مەن ەۋروپا كۋبوگىنىڭ ىرىكتەۋ ويىندارىندا قىزمەت اتقارعان.
«وسىنداي ۇسىنىس بىلدىرگەن قازاقستان فۋتبول فەدەراتسياسىنا العىسىمدى ايتامىن. مەن قازاقستان فۋتبولىنداعى تورەشىلىكتىڭ دەڭگەيىن كوتەرۋ ءۇشىن بار كۇشىمدى سالامىن. تورەشىلەر فۋتبولدىڭ اجىراماس ءبىر بولىگى», دەدى فەرناندەس مىرزا.
ۋەفا تورەشىلەر كوميتەتىنىڭ توراعاسى روبەرتو روزەتتي مىرزا فەرناندەستى جوعارعى دەڭگەيدىڭ مامانى ەكەنىن ايتىپ ءوتتى. ارنايى ۆيدەوبايلانىسقا شىققان روزەتتي الداعى ۋاقىتتا قازاقستان فۋتبولىندا تورەشىلەر ماسەلەسى تۋىندامايدى دەگەنگە كەلتىردى.
«قازاقستان تاراپى كەرەمەت تاڭداۋ جاسادى. حۋان وتە تاجىريبيەلى مامان. ول قازاقستانداعى تورەشىلەردىڭ دەڭگەيىن كوتەرىپ, جۇمىسىن ءبىر ىزگە سالادى. فۋتبول قاۋىمداستىعىنىڭ اجىراماس ءبىر بولىگىنە اينالعان فەرناندەسكە كومەك كورسەتىپ, ونىڭ جۇمىسىنا ىقپال ەتسەڭىزدەر, يسپانيالىق مامان ۋەفا تالاپتارىنا سايكەس قىزمەت ەتەتىن بولادى», دەپ اتاپ ءوتتى ر. روزەتتي.
