سپورت • 17 مامىر، 2021

الماتىدا دزيۋدودان ازيا كۋبوگى اياقتالدى

22 رەت كورسەتىلدى

الماتىداعى بالۋان شولاق اتىنداعى مادەنيەت جانە سپورت سارايىندا دزيۋدودان جاسوسپىرىمدەر مەن جاستار اراسىنداعى ازيا كۋبوگى ءوز مارەسىنە جەتتى.

وزبەكستان، قىرعىزستان، تاجىكستان جانە قازاقستاننىڭ بارلىق وڭىرىنەن كەلگەن بالۋانداردىڭ باسىن قوسقان جارىس بەلگىلى قوعام قايراتكەرى، بىلىكتى باسشى، اتىمتاي جومارت بەكەت ماحمۇتوۆتى ەسكە تۇسىرۋگە ارنالدى.

جاس كەزىندە سامبومەن شۇعىلدانىپ، سپورت شەبەرى دارەجەسىنە دەيىن جەتكەن بەكەت ساپابەك ۇلى كەڭەس وداعى تۇسىندا ءتۇرلى سالادا باسشىلىق قىزمەتتەر اتقاردى. زاماننىڭ اۋمالى-توكپەلى كەزەڭىندە بيزنەسكە بەت بۇردى. 1993 جىلى قازاقستان بوكس فەدەراتسياسىنىڭ تىزگىنىن ۇستاسا، 1998 جىلى ايبا-نىڭ ۆيتسە-پرەزيدەنتى بولىپ سايلاندى. سول كەزدەرى سپورتتىڭ وسى ءتۇرى بويىنشا جەرلەستەرىمىز تولاعاي تابىستارعا قول جەتكىزدى. وليمپيا ويىندارى مەن الەم چەمپيوناتتارىنداعى جەڭىپ العان ءتۇرلى-ءتۇستى مەدالداردان بولەك، عالامدىق دودانىڭ ەڭ ۇزدىك بىلعارى قولعاپ شەبەرىنە تيەسىلى ۆەل باركەر كۋبوگىن ءبىزدىڭ جىگىتتەرگە ءبىر ەمەس، بىرنەشە مارتە بۇيىرعانى دا ەسىمىزدە. 2009-2012 جىلدار ارالىعىندا ماحمۇتوۆ مىرزا رەسپۋبليكالىق دزيۋدو فەدەراتسياسىنىڭ پرەزيدەنتى، كوپ ۇزاماي ازيا كونفەدەراتسياسىنىڭ ۆيتسە-پرەزيدەنتى قىزمەتتەرىن اتقاردى. ءدال سول تۇستا كۇرەستىڭ بۇل تۇرىندە بيىك بەلەستەردى باعىندىردىق. ءبىر سوزبەن ايتساق، ايتۋلى ازاماتتىڭ قازاقستان سپورتىنىڭ وركەندەۋىنە سىڭىرگەن ەڭبەگى وراسان زور. بەكەت اعامىز بىلتىرعى جىلدىڭ 14 ساۋىرىندە 81 جاسقا قاراعان شاعىندا دۇنيەدەن وزدى.  

بەكەت ماحمۇتوۆتى ەسكە الۋعا ارنالعان ءداستۇرلى ءتۋرنيردى تاماشالاۋ ارقىلى ەلىمىزدە اسا دارىندى دزيۋدوشىلاردىڭ قالىڭ شوعىرى ءوسىپ كەلە جاتقانىن اڭعاردىق. بۇل اڭگىمە ۇلدارعا قاتىستى. ماسەلەن، جاستار اراسىنداعى جارىستا ءوز سالماق دارەجەسى بويىنشا توپ جارعان شەرزود داۆلاتوۆ (60 كيلو)، سەرىكبول ەستاي (73 كيلو)، ايان بايعازى (81 كيلو) جانە ەرماحان انۋاربەكوۆ (90 كيلو) سىندى سايىپقىرانداردى قالاي ماقتاساق تا جاراسادى. ولاردىڭ بويىنان جەڭىسكە دەگەن ەرەكشە قۇلشىنىستى بايقادىق. بارلىعى دا وزدەرىنىڭ وجەتتىگى مەن تاباندىلىعى جانە تەحنيكالىق ارسەنالدارىنىڭ مولدىعىمەن وقشاۋلاندى. سونىمەن قاتار ءار بەلدەسۋ بارىسىندا ولار ءداپ ءبىر ساقا سپورتشىلار سەكىلدى وتە ساۋاتتى تاكتيكا ۇستانىپ، قارسىلاستارىن الىپ تا، شالىپ تا جىقتى. وسىنداي كورىنىستەردى كورىپ، كوڭىلىمىز كادىمگىدەي مارقايىپ قالدى. ال قالعان ءۇش سالماقتا وزبەكستاننىڭ ورەندەرى باس جۇلدەنى ولجالادى. 

وكىنىشكە قاراي، كوڭىلگە كىربىڭ تۇسىرگەن جايتتار دا جوق ەمەس. قازىرگى كەزدە ەلىمىزدە ايەلدەر دزيۋدوسى اقساپ تۇرعانى بارشاعا ءمالىم. سول سەكىلدى قىزداردىڭ دا جاعدايى ءماز ەمەس ەكەن. ماسەلەن، جەتى سالماق دارەجەسى بويىنشا وتكەن باسەكەلەردىڭ تەك ۇشەۋىندە قازاق بالۋاندارىنىڭ باعى جاندى. جەڭىس تۇعىرىنىڭ ەڭ بيىك ساتىسىنا كوتەرىلۋ باقىتى ءمولدىر بەيسەنوۆا (57 كيلو)، روزا نۇسانتايقىزى (70 كيلو) جانە اسەل بيسەنباي (70 كيلو) سىندى بويجەتكەندەرگە عانا بۇيىردى. سونىمەن قاتار وزبەكتىڭ ءۇش ارۋى جانە قىرعىزدىڭ ءبىر قىزى التىننان القا تاعىندى.  

جاسوسپىرىمدەر اراسىنداعى سايىستا دا ءدال سونداي كورىنىستىڭ كۋاسى بولدىق. ءبىزدىڭ ۇلدار سەگىز سالماقتىڭ التاۋىندا الدىنا جان سالمادى. اتاپ ايتساق، سانجار ءالي (50 كيلو)، تالعات ورىنباسار (55 كيلو)، ايان بايكەنجەەۆ (60 كيلو)، اكبار التاي (66 كيلو)، نۇرجان بيسەنوۆ (81 كيلو) جانە دامير احەت (+90 كيلو) الماتى تاتاميىندە قارسىلاس شاق كەلتىرمەدى. باس جۇلدەنىڭ ەكەۋى قىرعىزستان مەن وزبەكستانعا كەتتى. ال قىزدارىمىزدىڭ ونەرى كوڭىلىمىزدەن شىقپادى.  جەرلەستەرىمىزدىڭ اراسىنان تەك سابينا يۋلداشبەكوۆا (40 كيلو) مەن ارۋجان ەرەجەپوۆانىڭ (52 كيلو) التىن تۇعىرعا كوتەرىلۋگە كۇش-جىگەرى جەتتى. تاعى ءبىر سالماقتا قىرعىزستاننىڭ وكىلى جەڭىس تويىن تويلاسا، باس جۇلدەنىڭ بەسەۋى وزبەكستاننان كەلگەن بۇرىمدىلارعا بۇيىردى.  

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار