كەڭەس وتىرىسىنىڭ جۇمىسىنا ۇكىمەت مۇشەلەرى, ءماجىلىس دەپۋتاتتارى, رەسپۋبليكالىق جاستار ۇيىمدارىنىڭ باسشىلارى, جاستار ساياساتى سالاسىنداعى ساراپشىلار, سونداي-اق, وڭىرلەردەگى جاستار ساياساتى ماسەلەلەرىنە جەتەكشىلىك ەتەتىن وبلىس اكىمدەرىنىڭ ورىنباسارلارى قاتىستى.
– تاۋەلسىزدىك جىلدارىندا قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ باسشىلىعىمەن ەلىمىزدە جاستار ساياساتىنىڭ نەگىزى قالاندى. سول ساياساتتىڭ جالعاسى رەتىندە, پرەزيدەنت قاسىم-جومارت كەمەل ۇلى توقاەۆ تا جاستار ماسەلەسىنە ايرىقشا باسىمدىق بەرىپ, ۇنەمى نازاردا ۇستاپ وتىرادى. سونداي-اق مەملەكەت باسشىسىنىڭ «تاۋەلسىزدىك بارىنەن قىمبات» ماقالاسىندا جاستار ساياساتىنا قاتىستى بىرقاتار تاپسىرما بەردى. سوعان سايكەس, قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ قىزمەتىن ودان ءارى جەتىلدىرۋ قولعا الىندى, – دەدى داۋرەن اباەۆ.
قازاقستان رەسپۋبليكاسى پرەزيدەنتى اكىمشىلىگىنىڭ ىشكى ساياسات ءبولىمى مەڭگەرۋشىسىنىڭ ورىنباسارى, كەڭەس حاتشىسى ەۆگەني گلوتوۆ قازاقستان رەسپۋبليكاسى پرەزيدەنتى جانىنداعى جاستار ساياساتى جونىندەگى كەڭەستىڭ جاڭا فورماتى تۋرالى باياندادى.
اقپارات جانە قوعامدىق دامۋ ءمينيسترى ايدا بالاەۆا ءوزى باسقاراتىن مينيسترلىكتىڭ الدىنا جاستار ساياساتىنا قاتىستى قويىلعان ستراتەگيالىق مىندەتتەر تۋرالى ايتتى.
اتاپ ايتقاندا, بيىل جىل سوڭىنا دەيىن مەملەكەتتىك جاستار ساياساتى تۋرالى زاڭناماعا وزگەرىستەر ەنگىزىلىپ, قر پارلامەنتىنىڭ قاراۋىنا ۇسىنىلۋى كەرەك. وندا «جاستاردىڭ دامۋ يندەكسى», «جاستاردىڭ الەۋمەتتىك قىزمەتتەرى», «NEET ساناتىنداعى جاستار» ۇعىمدارى زاڭنامالىق تۇرعىدان بەكىتىلۋى ءتيىس. سونىمەن بىرگە مينيسترلىك الدىندا «تاۋەلسىزدىك ۇرپاقتارى» ۇلتتىق جوباسىن ازىرلەۋ مىندەتى تۇر. مۇندا جاستاردى مەملەكەتتىك قولداۋدىڭ بارلىق شارالارىن بىرىڭعاي قۇجاتقا بىرىكتىرۋ, سونداي-اق, تالانتتى جاستاردى قولداۋ ءۇشىن «تاۋەلسىزدىك ۇرپاقتارى» گرانتتارىن تاعايىنداۋ جانە بەرۋ كوزدەلگەن.
– جاستاردى دامىتۋ يندەكسى جاستار ساياساتىن ىسكە اسىرۋ, مونيتورينگ, باعالاۋ تاسىلدەرىن بىرىزدەندىرۋگە جانە ناقتى ناتيجەلەرگە قول جەتكىزۋ ءۇشىن مەملەكەتتىك, اسىرەسە, جەرگىلىكتى ورگانداردىڭ جاۋاپكەرشىلىگىن ارتتىرۋعا باعىتتالعان, – دەدى ايدا بالاەۆا.
