تولەبي اۋداندىق پوليتسيا بولىمىنە بىرنەشە جەرگىلىكتى تۇرعىندار اۋدان كولەمىندە ەسىرتكى زاتىن ساتۋمەن اينالىساتىنى جونىندە حابارلاما تۇسكەن. اتالعان جايت قر قىلمىستىق كودەكسىنىڭ 297-بابى (ەسىرتكى, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, يەمدەنۋ, ساقتاۋ, تاسىمالداۋ, جونەلتۋ نە وتكىزۋ) بويىنشا تىركەۋگە الىندى.
«زاڭمەن تىيىم سالىنعان ەسىرتكى زاتىن دايىنداپ, ساتۋى مۇمكىن تۇرعىنداردى انىقتاپ, قىلمىستى اشۋ ماقساتىندا تۇركىستان وبلىسى پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسى مەن تولەبي اپب-نىڭ تاجىريبەلى ءتارتىپ ساقشىلارىنان ارنايى توپ قۇرىلدى.
پوليتسەيلەر جەدەل-ىزدەستىرۋ شارالارىنا بىردەن كىرىسىپ, قىلمىستىق ءىستى سوڭىنا دەيىن جەتكىزۋ ءۇشىن جان-جاقتى جۇيەلى جۇمىستار اتقارىلدى. ءتارتىپ ساقشىلارىنىڭ ەكى اي بويى كۇنى-ءتۇنى ىسكە اسىرعان تىڭعىلىقتى تەكسەرۋ جۇمىستارىنىڭ ناتيجەسىندە, كۇدىكتىلەردىڭ جەكە-باسى انىقتالدى», دەلىنگەن حابارلامادا.
وسىلايشا ەسىرتكى زاتىن ساتۋمەن اينالىستى دەگەن كۇدىكپەن ءبىر تاۋلىكتە التى ەر ادام تۇرعىلىقتى مەكەنجايلارىنان ۇستالىپ, اپب-عا جەتكىزىلگەن. ولاردىڭ بارلىعى جەرگىلىكتى تۇرعىندار, ونىڭ ىشىندە تورتەۋى بۇرىن سوتتى بولعان.
«كۇدىكتى دەپ تانىلعان ەر ادامداردىڭ ۇيلەرىنە ءتىنتۋ جۇرگىزۋ كەزىندە, ۇشەۋىنىڭ ۇيىنەن قاعازعا ورالعان ەسىرتكىگە ۇقساس زات تاركىلەندى. ساراپتاما قورىتىندىسىمەن ايعاقتى زات رەتىندە الىنعان زاتتىڭ بىرەۋىنىڭ سالماعى 44 گرامم, ەكىنشىسى 26 گرامم, ءۇشىنشىسى 18 گرامدى قۇرايتىن ماريحۋانا ەكەندىگى بەلگىلى بولدى», دەيدى وبلىستىق پوليتسيا دەپارتامەنتى.
قازىرگى تاڭدا سوتقا دەيىنگى تەرگەۋ امالدارى جۇرگىزىلۋدە. سونداي-اق ۇستالعاندار قاماۋعا الىنعان.
