«قۇرمەتتى دوستار! ارداقتى اعايىن!
سىزدەردى 21 مامىر – ەلىمىزدىڭ مادەنيەت جانە ونەر سالاسى قىزمەتكەرلەرى كۇنىمەن شىن جۇرەكتەن قۇتتىقتايمىن!
بۇگىن مادەنيەت پەن ونەر سالاسىنىڭ ماماندارى حالىق الدىندا جىل بويى اتقارعان جۇمىسىنا ەسەپ بەرۋدى ىشتەي پارىز ساناسا, حالىق التى اتانعا جۇك بولار جاۋاپكەرشىلىك ارقالاپ كەلە جاتقان جاندارعا العىس ايتاتىن ايشىقتى كۇن. تۇڭعىش پرەزيدەنت – ەلباسى نۇرسۇلتان نازارباەۆتىڭ جارلىعىنا ساي 2013 جىلدان باستاپ مەرەكەلەنەتىن بۇل اتاۋلى كۇن جاس بولسا دا, وردا بۇزار وتىزدى القىمداعان ۇلى دالا ەلىنىڭ رۋحانياتىن, مادەني ديدارىن ايشىقتاۋ جولىندا ايانباي قىزمەت ەتىپ جۇرگەن كوڭىلدەرى كولدەي قوس سالا قىزمەتكەرلەرى ءۇشىن اسا قىمبات.
ازاتتىقتىڭ ارايلى تاڭىنان باستاپ ەلدىڭ ساناسىن سىلكىنتۋگە باعىتتالعان باتىل باستامالار مەن مازمۇندى باعدارلامالاردىڭ بايىپپەن ىسكە اسۋىنا اقىن-جازۋشى, كىتاپحاناشى, ارتيستەر مەن ارحيۆ, مۋزەي, ونەر وشاعىنداعى وزگە دە ماماندار قوسقان ۇلەس ولشەۋسىز. وسى ورايدا جادىمىزدى جاڭعىرتقان «حالىق – تاريح تولقىنىندا», «مادەني مۇرا», «رۋحاني جاڭعىرۋ» سىندى باعدارلامانى, قازاق حاندىعىنىڭ 550, ۇلىق ۇلىس – التىن وردانىڭ 750 جىلدىعىن جانە تۇعىرلى تۇلعالارىمىزدىڭ مەرەيتويىن ايتا الامىز.
ءتىپتى, الەم الاپات ىندەتپەن ارپالىسىپ جاتقان جىلدارى دا مادەنيەت پەن ونەر قايراتكەرلەرى الدىڭعى شەپتەن كورىنىپ, ونلاين فورماتتا كونتسەرت, قويىلىم, كورمە, ەكسكۋرسيا, ادەبي كەش ۇيىمداستىرۋ ارقىلى ۇيدە وتىرعان ەلدىڭ ەڭسەسىن تىكتەۋگە, جان دۇنيەسىن بايىتۋعا بارىپ سالىپ جاتىر.
الداعى ۋاقىتتا كىسىلىگى كەمەل, پاراسات-پايىمى مول ارىپتەستەرىمنىڭ ۇلىستى ۇيىتاتىن يگى ىستەرگە بىلەك سىبانا كىرىسىپ, كوپتى قۋانتا بەرەتىنىنە سەنىمىم مول. ۇنەمى ەسەلى ەڭبەكتەرى بەرەكەلى بولىپ, تولايىم تابىسقا قول جەتكىزە بەرۋىنە تىلەكتەسپىن.
وسىناۋ ورايلى ءساتتى پايدالانا وتىرىپ, بارشاڭىزعا مىقتى دەنساۋلىق, قاجىماس قايرات, ورتايماس ىرزىق-نەسىبە تىلەيمىن!», دەپ جازىلعان ءمينيستردىڭ قۇتتىقتاۋ حاتىندا.