سونداي-اق جاستار ساياساتىنىڭ جەكەلەگەن باعىتتارى بويىنشا كەڭەس مۇشەلەرى, «اتامەكەن» ۇلتتىق كاسىپكەرلەر پالاتاسى باسقارما توراعاسىنىڭ ورىنباسارى ولجاس ورداباەۆ بايانداما جاساپ, «جۇزدەن جۇيرىك» باعدارلاماسىنا كاسىپكەرلىك سالاسىن ەنگىزۋدى ۇسىندى.
قر ەنەرگەتيكا مينيسترلىگىنىڭ «يادرولىق فيزيكا ينستيتۋتى» رەسپۋبليكالىق مەملەكەتتىك كاسىپورنىنىڭ نۇر-سۇلتان قالاسى بويىنشا فيليالىنىڭ ديرەكتورى, فيزيكا-ماتەماتيكا عىلىمدارىنىڭ كانديداتى, قاۋىمداستىرىلعان پروفەسسور ماكسيم زدوروۆەتس عىلىممەن اينالىسۋعا 5 جىلدىق گرانتتاردى ەنگىزۋدى ۇسىندى. بۇل وتاندىق عالىمدار ءۇشىن ۇزاق مەرزىمدى ماقساتتار قويۋعا, بولاشاعى زور زەرتتەۋلەردى ساپالى ءارى جاڭا دەڭگەيگە شىعارۋعا مۇمكىندىك بەرەتىنىن ايتتى.
قازاقستان رەسپۋبليكاسى پرەزيدەنتىنىڭ جانىنداعى الەۋمەتتىك-ەكونوميكالىق رەفورمالاردى تالداۋ جانە مونيتورينگىلەۋ ورتالىعىنىڭ ساراپتامالىق-تالداۋ توبىنىڭ كونسۋلتانتى ءادىل قۇسمانوۆ جاستار جەتىستىككە جەتىپ جۇرگەن بيزنەس, IT, الەۋمەتتىك-ەكونوميكالىق دامۋ جانە مەملەكەتتىك باسقارۋ سالاسىندا جانە تاعى باسقا باعىتتار بويىنشا مەملەكەتتىك جاستار سىيلىعىنىڭ سانىن ارتتىرۋدى ۇسىندى.
قر پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى سابينا ساديەۆا جاستاردى جاس ەرەكشەلىكتەرى بويىنشا توپقا بولە وتىرىپ, ولارمەن ماقساتتى تۇردە جۇمىس جاساۋ قاجەتتىگىن اتاپ ءوتتى.
وتىرىس قورىتىندىسى بويىنشا كەڭەس توراعاسى داۋرەن اباەۆ بىرقاتار ناقتى تاپسىرما بەردى.
– مەملەكەتتىك قولداۋدىڭ بارلىق شاراسى جاستار ءۇشىن ءتيىمدى, ەلگە پايدالى جوبالار جاساۋعا باعىتتالۋى ءتيىس. ول جاستاردىڭ كاسىبي باعدار الۋىنا, ماماندىقتى دۇرىس تاڭداۋىنا, ءوز دەنساۋلىعى ءۇشىن جاۋاپتى بولۋىنا, تۇلعا رەتىندە قالىپتاسۋىنا, ءومىر وتكەلدەرىندە دۇرىس تاۋەكەل ەتىپ, ءسۇرىنىپ كەتپەۋىنە جول اشۋى كەرەك, – دەدى داۋرەن اباەۆ.
ەستەرىڭىزگە سالا كەتەيىك, قازاقستان رەسپۋبليكاسى پرەزيدەنتىنىڭ جانىنداعى جاستار ساياساتى جونىندەگى كەڭەس – ەلىمىزدەگى مەملەكەتتىك جاستار ساياساتىن جەتىلدىرۋ جونىندەگى شارالاردى ازىرلەۋ جونىندەگى باستى ديالوگ الاڭى. بيىل مەملەكەت باسشىسىنىڭ جارلىعىمەن كەڭەس قۇرامى تولىعىمەن جاڭارتىلدى. وعان پرەزيدەنتتىك جاستار كادر رەزەرۆى مەن ۇلتتىق قوعامدىق سەنىم كەڭەسىنىڭ وكىلدەرى, رەسپۋبليكالىق جاستار ۇيىمدارىنىڭ باسشىلارى, دەپۋتاتتار, ساراپشىلار كىردى.
