سپورت • 14 مامىر، 2021

ەۋروپالىق مامان قازاق فۋتبولىن دامىتۋعا كەلدى

142 رەت كورسەتىلدى

قازاقستان فۋتبول فەدەراتسياسىنىڭ پرەزيدەنتى ادىلبەك جاقسىبەكوۆ قولدانىستاعى قازاقستان فۋتبولىن دامىتۋ ستراتەگياسىن جاڭارتۋ تۋرالى باستاما كوتەردى، دەپ حابارلايدى Egemen.kz قفف ءباسپاسوز قىزمەتى تاراتقان اقپاراتقا سىلتەمە جاساپ.

باعدارلامانى دايىنداۋ ءۇشىن فۋتبول مەديا-يندۋسترياسى، زەرتتەۋ جانە ستراتەگيا سالاسىنداعى ساراپشىلار توبىنىڭ كوشباسشىسى سانالاتىن Result Sports كومپانياسىنىڭ باس ديرەكتورى ماريو لەو شاقىرىلدى.

ماريو لەو دۇنيە ءجۇزى بويىنشا 60-تان استام فۋتبول كلۋبتارى مەن ۇلتتىق قاۋىمداستىقتارعا كەڭەس بەرەدى. ولاردىڭ اراسىندا «بورۋسسيا دورتمۋند»، «بارسەلونا»، «يۋۆەنتۋس» كلۋبتارىنىڭ جانە ەۋروپا ەلدەرىنىڭ فۋتبولدى دامىتۋ تۋرالى 14 ستراتەگياسىن جازىپ شىققان.

ستراتەگيانىڭ جاڭارتىلعان نۇسقاسىن ازىرلەۋ ءۇشىن قازاقستاندا كەشەندى زەرتتەۋ جۇمىستارى باستالدى. ونىڭ ىشىندە جاس ەرەكشەلىكتەرى جانە ايماقتار بويىنشا فۋتبولمەن شۇعىلداناتىندار، ينفراقۇرىلىمنىڭ ساپاسى، قازاق فۋتبولىنىڭ ەكونوميكالىق بولىگى، دەمەۋشىلەر مەن ينۆەستورلاردىڭ قىزىعۋشىلىعى سىندى ماڭىزدى اسپەكتىلەر قامتىلعان.

– زەرتتەۋ قورىتىندىسى بويىنشا شەشىم قابىلدانىپ، دامۋ جولىنىڭ الەۋەتى انىقتالادى. قازاقستاندىق فۋتبولشىلاردىڭ دامۋىنا كەدەرگى كەلتىرەتىن نەگىزگى فاكتورلار ايقىندالادى: ويىنشىلار مەن باپكەرلەردىڭ جەتىسپەۋى، ينفراقۇرىلىمنىڭ ناشارلىعى جانە ت.ب. ەلدەگى فۋتبولدىڭ جاعدايىن تولىق زەرتتەۋ بۇقارا حالىقتىڭ قانشالىقتى جاقىن ەكەنىن انىقتاۋعا مۇمكىندىك بەرەدى. ماسەلەن، 100 مىڭ ادامنىڭ اراسىندا 10 مىڭى دوپ تەبەدى. تاعى 40 مىڭىنىڭ قىزىعۋشىلىعى بار. ولاردىڭ نە سەبەپتەن فۋتبول وينامايتىنىن انىقتاۋ قاجەت. قازاق فۋتبولى الداعى 3-5 جىلدا قاي باعىتقا قوزعالاتىنىن سارالاپ، ناقتى ءارى باسىم باعىتتاردى ءتۇزۋ مىندەت، – دەيدى ماريو لەو. 

ەۋروپالىق ماماننىڭ ايتۋىنشا، جاڭارتىلعان ستراتەگيانى جۇزەگە اسىرۋ 2022 جىلدان باستالادى. قازىرگى ۋاقىتتا دايىندىق جۇمىستارى جۇرگىزىلىپ جاتىر.

– مامىر ايىنىڭ سوڭىندا زەرتتەۋ جۇمىستارىن اياقتايمىز. 2019 جىلى نۇر-سۇلتان، الماتى، شىمكەنت، اقتوبە قالالارىنىڭ فۋتبول جاعدايىن سارالاعان ۋەفا-نىڭ Nielsen Sports كومپانياسى دا زەرتتەۋ جۇرگىزەدى. ولاردىڭ قاتارىنا قاراعاندى جانە تۇركىستان قالالارى قوسىلادى.

2019 جانە 2021 جىلدار ارالىعىن سالىستىرامىز جانە ناقتى كورىنىس الۋ ءۇشىن Nielsen Sports كومپانياسىنىڭ زەرتتەۋ جۇمىستارىنىڭ جاڭا مالىمەتتەرىن تولىقتىرامىز. قازاق فۋتبولىنىڭ قاي باعىتقا جىلجىپ بارا جاتقانىن بايقايمىز.

شىلدە ايىنىڭ ورتاسىندا مالىمەتتەردى تالداپ، قورىتىندى جاسايمىز. ءارى قاراي باسىم باعىتتاردى، ماقسات-مىندەتتەردى ايقىندايمىز. جاڭارتىلعان ستراتەگيا قولدانىستاعى قۇجاتتى جۇزەگە اسىرۋ ناتيجەلەرىن ەسكەرۋ ارقىلى دايىندالادى. ستراتەگيانى بەكىتىپ، جوبالار مەن باعدارلامالاردى ازىرلەۋگە كىرىسەمىز، –  دەيدى ەۋروپالىق بىلىكتى مامان.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار