اۋىل اكىمى ديدار ەسمۇحانوۆتىڭ ايتۋىنشا, جانباي اۋىلىنىڭ ىرگەتاسى 1930 جىلى قالانىپتى. سول كەزدە بىرنەشە كولحوز بالىقشىلارى كاسپي تەڭىزىنەن بالىق اۋلاپ, اۋىل شارۋاشىلىعى سالاسىن وركەندەتۋگە ۇلەس قوسقان. جاقىندا وسى اۋىلدا براكونەرلەردىڭ «بارىمتاسىنا» ءتۇسىپ, قورى ازايعان باعالى بەكىرە بالىعىنا ارنايى بەلگى قويىلدى.
– ساۋلەت نىسانى اۋىلدىق وكرۋگ اكىمدىگىنىڭ تاپسىرىسىمەن بوي كوتەردى. بەكىرە مۇسىنىنە قوسا, ءتورت تاقتا ورناتىلدى. ءار تاقتادا نارىن قۇمى, اشارشىلىق كەزىندە تۇرعىنداردىڭ امان قالۋىنا سەپتىگى تيگەن قۇمارشىق وسىمدىگى, اۋىل شارۋاشىلىعى سالاسىنىڭ كورىنىستەرى مەن مۇناي ءوندىرىسى بەينەلەندى. بۇل – اۋىلىمىزدىڭ وتكەن تاريحىنان سىر شەرتەتىن بەلگى, – دەيدى ديدار ەسمۇحانوۆ.
اتىراۋ وبلىسى
