كومپوزيتوردىڭ ءومىرى مەن شىعارماشىلىعىنا نەگىزدەلگەن قويىلىم تۋرالى بەلگىلى كومپوزيتور جولامان تۇرسىنباي: «سپەكتاكلدە ءشامشى اندەرىنىڭ كوپ داۋىستى حورمەن شىرقالۋى جۇرەك تەبىرەنتتى. قازاقتا ون مىڭ ءان, بەس مىڭ كۇي بار دەسەك, بۇل قويىلىمنىڭ دا رۋحاني قازىنامىزعا قوسىلعان تىڭ دۇنيە ەكەنىندە داۋ جوق. قويىلىمعا ءشامشىنىڭ ەڭ ماعىنالى, جاقسى اندەرىنىڭ توپتاستىرىلعانى ءسۇيسىنتتى. ءسوز بەن ءان دومبىرانىڭ قوس ىشەگىندەي اسەم ۇندەسىپ تۇر. ءوز باسىم ءشامشى اعامىزبەن كوپ ارالاسقان اداممىن. سپەكتاكلدەن قازاق ء«ۆالسىنىڭ كورولى» اتانعان اتاقتى كومپوزيتوردىڭ سان قىرلى بەينەسىمەن قايتا قاۋىشقانداي كۇي كەشتىم», دەپ جۇرەكجاردى لەبىزىن ءبىلدىردى.
سپەكتاكلدە ورىندالاتىن ءشامشى اندەرىنىڭ قاي-قايسىسى دا اۆتوردىڭ ومىرىندە ورىن العان ءارتۇرلى وقيعانى باياندايدى. تۇلا بويى انگە اينالعان تۇلعانىڭ اسەرلى الەمى كورەرمەن كوڭىلىن باۋراپ اكەتۋىمەن قۇندى. جۇرەكتەرگە سەزىم ۇيالاتىپ, ماحاببات وتىن مازداتقان ميۋزيكلدىڭ كەيىنگى جاستارعا بەرەر تاعىلىمى مەن تاربيەلىك ءمانى وتە زور. ءمادينا وماروۆا جازعان ميۋزيكلدى ترۋپپا ارتىستەرى ەكى ايدان استام ۋاقىت دايىنداسا, ال سپەكتاكلدىڭ رەجيسسەرى, قازاقستاننىڭ ەڭبەك سىڭىرگەن قايراتكەرى اسحات ماەميروۆ شىعارماشىل تۇلعانىڭ بەينەسى مەن ونەر جولىن حالىققا شىنايى جەتكىزۋ ماقساتىندا كومپوزيتوردىڭ تۋعان جەرىن ارالاپ, كوپ ماعلۇماتقا قانىعىپ قايتقانىن العا تارتادى. كومپوزيتوردىڭ شىعارماشىلىق قورجىنىندا 300-گە جۋىق ءان ساقتالعان دەسەك, ساحنالىق قويىلىمعا ولاردىڭ ەڭ كوپ تاراعان ۇزدىكتەرى عانا تاڭداپ الىنعان. سپەكتاكلدىڭ ءبىر عانا شامشىمەن شەكتەلمەي, ساحناعا ءۇش بىردەي ءشامشىنى قاتار الىپ شىعۋى جانە اندەردىڭ وركەستر سۇيەمەلدەۋىمەن جاندى داۋىستا ورىندالۋى قويىلىمنىڭ باستى ەرەكشەلىگى سانالادى.
ايتا كەتەتىن جايت, تاۋەلسىزدىكتىڭ 30 جىلدىق مەرەكەسى قۇرمەتىنە ازىرلەنگەن قويىلىمنىڭ پرەمەراسى ناۋرىز ايىندا وتكەن بولاتىن. بەلگىلى تۇلعانىڭ كۇرەسكەر بەينەسىن امان عۇماروۆ, ەرنار مۇحامبەتوۆ, عاشىق كەزىن سالامات مۇقاشەۆ, ەرماحان ايماحان, ال كومپوزيتورلىق قىرىن سۇلتان كەڭشىلىك, ازامات بولاتوۆ سىندى تالانتتى جاستار سومداپ, كومپوزيتوردىڭ ءومىر جولىندا كەزىككەن قيىندىقتارىن, قوعامعا دەگەن ازاماتتىق كوزقاراسىن, تەڭىزدەي تۋلاعان ىشكى الاپات سەزىمىن, عاشىقتىق سىرلارىن اۋەزدى اندەرىمەن اسەم جەتكىزە ءبىلدى. سول سياقتى اقان سەرى, احمەت جۇبانوۆ, مۇقاعالي ماقاتاەۆ, روزا باعلانوۆا, ءابىلاحات ەسپاەۆ, تولەگەن ايبەرگەنوۆ, جۇمەكەن ناجىمەدەنوۆ سياقتى قازاق مادەنيەتى مەن ونەرىندە ورنى بيىك قايراتكەر تۇلعالار بەينەسىنىڭ ءبىر ارناعا شوعىرلانىپ, قويىلىمنان كورىنىس تابۋى – بۇرىن-سوڭدى پايدالانىلماعان تىڭ ءتاسىل, وتە سيرەك قۇبىلىس.
مۋزىكالىق جاس كورەرمەن
تەاترى رەپەرتۋارىنداعى ء«شامشى» ميۋزيكلى ەل بولاشاعى – جاس بۋىننىڭ ونەرگە دەگەن سۇيىسپەنشىلىگىن ارتتىرۋدا وراسان زور ءىس تىندىرىپ وتىر دەۋگە تولىق نەگىز بار. وسكەلەڭ سانا ينتەرنەتكە تەلمىرگەن زاماندا كەيىنگى ۇرپاقتى ءتول قۇندىلىقتارمەن سۋسىنداتىپ, جاستارىمىزدىڭ بويىنا وتانشىلدىق سەزىمىن ۇيالاتۋدا تەاتر ونەرى الدىندا ۇلكەن مىندەتتەر تۇر. وسى جاعىنان العاندا, ء«شامشى» سپەكتاكلى جاس ۇرپاققا كيەلى ونەردىڭ تازا اۋاسىن جۇتقىزۋدى مۇرات تۇتادى. تەاتردىڭ كامەرالىق وركەسترى سۇيەمەلدەۋىمەن ورىندالعان «جان اعا», «ارىس جاعاسىندا», ء«انىم سەن ەدىڭ», «قايىقتا», ء«ومىر-وزەن», «باقىت قۇشاعىندا», «ساعىنىشىم مەنىڭ», «قۋانىش ءۆالسى», «اق ماڭدايلىم», «سىعان ءانى», «اقان سەرى», «انا تۋرالى جىر», ت.ب. اندەر كوڭىل كوكجيەگىن كوركەمدىككە بولەيتىن تۇنىق باستاۋلار ىسپەتتى.
مادەنيەت پەن ونەر قىزمەتكەرلەرى كۇنى قۇرمەتىنە ۇسىنىلعان قويىلىمدى ءدۇلدۇل ءانشى ديماش قۇدايبەرگەن, حالىقارالىق 71-ءشى كانن فەستيۆالىنىڭ لاۋرەاتى, «نيكا» جۇلدەسىنىڭ يەگەرى سامال ەسلياموۆا سىندى قازاق ونەرىنىڭ تۋىن كوتەرىپ جۇرگەن دارىن يەلەرىنىڭ كەلىپ تاماشالاۋىنىڭ وزىندە ۇلكەن ءمان بار. ءومىر جولى ءوز ونەرىڭە قۇرمەت كورسەتۋدەن باستالادى.
