ەكونوميكا • 14 مامىر، 2021

قازاقستان مەن فينليانديا اراسىنداعى تاۋار اينالىمى 3،4 ەسەگە ارتتى

9 رەت كورسەتىلدى

ساۋدا جانە ينتەگراتسيا ءمينيسترى باقىت سۇلتانوۆ فينليانديانىڭ سىرتقى ساۋدا جانە دامۋ ءمينيسترى ۆيللە سكينناريمەن ەكى ەل اراسىنداعى ساۋدا-ەكونوميكالىق ىنتىماقتاستىقتىڭ وزەكتى ماسەلەلەرىن تالقىلاۋ بويىنشا كەلىسسوزدەر وتكىزدى، دەپ حابارلايدى Egemen.kz ساۋدا جانە ينتەگراتسيا مينيسترلىگىنىڭ ءباسپاسوز قىزمەتى تاراتقان اقپاراتقا سىلتەمە جاساپ.

وعان فينليانديا رەسپۋبليكاسىنىڭ قازاقستان رەسپۋبليكاسىنداعى ەلشىسى سويلي مياكەلياينەن-بۋحانيست، سونداي-اق قازاقستان رەسپۋبليكاسىنىڭ فينليانديا رەسپۋبليكاسىنداعى توتەنشە جانە وكىلەتتى ەلشىسى جاننا سابيتقىزى سارتباەۆا قاتىستى.

قازاقستان مەن فينليانديا اراسىندا ارىپتەستىك ءوزارا قارىم-قاتىناستاردى ودان ءارى دامىتۋدىڭ ءتيىمدى تەتىگى جولعا قويىلعان. قازاقستان-فينليانديا ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسياسى تابىستى جۇمىس ىستەۋدە.

- ەلدەر اراسىنداعى تاۋار اينالىمى 2021 جىلعى قاڭتار-ناۋرىزدا $111،2 ملن-دى قۇرادى، بۇل وتكەن جىلدىڭ سايكەس كەزەڭىمەن سالىستىرعاندا 3،4 ەسە جوعارى. قازاقستاننان فينلياندياعا ەكسپورت 2021 جىلدىڭ ءبىرىنشى توقسانىندا 80،8 ەسەگە ءوسىپ، $86،4 ملن قۇرادى. سونىمەن قاتار، قازاقستان-فينليانديا قارىم - قاتىناستارىنىڭ نىعايۋ پەرسپەكتيۆاسى بار، - دەدى ب. سۇلتانوۆ. 

قازاقستاندىق وندىرۋشىلەردىڭ ارتىقشىلىقتارى تۋرالى ايتا وتىرىپ، باقىت سۇلتانوۆ ەلىمىزدە 60-تان استام ورگانيكالىق ءونىم وندىرۋشىلەر تۋرالى حابارلادى. ولاردىڭ ءبىر بولىگى قازىرگى ۋاقىتتا ەۋروپالىق وداقتىڭ ۋاكىلەتتى ورگاندارىندا اككرەديتتەۋدەن وتۋدە.

اڭگىمە بارىسىندا مينيستر فينليانديانىڭ جوعارى تەحنولوگيالار سالاسىنداعى جەتىستىكتەرىمەن تانىمال ەكەنىن جانە قازاقستان وسى سالادا تاجىريبە الماسۋعا جانە ىنتىماقتاستىق ورناتۋعا مۇددەلى ەكەنىن اتاپ ءوتتى.

- قازاقستان ءتيىمدى، ىڭعايلى گەوگرافيالىق جەردە ورنالاسقان، شەكارالاس ەلدەردىڭ نارىقتارىنا قول جەتكىزە الادى. قازاقستان اۋماعىندا 10 ارنايى ەكونوميكالىق ايماق جۇمىس ىستەيدى. ينۆەستورلار ءۇشىن جەڭىلدىكتەر بار، ۇكىمەت ينۆەستورلاردىڭ قۇقىقتارىن قولداۋعا جانە قورعاۋعا كەپىلدىك بەرەدى. فين ينۆەستيتسيالارىن تارتۋ ءۇشىن «قورعاس» شىحو الەۋەتىن پايدالانۋدى، سونداي-اق ونى قحر نارىعىنا كوتەرمە-بولشەك ەكسپورتتاۋ ءۇشىن الاڭ رەتىندە پايدالانۋدى ۇسىنعىم كەلەدى، - دەدى ساۋدا جانە ينتەگراتسيا ءمينيسترى.

ءوز كەزەگىندە فينليانديانىڭ سىرتقى ساۋدا جانە دامۋ ءمينيسترى ۆ.سكينناري رەسەي فەدەراتسياسى مەن قحر اراسىنداعى قارىم-قاتىناستار اياسىندا، سونداي-اق ەۋروپالىق قاۋىمداستىقپەن ىنتىماقتاستىق اياسىندا بيزنەس پەن ساۋدانى دامىتۋ ماسەلەلەرىن تالقىلاۋعا كەلگەنىن اتاپ ءوتتى.

- ءبىز فينليانديانىڭ جەتەكشى كومپانيالارىنىڭ وكىلدەرىمەن ىنتىماقتاستىقتىڭ ناقتى نۇسقالارىن تالقىلاۋ ءۇشىن كەلدىك. فينليانديانىڭ جوعارى تەحنولوگيالارىن ەسكەرە وتىرىپ، ءبىز ىنتىماقتاستىعىمىزدى دامىتىپ، سەرپىلىس جاساي الامىز دەپ ويلايمىن. سونداي-اق ءبىز لوگيستيكا، تسيفرلاندىرۋ، ءبىلىم بەرۋ جانە دەنساۋلىق ساقتاۋ سالالارىنداعى ىنتىماقتاستىقتى دامىتۋعا مۇددەلىمىز. ءبىز ساۋدا سەرىكتەسى بولۋعا جانە ەو نارىعىندا ورىن الۋعا قازاقستاندى قولداۋعا دايىنبىز، - دەدى ۆ.سكينناري.

وسىعان بايلانىستى، بيزنەس-توپتار اراسىنداعى ىنتىماقتاستىقتى جانداندىرۋ ماقساتىندا قازاقستاندىق تاراپ تۇتىنۋشىلاردى قازاقستاندىق جانە فين ءوندىرىسىنىڭ ونىمدەرىمەن تانىستىرۋ ءۇشىن ونلاين-فورماتتا ساۋدا ميسسيالارىن وتكىزۋدى قاراستىرۋ مۇمكىندىگىن ۇسىندى.

سوڭعى جاڭالىقتار

«بارىسقا» جاڭا قاقپاشى كەلدى

حوككەي • بۇگىن، 09:18

ۇقساس جاڭالىقتار