مەديتسينا • 17 مامىر، 2021

ىندەتتەن قۇتىلاتىن بىردەن-ءبىر جول

47 رەت كورسەتىلدى

ۆاكتسينا پاسپورتى – مەملەكەتتەر اراسىنداعى ساياحاتتى قايتا جانداندىرۋ ءۇشىن قاجەت جالعىز جول. بۇل تۋرالى حالىقارالىق جولاۋشىلار قابىلداۋ بويىنشا كوش باستايتىن دۋباي اۋەجايىنىڭ باسشىسى پىكىر ءبىلدىردى.

دۋباي قالاسى اۋەجايىنىڭ جەتەكشىسى پول گريففيتس ۆاكتسينا پاسپورتىن ەنگىزۋدەن باسقا جول جوق دەگەن ويىنا سەنىمدى. ال ۆاكتسينا مەن ديجيتال جۇيەسىن سىناۋشىلاردىڭ ءوزى بۇعان سالعىرت قارايتىن جاۋاپسىز ازاماتتار دەگەن پىكىردە.

اۋەجاي باسشىسىنىڭ ايتۋىنشا، ۆاكتسينا پاسپورتى بۇگىندە تالاسسىز ماڭىزعا يە جانە ءوزى پاسپورتتى قولداۋشىلاردىڭ ءبىرى ەكەنىن مالىمدەدى.

«مەنىڭ ويىمشا، ماسەلە پاسپورتتا نەمەسە ونىڭ ماڭىزىن كەمىتۋدە ەمەس. نەگىزگى ماسەلە بارلىق مەملەكەتكە ورتاق پاسپورت جۇيەسىن ويلاپ تابۋدا. ياعني بارلىق مەملەكەتتىڭ تالابىنا ساي بولاتىن ورتاق جۇيە قالىپتاستىرۋ كەرەك»، دەيدى پول گريففيتس.

دۇنيەجۇزىلىك دەنساۋلىق ساقتاۋ ۇيىمى مەن حالىقارالىق ساياحات پەن تۋريزم كەڭەسى «ۆاكتسينا پاسپورتى ەكى دەڭگەيلى قوعام قالىپتاستىرادى» دەگەن كۇمانمەن قۇجاتقا قاتىستى تەرىس پىكىردە. ولار حالقىنىڭ جاپپاي ۆاكتسينا الۋىن قامتاماسىز ەتە المايتىن مەملەكەتتەردىڭ، ۆاكتسينا الۋ مۇمكىندىگى شەكتەۋلى ازاماتتاردىڭ بارىن ەسكەرۋ قاجەتتىگىن ورتاعا سالدى. ال ۆاكتسينا پاسپورتى ولاردى مارگينالدى قوعام قاتارىنا قوسىپ، الەمدە تاعى ءبىر ديسكريميناتسيانىڭ قالىپتاسۋىنا سەبەپ بولادى دەگەن پىكىردە.

«ساياحات، جۇمىسقا بارۋ، الەۋمەتكە ارالاسۋ، قاجەت قىزمەتتەردى الۋ ءۇشىن  سەرتيفيكات تالاپ ەتۋ – بىرقاتار ەتنوستىق كىشى توپتار، ميگرانتتار مەن الەۋمەتتىك-ەكونوميكالىق دەڭگەيى تومەن ازاماتتاردىڭ قۇقىعىنا نۇقسان كەلتىرەدى»، دەيدى ۇيىم وكىلدەرى.

ددسۇ وكىلى مايك ريان ۆاكتسينا پاسپورتىنىڭ ەتيكاعا قاتىسىن بىلاي بايلانىستىرادى. «الەمدە ۆاكتسينانىڭ ءادىل تاراتىلىپ جاتپاعانى انىق. سوندىقتان مۇنداي جاعدايدا ەتيكا ماسەلەسى ەسكەرىلۋى قاجەت»، دەدى ول.

