ءىس-شارادا ءسوز العان ا.ايماعامبەتوۆ: «دۇنيەجۇزىندە بولىپ جاتقان ىندەتكە قاراماستان ءبىلىم شىڭىن باعىندىرىپ, ەلىمىزدىڭ نامىسىن قورعاپ جۇرگەن جاستاردى ماقتان تۇتامىن. بۇل – ۇلكەن جەتىستىك. وسى ورايدا وقۋشىلاردى ينتەللەكتۋالدىق سايىسقا دايىنداپ, ءبىلىمىن شىڭداۋعا كومەكتەسكەن پەداگوگتەرگە, وسىنداي دارىندى بالالاردى تاربيەلەپ, مۇعالىمدەرمەن بىردەي باپتاپ جۇرگەن اتا-انالارعا العىس ايتامىن. ولاردىڭ ەڭبەگى وتە زور. ءبىز وسى وليمپيادانى ۇيىمداستىرۋ كەزىندە دە اشىقتىق پەن ادىلدىكتى قامتاماسىز ەتۋدى جالعاستىردىق. وليمپيادانىڭ سوڭعى كەزەڭى كومپيۋتەرلىك فورماتتا ءوتتى. ادالدىق قاعيدالارىن الداعى وليمپيادالاردىڭ بارلىق كەزەڭىندە ساقتاۋدى قولعا الامىز», دەدى.
ەلورداداعى №17 مەكتەپ-گيمنازياسىنىڭ 10-سىنىپ وقۋشىسى سارا وكەنوۆا رەسپۋبليكالىق وليمپيادادا فرانتسۋز ءتىلى بويىنشا قولا مەدال يەلەندى.
«كوپ قاتارلاستارىم اعىلشىن ءتىلىن تاڭدايدى. سوندىقتان پاندىك وليمپيادادا وعان باسەكەلەستىك جوعارى. الايدا مەن فرانتسۋز ءتىلىن مەكتەبىمنىڭ تالابىنا بايلانىستى وقىدىم. 3 جىلداي بۇرىن الماتىدان اۋىسىپ كەلگەنىمدە, جاڭا وقۋ وردامدا فرانتسۋز ءتىلىن وقىتاتىنىن ءبىلدىم. اۋەلدە كوپ قينالدىم, قوسىمشا ساباققا باردىم. باستاپقىدا ەڭ بولماسا ۇلگەرىمىمدى جاقسارتىپ, سىنىپتاستارىما ىلەسۋ, باعدارلامادان قالىپ قويماۋدى كوزدەگەن ەدىم», دەيدى قولا مەدال يەگەرى.
س.وكەنوۆانىڭ ويىنشا, جاڭا داعدىنى ۇيرەنۋگە كوپ ۋاقىتتىڭ قاجەتى جوق, ىنتا بولسا بولعانى. ماسەلەن, ول وسى جەتىستىككە 2,5 جىلدا جەتىپ وتىر. ال بولاشاقتا فرانتسۋز ءتىلىن جەتىك مەڭگەرىپ, جوعارى ءبىلىمدى فرانتسيادان الماق.
ايتا كەتەيىك, رەسپۋبليكالىق وليمپيادا بيىلعى وقۋ جىلىندا ءتورت كەزەڭدە ءوتتى. مەكتەپ كەزەڭىنە 1 ملن-عا جۋىق بالا قاتىسسا, قورىتىندى كەزەڭدە 1 582 وقۋشى باق سىنادى. وليمپيادا قورىتىندىسى بويىنشا 685 قاتىسۋشى جەڭىمپاز جانە جۇلدەگەر اتاندى. 122 قاتىسۋشى التىن مەدالعا, 214-ءى كۇمىس جانە 349 قاتىسۋشى قولا مەدالعا يە بولدى. وقۋشىلار وليمپياداعا جانە ءمينيستردىڭ ماراپاتتاۋ راسىمىنە ءوز وڭىرلەرىندە وتىرىپ قاتىستى.
