فوتو: yandex.kz
تۇزەتۋلەرگە سايكەس, ادىلەت ورگاندارىنىڭ وكىلەتتىگى كەڭەيتىلەدى. سونىمەن قاتار نوتاريۋس ليتسەنزياسىنىڭ قولدانىسىن 6 ايعا دەيىن توقتاتا تۇرۋدىڭ قوسىمشا نەگىزدەرى ەنگىزىلەدى.
مۇنداي شارالار نوتاريۋس «دەربەس دەرەكتەر جانە ولاردى قورعاۋ تۋرالى» زاڭ تالاپتارىن بۇزعان جاعدايدا قولدانىلۋى مۇمكىن.
سونداي-اق ليتسەنزيانىڭ قولدانىسىن ۋاقىتشا توقتاتا تۇرۋدىڭ جاڭا نەگىزدەرى ايقىندالدى. اتاپ ايتقاندا:
– نوتاريۋس مەملەكەتتىك قىزمەتتە بولعان كەزدە;
– قازاقستان پارلامەنتىنىڭ دەپۋتاتى نەمەسە تۇراقتى نەگىزدە قىزمەت اتقاراتىن, مەملەكەتتىك بيۋدجەتتەن قارجىلاندىرىلاتىن ءماسليحات دەپۋتاتى بولىپ سايلانعان كەزەڭدە ليتسەنزيانىڭ كۇشى توقتاتىلا تۇرادى.
جاڭا زاڭ: جەكە دەرەكتەردى زاڭسىز پايدالانعان نوتاريۋستار ليتسەنزياسىنان ايىرىلادى
زاڭ جوباسىندا ەلەكتروندىق قۇجاتتار مەن ەلەكتروندىق تسيفرلىق قولتاڭبا تالاپتارىن بۇزعان نوتاريۋستاردى ليتسەنزياسىنان ايىرۋ ماسەلەسى دە قاراستىرىلعان.
قۇجاتتا نوتاريالدىق ەلەكتروندىق ارحيۆ قۇرۋ ءتارتىبى دە ناقتىلانادى. بۇدان بولەك, نوتاريات قىزمەتىمەن اينالىسۋعا ليتسەنزياسى بولا تۇرا, 5 جىلدان استام ۋاقىت ماماندىعى بويىنشا جۇمىس ىستەمەگەن ازاماتتارعا مىندەتتى بىلىكتىلىكتى ارتتىرۋ تالابى ەنگىزىلەدى.
دەپۋتاتتاردىڭ پىكىرىنشە, بۇل وزگەرىستەر نوتاريات سالاسىنداعى جاۋاپكەرشىلىكتى كۇشەيتىپ, ازاماتتاردىڭ قۇقىقتارىن قورعاۋ تەتىكتەرىن جەتىلدىرۋگە مۇمكىندىك بەرەدى.
ەسكە سالايىق, ءماجىلىستىڭ جالپى وتىرىسىندا دەپۋتاتتار سالىق كودەكسىنە وزگەرىستەر ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى.