اۆياتسيا سالاسى ۇكىمەتتەردىڭ قاتاڭ شەكتەۋلەرى مەن شەكارالاردىڭ جابىلۋى، جولاۋشىلاردىڭ ازايۋى سالدارىنان پايدا بولعان  شىعىنىن جاۋىپ، تابىس الۋ جولدارىن قاراستىرىپ جاتىر. اۋە تاسىمالى توبى  اۆياتسيا پاندەمياعا دەيىن جاھاندىق ەكونوميكاعا 3،5 ملرد اقش دوللارى كولەمىندە پايدا اكەلىپ وتىرعانىن حابارلادى.

دەگەنمەن مۇنداي كەزەڭدە دە دۋباي قالاسىنىڭ اۋەجايى جولاۋشىلار اعىنى بويىنشا جوعارى كورسەتكىشىن ساقتاپ قالدى. ول ءتىپتى لوندوننىڭ «حيتروۋ» اۋەجايىن باسىپ وزدى. 2019 جىلى بۇل اۋەجايعا كەلگەن جولاۋشىلار سانى 86،3 ملن ادام بولسا، پاندەميا كەزىندە 70 پايىزعا ازايىپ، 25،8 ملن جولاۋشىعا قىزمەت كورسەتىلگەن. اۋەجاي باسشىسى پول گريففيتس ساندى قايتا ءوسىرۋ جولىن قاراستىرۋدا. ونىڭ پىكىرىنشە، تاۋەكەلدەن قاشۋدى ەمەس، تاۋەكەل مەنەدجمەنتىن قولعا الۋ كەرەك.

«الەم ءدال وسى قالىپتا ءارى قاراي ءومىر سۇرە بەرەدى دەپ ويلامايمىن. ول مۇمكىن ەمەس. ادامدار بۇرىنعى ءومىر قالپىنا ورالۋعا اسىق. بۇل الەۋمەت، ەكونوميكا تۇرعىسىنان دا ءتيىمسىز. دەگەنمەن، مەملەكەتتەردىڭ كونسەرۆاتيۆتى شەشىم قابىلداۋىنا تۇسىنىستىكپەن قاراۋىمىز كەرەك»، دەيدى ول.

بىلتىر بىرىككەن اراب امىرلىكتەرى ءوز ەكونوميكاسىنىڭ 6،1 پايىزعا ازايعانىن مالىمدەگەن-ءدى. شىعىس پەن باتىستى بايلانىستىرۋشى ماڭىزدى كوپىر رەتىندە ءباا بۇل شىعىننىڭ ورنىن تولتىرۋ ءۇشىن اۋە ساياحاتىنا رۇقسات بەرۋ كەرەك دەگەن ويدا.

ء«بىز اۆياتسياعا تاۋەلدىمىز. ويتكەنى ءىجو-ءنىڭ 35 پايىزى ساياحات پەن تۋريزمگە تيەسىلى. سوندىقتان مۇنىڭ وتە ۇلكەن ءارى تەرىس سالدارى بولۋى عاجاپ ەمەس. پاندەمياعا دەيىن 8 500 ازاماتتى جۇمىسپەن قامتىدىق. قازىر جۇمىسكەرلەر سانى – 2 500 عانا. بۇل تەك ەكونوميكا ەمەس، وتباسىلار ءۇشىن دە اۋىر جاعداي. سوندىقتان بۇرىنعى قالىپقا قايتا ورالۋ ماڭىزدى»، دەيدى گريففيتس.

سونىمەن قاتار ول اۋە ساياحاتى قايتا جاندانعان جاع­دايدا مەملەكەتتەر ەلگە كىرۋ شارتتارىن قاراستىرۋى كەرەك­تىگىن ايتتى. بۇل – اۋە كومپانيالارى ءۇشىن دە ماڭىزدى ماسەلە. «ۆاكتسينا پاسپورتى – الەم بويىنشا كەدەرگىسىز ساياحاتتاۋدىڭ ەڭ وڭاي ءارى قاراپايىم جولى بولماق»، دەپ قورىتىندىلادى دۋباي اۋەجايىنىڭ باسشىسى.

سوڭعى جاڭالىقتار

ستۋدەنتتەردىڭ ستيپەندياسى كوبەيەدى

ايماقتار • 11 ماۋسىم، 2021

اقتوبە وبلىسىنا باس يمام تاعايىندالدى

تاعايىنداۋ • 11 ماۋسىم، 2021

ۇقساس جاڭالىقتار